ދުނިޔޭގެ ޗެމްޕިއަންކަން ދެފަހަރު ހޯދާފައިވާ ޖަރުމަނު ކަޓުވާލުމަށްފަހު، އަންހެނުންގެ ވޯލްޑް ކަޕުގެ ދެވަނަ ބުރުގެ ފަހު ޖާގަތައް ކޮލަމްބިއާ އާއި މޮރޮކޯ ހޯދައިފިއެވެ.

ގުރޫޕު އެޗްގެ ފަހު މެޗުގައި ޖަރުމަނު ކުޅެން ނިކުތީ ދެކުނު ކޮރެއާ އާ ދެކޮޅަށެވެ. ދެކުނު ކޮރެއާ ވަނީ މުބާރާތުގައި ކުޅުނު ދެ މެޗުންވެސް ބަލިވެފައެވެ. މި ދެ ޓީމު ބައްދަލުކުރި މެޗު ނިމުނީ 1-1 ގެ ނަތީޖާއަކުން އެއްވަރުވެގެނެވެ. މެޗުގެ ހަވަނަ މިނެޓުގައި ކޮރެއާގެ ޗޯ ލަނޑެއް ޖަހާ ކުރިހޯދަދިނެވެ. ނަމަވެސް 42 ވަނަ މިނެތުގައި ޖަރުމަނުގެ ޕޮޕް ވަނީ ލަނޑެއް ޖަހާ ނަތީޖާ ހަމަހަމަ ކޮށްދީފައެވެ. މިއާއެކު ޖަރުމަނަށް ލިބުނީ ހަތަރު ޕޮއިންޓެވެ.

ފަހު މެޗުގައި ކޮލަމްބިއާ ނިކުތީ މޮރޮކޯ އާ ދެކޮޅަށެވެ. ކޮލަމްބިއާ ކުޅުނު ދެ މެޗުންވެސް މޮޅުވެފައިވާއިރު، މޮރޮކޯ ވަނީ އެއް މެޗުން މޮޅުވެފައެވެ. މި މެޗު އެއްވަރު ނުވަތަ، މޮރޮކޯ ބަލިވިނަމަ ޖަރުމަނަށް ދެވަނަ ޓީމުގެ ގޮތުގައި ދެވަނަ ބުރަށް ދެވޭނެއެވެ. ނަމަވެސް، ޖަރުމަނު ކައިރިން 6-0 ގެ ނަތީޖާއަކުން ބަލިވެފައިވާ މޮރޮކޯ އިން ވަނީ ގުރޫޕުގެ އެއްވަނައިގައިވާ ކޮލަމްބިއާގެ މައްޗަށް ކުރިހޯދާފައެވެ. މޮރޮކޯ އިން މެޗު ކާމިޔާބުކުރީ 1-0 ގެ ނަތީޖާއަކުންނެވެ. މެޗުގެ ހަމައެކަނި ލަނޑު ފުރަތަމަ ހާފު ނިމެން ކައިރިވެފައިވަނިކޮށް ޖަހައިދިނީ އަނީސާ ލަހްމާރީއެވެ. މިއާއެކު ކޮލަމްބިއާ އާއި މޮރޮކޯއަށް ވަނީ ހަ ޕޮއިންޓު ލިބިފައެވެ. ފައިދާ ގޯލުން ކުރި ލިބެނީ ކޮލަމްބިއާ އަށެވެ.

ދެވަނަ ބުރުގައި ކޮލަމްބިއާ ނިކުންނާނީ ޖެމެއިކާ އާ ދެކޮޅަށެވެ. އަދި މޮރޮކޯ ނިކުންނާނީ ފްރާންސާ ދެކޮޅަށެވެ.