އުދައަރަމުންދާތީ ބްރިޖުން ޒަރޫރީ ދަތުރުތައް މެނުވީ ނުކުރުމަށް ފުލުހުން އިލްތިމާސްކޮށްފި

މާލޭގެ ބައެއް ސަރަހައްދުތަކަށް ވަރަށް ބޮޑަށް އުދައަރަމުންދާތީ ސިނަމާލެ ބްރިޖުން ޒަރޫރީ ދަތުރުތައް މެނުވީ ނުކުރުމަށް ފުލުހުން އިލްތިމާސްކޮށްފިއެވެ.

ފުލުހުން ބުނީ މާލެ އެކި ސަރަހައްދުތަކަށް އުދަ އަރަމުން ދާތީ ސަމާލުވާން ޖެހޭ ކަމަށެވެ. ހާއްސަކޮށް، މާލެ އާއި ހުޅުމާލެ އާ ދެމެދު އުދައެރުން ހުއްޓެންދެން، ޒަރޫރީ ދަތުރުތައް މެނުވީ ނުކުރުމަށް އެދޭ ކަމަށް ފުލުހުން ބުނެއެވެ. އަދި ޒަރޫރީ ދަތުރުތައް ކުރުމަށްވެސް ހަތަރު ފުރޮޅުލީ އުޅަނދު ބޭނުން ކުރުމަށް ފުލުހުން ވަނީ އިލްތިމާސްކޮށްފައެވެ.

ފުލުހުން އާއްމުންގެ ރައްކާތެރިކަން ކަށަވަރުކުރުމަށް ކުރަމުންދާ މަސައްކަތުގައި އެއްބާރުލުން ބޭނުންވާ ކަމަށާ އަދި ފުލުހުން ދެމުންދާ އިރުޝާދުތަކާ އެއްގޮތަށް އަމަލުކުރުމަށް ފުލުހުން ވަނީ އެދިފައެވެ.

ޒަރޫރީ ދަތުރެއް މެނުވީ ނުކުރުމަށް ފުލުހުން އިލްތިމާސްކޮށްފައިވާއިރު، ހޮނިހިރު ދުވަހު ބްރިޖަށް އުދައިގެ ވަރުގަދަ ރާޅެއް އެރުމާއެކު، ދަތުރުކުރަމުން ދިޔަ ގިނަ އަދަދެއްގެ ސައިކަލުތަކުގައި ތިބި މީހުން ރާޅާއެކު ކަހާލައިގެން ބިންމައްޗަށް ވެއްޓެއެވެ. ސޯޝަލް މީޑިއާގައި މިވީޑިއޯ ދަނީ ދައުރުވަމުންނެވެ. މިހާދިސާގައި 6 މީހަކަށް އަނިޔާވެ، ސެނެހިޔާގައި ފަރުވާ ދީފައިވާ ކަމަށް ފުލުހުން ބުނެއެވެ. އަދި ވެލި ހުރުމުގެ ސަބަބުން ވެސް ސައިކަލު ކަހާލައި ބައެއް އެކްސިސެންޓްތައް ހިނގަމުންދާ ކަމަށް ފުލުހުން ބުނެއެވެ.

މިހާދިސާއާ ގުޅިގެން ގިނަ އަދަދެއްގެ ފުލުހުން ދަނީ ބްރިޖު ސަރަހައްދުގައި ހަރަކާތްތެރިވަމުންނެވެ.

ހުކުރު ދުވަހުން ފެށިގެން ރާއްޖޭގެ އެކި ހިސާބުތަކަށް ދަނީ އުދައަރަމުންނެވެ. ހޮނިހިރު ދުވަހު މާލެއަށް ވަނީ ވަރަށް ބޮޑަށް އުދައަރާފައެވެ.

އެގޮތުން މާލެއާއި ހުޅުމާލޭއަށް ދަތުރުކުރަން އޮންނަ ހައިވޭއަށް ވެސް ރާޅު ދަނީ އަރަމުންނެވެ. މާލޭގެ ރާޅުގަނޑު ސަރަހައްދާއި، އާޓިފިޝަލް ބީޗު، ކާނިވާ ސަރަހައްދާ ދިމާލުން ބޮޑުތަކުރުފާނު މަގަށް ވެސް ވަނީ ވަރަށް ބޮޑަށް ރާޅުއަރާފައެވެ. އެ މަގު އެއްކޮށް ފެންބޮޑުވެފައިވާއިރު، ގަލާވެލި ވަރަށް ބޮޑަށް މަގަށް ވަނީ އަރާފައެވެ. އަދި ހިނގާބިގާވެ އުޅުމަށާއި، ވެހިކަލް ދުއްވުމަށް ވެސް ދަތިތައް ކުރިމަތިވެފައިވާއިރު، މާލެސިޓީ ކައުންސިލުން ދަނީ މަގުތަކަށް އަރާފައިވާ ވެލިތައް ނެގުމުގެ މަސައްކަތް ވެސް ކުރަމުންނެވެ.