ކުރިއަށް އޮތް ރިޔާސީ އިންތިހާބުގައި، އެމަނިކުފާނުގެ ރަނިންގމޭޓް މިރޭ ނުވަތަ މާދަމާ އިއުލާންކުރައްވާނެކަމަށް އެމްޑީޕީއާއި ގުޅިފައިވާ ޕާޓީތަކުގެ ކޯލިޝަންގެ ރިޔާސީ ކެންޑިޑޭޓް، ރައީސް އިބްރާހިމް މުހައްމަދު ޞާލިހް ވިދާޅުވެއްޖެއެވެ.

ހއ. އަތޮޅުގެ ރަށްތަކަށް ކުރެއްވި ދަތުރުފުޅު ނިންމަވާލެއްވުމަށްފަހު، ހދ. ހަނިމާދޫއަށް ވަޑައިގެން ނޫސްވެރިންނާއި ބައްދަލުކުރައްވާ ރައީސް ވިދާޅުވީ އެމަނިކުފާނު ނިންމަވައިގެން ހުންނެވީ މިރޭ ނުވަތަ މާދަމާ ފައިނަލް ޑިސިޝަނެއް ނިންމަވަން ކަމަށެވެ. ރައީސް ވިދާޅުވީ ބުރާސްފަތި ނުވަތަ ހުކުރު ދުވަހު ރިޔާސީ އިންތިހާބުގައި ވާދަކުރެއްވުމަށް ރަސްމީކޮށް ފޯމް ހުށަހަޅުއްވާނެ ކަމަށެވެ.

ރައީސް ވިދާޅުވީ ރަނިންގމޭޓެއް އަދި ކަނޑަނާޅުއްވާ ކަމަށާއި، ނަންތަކެއް އެމަނިކުފާނުގެ އަތްޕުޅުގައި އެބަހުރި ކަމަށެވެ. އަދި އެކަން ނިންމަވާނީ އެންމެންގެ ތެރޭގައި މަޝްވަރާކުރެއްވުމަށްފަހުގައި ކަމަށެވެ. ރައީސް ވިދާޅުވީ ނައިބްރައީސް ފައިސަލް ނަސީމަށް ވެސް ފުރުސަތު އެބަ އޮތް ކަމަށާއި، އައު ބޭފުޅުން ވެސް އެބަތިއްބެވި ކަމަށާއި، މަސައްކަތް ކުރައްވަމުން ގެންދަވަނީ ކޯލިޝަނަކާ އެކީގައިކަމުން ކޯލިޝަންގެ މަޝްވަރާވެސް މިކަމުގައި އޮންނާނެކަމަށެވެ.

މިހާރު ކޯޓަށް ހުށަހެޅިފައިވާ ކުރީގެ ރައީސް އަބްދުﷲ ޔާމީންގެ ކެންޑިޑަސީ މައްސަލަ ޔާމީނާ އެއްކޮޅަށް ނިމިއްޖެނަމަ ގޮންޖެހުމަކަށް ވާނެތޯ ސުވާލުކުރުމުން، ރައީސް ވިދާޅުވީ ރަގަޅު ގޮތަކީ ރިޔާސީ އިންތިހާބުގައި ވާދަކުރަން ބޭނުންވާ، ޝަރުތުހަމަވާ އެންމެންނަށް އެ ފުރުސަތު ލިބިގެންދިއުން ކަމަށެވެ.

ޕީޕީއެމް ވާދަކުރިނަމަވެސް އެއީ އިންތިހާބު ކާމިޔާބުކުރުމަށް އޮތް ޗެލެންޖެއް ކަމަށް ދެކެވަޑައި ނުގަންނަވާ ކަމަށާއި، އެއަށްވުރެ ބޮޑަށް މި ސަރުކާރު ރައްޔިތުން ބަލައިގަނެފައިވާ ކަމަށެވެ. އެދިވަޑައިގަންނަވަނީ ޕީޕީއެމުން ލަސްނުކުރައްވާ ކެންޑިޑޭޓަކާއެކީގައި ނުކުމެވަޑައިގެން ކެމްޕޭން ފެއްޓެވުން ކަމަށާއި، ރަށްރަށުން އެހެން ޕާޓީތަކުގެ ކެމްޕޭން ފެނިވަޑައި ނުގަންނަވާ ކަމަށެވެ.

އިންތިހާބު ކާމިޔާބުކުރަން ބޭނުންވާނަމަ ރައްޔިތުންނާއި ކައިރިއަށްދާންޖެހޭ ކަމަށާއި، އެހެންބަޔަކު އެކަންކުރާތަން ފެނިވަޑައިނުގަންނަވާ ކަމަށެވެ.