މިލަންދޫގައި ކުރިއަށްގެންދާ މަޝްރޫއުތަކަށް ގާތްގަނޑަކަށް 160 މިލިއަންއަށްވުރެ ގިނަ ރުފިޔާ ހޭދަވާނެ: އާޒިމް

ށ.މިލަންދޫގައި ކުރިއަށްގެންދާ މަޝްރޫއުތަކަށް ގާތްގަނޑަކަށް 160 މިލިއަންއަށްވުރެ ގިނަ ރުފިޔާ ހޭދަވާނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.

އެރަށުގައި މަސައްކަތްތައް ކުރިއަށްދާ ގޮތް ބައްލަވާލެއްވުމަށްފަހު މީޑިއާތަކަށް މައުލޫމާތު ދެއްވަމުން އާޒިމް ވިދާޅުވީ މިލަންދޫ ބަނދަރު ބޮޑު ކުރުމުގެ މަސައްކަތްތައް ކުރިއަށްދާ ކަމަށާއި، އެއީ 75 މިލިއަން ރުފިޔާގެ މަޝްރޫއެއް ކަމަށެވެ. އަދި މަސައްކަތްތައް ބާރު ސްޕީޑްގައި ކުރިއަށްދާ ކަމަށާއި، ޝޯ ޕްރޮޓެކްޝަންގެ މަސައްކަތް ނިމިގެންދާއިރު، ރައްޔިތުން މޫދަށް އެރޭނެ ހިތް ފަސޭހަ ބީޗެއް ގާއިމްކޮށްދޭނެ ކަމަށް އާޒިމް ވިދާޅުވިއެވެ.

ރައްޔިތުން ބޭނުންވާ ގޮތަށް މަޝްރޫއުތައް ކުރިއަށްގެންދަވާނެކަން ފާހަގަކުރައްވައި އާޒިމް ވިދާޅުވީ ސަރުކާރުގެ ސިޔާސަތަކީ ހުރިހާ ރައްޔިތުން ހިތްހަމަޖެހޭ ގޮތަށް މަސައްކަތް ކުރުން ކަމަށާއި، ރައްޔިތުން ބޭނުންވާ ފެންވަރަށް މަސައްކަތް ކުރާނެ ކަމަށެވެ. އަދި ވިދާޅުވީ މިމަޝްރޫއުތައް ވެސް އަންނަ އަހަރުގެ ތެރޭގައި ނިންމާ ރައްޔިތުންނާއި ހަވާލުކުރުމަށް މަސައްކަތް ކުރަމުންދާ ކަމަށެވެ.

ބަނދަރު މަޝްރޫއުގެ ދަށުން މިލަންދޫގައި މިހާރު އޮތް ބަނދަރުން 17900 ކިއުބިކް މީޓަރުގެ ސަރަޙައްދެއް ފުންކޮށް، 70400 ކިއުބިކް މީޓަރުގެ އައު ބަނދަރެއް ފުންކުރުމަށްވަނީ ހަމަޖެހިފައެވެ. އަދި 8400 ކިއުބިކް މީޓަރުގެ ސަރަހައްދުގެ ނެރު ފުންކޮށް 93 މީޓަރުގެ ރިވެޓްމަންޓެއް ޖެހުމަށްވަނީ ހަމަޖެހިފައެވެ. މިލަންދޫ ބަނދަރުގެ އިތުރުން އެރަށަށް ކުރިމަތިވެފައިވާ ރަށްގިރުމުގެ މައްސަލަ ހައްލުކުރުމަށް ގޮނޑުދޮށް ހިމާޔަތްކުރުމުގެ މަސައްކަތް ވެސް އެމްޓީސީސީން ދަނީ ކުރަމުންނެވެ. އެގޮތުން މިލަންދޫ އިރުމަތީ ފަރާތުގެ ގޮނޑުދޮށް 954.43 މީޓަރ ސަރަހައްދެއްގައި ބޮޑުހިލައިގެ ރިވެޓްމަންޓެއް ގާއިމުކޮށް ރިވެޓްމަންޓުގެ ދެކޮޅުގައި 44.77 މީޓަރ ބޮޑު ހިލައިގެ ދެ ފައިކަށި ބެހެއްޓުން ހިމެނެއެވެ.

މިލަންދޫ ގޮނޑުދޮށް ހިމާޔަތްކުރުމުގެ މަޝްރޫއަކީ 34.6 މިލިއަން ރުފިޔާގެ މަޝްރޫއެކެވެ.