ޑިމޮކްރެޓްސްއަށް ބަދަލުވެވަޑައިގަތް، ރަސްދޫ ކައުންސިލްގެ ރައީސާއި ނައިބު އެނބުރި އެމްޑީޕީއަށް
5 އޯގަސްޓު 2023 | ހޮނިހިރު 06:20އެމްޑީޕީން ވަނީ އެ ދެ ބޭފުޅުން އެ ޕާޓީއާ އަލުން ގުޅިވަޑައިގަތުމުން ހޫނު މަރުހަބާއެއް ދަންނަވާފައި
އެމްޑީޕީއަށް ސޮއިކުރި ފަރާތްތަކާއެކު ރައީސް
ދަ ޑިމޮކްރެޓްސް އުފެދުމާއެކު އެމްޑީޕީން ވަކިވެވަޑައިގެން އެ ޕާޓީއަށް ސޮއިކުރެއްވި، ރަސްދޫ ކައުންސިލްގެ ރައީސާއި ނައިބު ރައީސް އެނބުރި އެމްޑީޕީއަށް ސޮއިކުރައްވައިފިއެވެ.
ރަސްދޫ ކައުންސިލްގެ ރައީސް މުހައްމަދު ނާހިދާއި ނައިބު ރައީސް އަބްދުﷲ އަނިލް ވަނީ ހުކުރު ދުވަހު އެމްޑީޕީއަށް ސޮއިކުރައްވައި، ފޯމުތައް ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް، އިބްރާހީމް މުހައްމަދު ސާލިހުގެ އަތްޕުޅަށް އަރުވާފައެވެ. އެމްޑީޕީން ވަނީ އެ ދެ ބޭފުޅުން އެ ޕާޓީއާ އަލުން ގުޅިވަޑައިގަތުމުން ހޫނު މަރުހަބާއެއް ދަންނަވާފައެވެ.
އެމްޑީޕީގެ ކުރީގެ ރައީސް މުހައްމަދު ނަޝީދު އިސްކޮށް ހުންނަވައިގެން އުފެއްދި ޑިމޮކްރެޓްސްއަށް އެމަނިކުފާނަށް ތާއީދުކުރާ ފަރާތްތަކުން ވަނީ ސޮއިކޮށްފައެވެ. ނަމަވެސް ޕާޓީގެ އުސޫލުތަކާމެދު ހިތްޖަހަމަނުޖެހޭ ކަމަށް ބުނެ، ސޮއިކުރި ބައެއް ފަރާތްތަކުން ދަނީ އެ ޕާޓީން ވަކިވަމުންނެވެ.
ޑިމޮކްރެޓްސްއަކީ އެމްޑީޕީގެ މިއަހަރުގެ ރިޔާސީ އިންތިޚާބުގެ ޕްރައިމަރީގައި ނަޝީދަށް ލިބިވަޑައިގެންނެވި ނާކާމިޔާބީއާ ގުޅިގެން އެމްޑީޕީއިން ވަކިވި ފަރާތްތައް ގުޅިގެން އުފެއްދި ޕާޓީއެކެވެ.
ޑިމޮކްރެޓްސްގެ އިތުރުންވެސް ރާއްޖޭގެ އެހެން ބައެއް ސިޔާސީ ޕާޓީތަކުގައި އިސްކޮށް ހަރާކާތްތެރިވާ މެމްބަރުންނާއި ކައުންސިލަރުންވެސް ގެންދަވަނީ އެމްޑީޕީއަށް ސޮއިކުރައްވަމުންނެވެ.
