ފްރާންސްގެ އިންޓަނޭޝަނަލް ޑިފެންޑަރު އެކްސެލް ޑިސާސީ ޗެލްސީއާއެކު ހަ އަހަރު ދުވަހުގެ އެއްބަސްވުމެއްގައި ސޮއިކޮށްފިއެވެ.

މޮނާކޯ އިން ޗެލްސީއަށް އޭނާ ބަދަލުވީ 45 މިލިއަން ޔޫރޯ އަށެވެ. ޗެލްސީން 25 އަހަރުގެ ޑިސާސީ ގެނައީ ޑިފެންސަށް ދިމާވާ ދަތިތައް ފޫބެއްދުމަށެވެ. އެ ޓީމުގެ ފަހަތަށް ކުޅޭ ވެސްލީ ފޮފާނާގެ ކަކުލަށް ވަނީ ސީރިއަސް އަނިޔާއެއް ލިބިފައެވެ.

މިދިޔަ ސީޒަނުގައި ޑިސާސީ ވަނީ ލީގުގައި މޮނާކޯގެ ހުރިހާ މެޗެއް ކުޅެފައެވެ. އޭނާ ބުނީ ޗެލްސީއާ ގުޅުމަކީ ވަރަށް ފަޚުރުވެރިވާ ކަމެއް ކަމަށެވެ. އަދި އޭނާގެ އުންމީދަކީ ޗެލްސީއާއެކު މުބާރާތްތައް ކާމިޔާބު ކުރުން ކަމަށާ، އޭނާއަށް ކުރެވެން ހުރި ހުރިހާ ކަމެއް ކުރާނެކަމަށެވެ.

މިދިޔަ އަހަރުގެ ވޯލްޑް ކަޕު ފައިނަލުގައި ޑިސާސީ ވަނީ ބަދަލު ކުޅުންތެރިއެއްގެ ގޮތުގައި އާޖެންޓީނާ އާއި ދެކޮޅަށް ކުޅެން ނިކުމެފައެވެ. މި މެޗު ހިމެނޭހެން އޭނާ ވަނީ ފްރާންސަށް ހަތަރު މެޗު ކުޅެދީފައެވެ. 2020 ވަނަ އަހަރު މޮނާކޯއާ ގުޅުމަށްފަހު އޭނާ ވަނީ އެ ޓީމަށް 129 މެޗު ކުޅެދީފައެވެ.

ޑިސާސީ އަކީ މި ހޫނު މޫސުމުގައި ޗެލްސީއަށް ސޮއިކުރި ހަވަނަ ކުޅުންތެރިޔާއެވެ. މީގެ ކުރިން އެ ޓީމުން ވަނީ ކްރިސްޓޯފާ އެންކުންކޫ، ނިކޮލަސް ޖެކްސަން، ލެސްލީ އުގޮޗުކްވޫ، އެންޖެލޯ ގެބްރިއެލް އަދި ޑިއޭގޯ މޮރޭރާ ސޮއިކޮށްފައެވެ. އައު ކޯޗު، މައުރީސިއޯ ޕޮޗެޓީނޯ ދަނީ ޓީމަށް ބޮޑެތި ބަދަލުތަކެއް ގެންނަމުންނެވެ. އެގޮތުން، އޭނާ ހަވާލުވުމަށްފަހު މިހާތަނަށް 12 ކުޅުންތެރިޔަކު ދުކޮށްލާފައިވެއެވެ.

ޗެލްސީން ޕޮޗެޓީނޯ ގެނައީ މިދިޔަ ސީޒަނުގެ ދަށް ނަތީޖާގެ ސަބަބުންނެވެ. މިދިޔަ ސީޒަން އެ ޓީމުން ނިންމާލަން ޖެހުނީ ތާވަލުގެ 12 ވަނައިގައެވެ.