ރައީސް ސާލިހުގެ ފުރަތަމަ 5 އަހަރު ނިމޭއިރު މިރާއްޖޭގައި ނަޖިސް ފެން ބޭނުންކުރަން ޖެހޭނެ ރައްޔިތެއް ނުހުންނާނެ: މިނިސްޓަރު ޝާހިދު
141 ރަށުގައި ފެނާއި ނަރުދަމާގެ ނިޒާމުގެ މަޝްރޫއު ކުރިއަށްދޭ
ފޮރިން މިނިސްޓަރު އަބްދުﷲ ޝާހިދު ވާހަކަފުޅު ދައްކަވަނީ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ފުރަތަމަ 5 އަހަރުގެ ދައުރު ނިމޭއިރު ނަޖިސް ފެން ބޭނުންކުރަން ޖެހޭނެ ރައްޔިތެއް މި ގައުމުގައި ނުހުންނާނެ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
ބުދަ ދުވަހުގެ ރޭ ހދ.ހަނިމާދޫގައި ކުރިއަށްގެންދިޔަ އުފާވެރި އަމާން ރާއްޖެ ކެމްޕޭން ޖަލްސާގައި މިނިސްޓަރު ޝާހިދު ރައީސް ސާލިހު ވެރިކަމާއި ހަވާލުވެވަޑައިގެންނެވި ފަހުން ދިވެހިރާއްޖޭގައި މީހުން ދިރިއުޅޭ ކޮންމެ ރަށެއްގައި ފެނާއި ނަރުދަމާ ނިޒާމު ގާއިމްކޮށްދިނުމުގެ މަސައްކަތްތައް ކުރާ ކަމަށެވެ. ނަޖިސް ފެނުން ރައްޔިތުން ސަލާމަތް ކުރުމަށް ކުރަމުންދާ މަސައްކަތުގެ ދަށުން 141 ރަށުގައި ފެނާއި ނަރުދަމާގެ ނިޒާމުގެ މަޝްރޫއު، 152 ރަށުގައި ބަނދަރުގެ މަޝްރޫއު އަދި 150 ރަށުގައި ކަރަންޓުގެ ޚިދުމަތުގެ ފެންވަރު ރަނގަޅުކުރުމުގެ މަސައްކަތްތައް ކުރިއަށްދާކަން ޝާހިދު ފާހަގަކުރެއްވިއެވެ.
ޝާހިދު ވިދާޅުވީ ރައީސް ސާލިހުގެ މި 5 އަހަރުގެ ނިމޭއިރު، ނަޖިސް ފެނުން ފެންވަރާ އަދި އެ ފެން ބޯން ޖެހޭ ރައްޔިތެއް މިރާއްޖޭގައި ދިރިނޫޅޭނެ ކަމަށެވެ. ރާއްޖެއަށް ގެންދެމުންދާ ތަރައްގީއާއެކު މިއަދު ހުރިހާ ރައްޔިތުން ވެސް ބޭނުންވަނީ އުފާވެރި އަމާން ރާއްޖެއަށް ދިއުމަށް ކަމަށް ޝާހިދު ވިދާޅުވިއެވެ. އަދި ވިދާޅުވީ ބޮޑުތިލަދުންމަތިން ވެސް ރައީސް ސާލިހު ބޮޑުކޮށް ހޮވާނެ ކަމަށެވެ.
ބޮޑުތިލަދުންމަތީގެ ތަރައްގީއަށް އިޝާރާތްކުރައްވައި ޝާހިދު ވިދާޅުވީ މިސަރަހައްދަށް ވެސް ހަގީގީ ތަރައްގީ ގެނެސްދެއްވި ރައީސްއަކީ ރައީސް ސާލިހު ކަމަށެވެ. ރައްޔިތުން ބޭނުންވާ ގޮތަށް ތަރައްގީ ލިބެމުންދިޔައީ 75 އަހަރު ފަހުން ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ތަރައްގީގެ މަޝްރޫއުތަކާއެކު މީހުން ބިނާ ކުރުމުގެ މަސައްކަތްތައް ކުރިއަށްދާ ކަމަށެވެ. އެގޮތުން މިއަދު ވެސް 1200 އަށްވުރެ ގިނަ ދަރިވަރުން ހިލޭ ޑިގްރީގައި ކިޔެވަމުންދާ ކަމަށެވެ. މިހުރިހާ ސަބަބަކާއި ގުޅިގެން މިއަދު ރައްޔިތުން ދާން ބޭނުންވަނީ އުފާވެރި އަމާން ރާއްޖެއަށް ކަމަށް ޝާހިދު ވިދާޅުވިއެވެ.
