އެލް ނީނޯގެ ސަބަބުން މުޅި ދުނިޔޭގެ ދަނޑުވެރިކަމަށް ނޭދެވޭ އަސަރު ކުރުން އެކަށީގެންވޭ!

ބައިނަލްއަގުވާމީ މަސްރަހުން މި ދުވަސްވަރު އެންމެ ގިނައިން ލިބެމުންދާ އެއް އިންޒާރަކީ މޫސުމީ ނޭދެވޭ ބަދަލުތަކާ ގުޅިފައިވާ އިންޒާރުތަކެވެ. މިގޮތުން އެންމެ ފަހުން ލިބުނު އެއް އިންޒާރަކީ، އުފެދެމުންދާ އެލް ނީނޯގެ ނޭދެވޭ އަސަރު، މުޅި ދުނިޔޭގެ ދަނޑުވެރިކަމުގެ އުފެއްދުންތެރިކަމަށް މި އަހަރު ތެރޭގައި ފޯރާނެ ކަމަށް ލަފާކުރެވޭ ކަމަށް، ދުނިޔޭގެ މޫސުމާބެހޭ އިދާރާ (ޑަބްލިޔުއެމްއޯ)ގެ އިންޓަރނޭޝަނަލް ކްލައިމެޓް ސަރވިސަސްގެ އިސްވެރިޔާ، ކްރިސް ހެވިޓް ދެއްވި އިންޒާރެވެ.

ނިމިގެން ދިޔަ ޖުލައި މަހުގެ ކުރީކޮޅު، ޑަބްލިޔުއެމްއޯއިން ވަނީ ޓްރޮޕިކަލް ފެސިފިކް ސަރަހައްދުގައި އެލް ނީނޯގެ އަސަރުތައް އުފެދެމުންދާކަމުގެ އިންޒާރު ދީފައެވެ. މިއީ މިދިޔަ 7 ދުވަހުގެ ތެރޭގައި ޓްރޮޕިކަލް ޕެސިފިކް ސަރަހައްދުގައި އެލް ނީނޯ އުފެދުނު ފުރަތަމަ ފަހަރެވެ. އެލް ނީނޯގެ އަސަރުތަކާއެކު، މުޅި ދުނިޔޭގެ ފިނިހޫނުމިން މައްޗަށް ދެއެވެ. މޫސުމީ ގޮތުން ބަދަލުތައް ގެނުވައެވެ.

އެލް ނީނޯއަކީ ގުދުރަތީގޮތުން އުފެދޭ މޫސުމީ ހަރަކާތެކެވެ. އެލް ނީނޯގެ ހާލަތު މެދުވެރިވުމާއެކު، ޓްރޮޕިކަލް ޕެސިފިކްގެ މެދުތެރެއާއި އިރުމަތީ ސަރަހައްދުގެ ކަނޑުގެ މަތީ ފަށަލައިގެ ފިނިހޫނުމިން މައްޗަށް ދެއެވެ. އެލް ނީނޯ އުފެދުމަށް 2 އަހަރާ 7 އަހަރާ ދެމެދުގެ މުއްދަތެއް ހޭދަވާއިރު، އުފެދޭ އެލް ނީނޯގެ އަސަރު 9 މަހާ 12 މަހާ ދެމެދު މުއްދަތަކަށް ދެމިގެން ދެއެވެ. އެލް ނީނޯއާއެކު އަންނަ މޫސުމީ ބަދަލުތަކުގެ ތެރޭގައި، އާންމު ގޮތެއްގައި ހިކި، ހަނަފަސް ސަރަހައްދުތަކުގައި ފެން ބޮޑުވާއިރު، އާންމު ގޮތެއްގައި ވާރޭވެހޭ ތެތް ބިންތަކަށް ހަނަފަސްކަން ކުރިމަތިވުން ކަހަލަ ކަންކަން ހިމެނެއެވެ.

ޑަބްލިޔުއެމްއޯގެ އެންމެ ފަހުގެ މަޢުލޫމާތާއި ދާއިރާގެ ތަޖުރިބާކާރުންގެ އިރުޝާދަށް ބަލާއިރު، މި ހިނގާ 2023 ވަނަ އަހަރުގެ ބާކީ އޮތް ދުވަސްތަކުގެ މުއްދަތަށް އެލް ނީނޯގެ އަސަރުތައް ދެމިގެންދާނެ ކަމަށް ބެލެވެއެވެ. އަދި އެލް ނީނޯގެ އަސަރުގެ ބާރު އުޅޭނީ މެދުމިންވަރެއްގައި ކަމަށްވެސް ވަނީ ލަފާކޮށްފައެވެ.

މި ދުވަސްވަރަކީ މިހާރުވެސް ދުނިޔޭގެ އެކި ކަންކޮޅުތަކަށް މޫސުމީ ނޭދެވޭ ބަދަލުތަކެއް ކުރިމަތިވެ، ދަނޑުވެރިކަމަށް ބޮޑެތި ގެއްލުންތަކެއް ވެގެން ރިޕޯޓް ކުރަމުންދާ ދުވަސްވަރެކެވެ. މޫސުމީ ނޭދެވޭ ބަދަލުތަކުން ކުރާ ސީދާ އަސަރާއި ނުސީދާ އަސަރުތައް ހުންނައިރު، ގަދަ ހޫނުގެ ކޮޅިގަނޑެއް ކަމުގައި ވިއަސް، ނުވަތަ ގަދަ ވިއްސާރައިގެ ކޮޅިގަނޑެއް ކަމުގައި ވިއަސް، ނުބެދޭ މީހަކު މަދެވެ. ނެތޭވެސް ދެންނެވިދާނެއެވެ. މޫސުމީ ނޭދެވޭ ބަދަލުތަކަށް އަހުލުވެރިވުމަށް މަސައްކަތް ކުރަން ޖެހިފައި ވަނީ އިންތިހާ ހަލުއި ދުވެލީގައެވެ. ދިރިއުޅުމުގެ ޒަމާންވީ އާދަތަކަށް ބަދަލު ގެންނަން މަޖުބޫރު ވަނީ އެކަމަށް ރަނގަޅަށް ތައްޔާރުވެސް ނުވެވި ތިއްބައެވެ.