މައި އާސަންދަގެ ނަމުގައި ވެބް ޕޯޓަލްއެއް ތައާރަފުކޮށް، އާސަންދައިގެ ހުރިހާ ޚިދުމަތެއް އޮންލައިންކޮށް ލިބޭ އިންތިޒާމު އާސަންދަ ކުންފުނިން ހަމަޖައްސައިފިއެވެ.
އާސަންދަ އިން ބުނީ މި ޕޯޓަލް ތައާރަފުކުރުމުން އެ ސްކީމްގެ ތެރެއިން ރާއްޖެއިން ބޭރުން ފަރުވާ ހޯދުމަށް ޑޮކްޓަރު ފުރައިދޭ ރެކޮމެންޑޭޝަން ފޯމު، މި މަހު 15ން ފެށިގެން ބަލައިގަންނާނީ އެ ޕޯޓަލް މެދުވެރިކޮށް އެކަނި ކަމަށެވެ.
އާސަންދައިން ދޭ އިތުރު ހިދުމަތްތައް ވެސް ދެން ލިބޭނީ ޕޯޓަލް މެދުވެރިކޮށް ކަމަށް އެކުންފުނިން ބުންޏެވެ. އެގޮތުން ޑޮކްޓަރުންނަށް ރެކޮމެންޑޭޝަން ފޯމު ޕޯޓަލްގެ ތެރެއިން ފުރައިދެވޭނެ ކަމަށާއި އާސަންދައިގެ އިތުރުން ވެލްފެއާގެ އެހީތެރިކަމަށް އެދި ހުށަހަޅާ ލިޔެކިޔުންތައް ވެސް ޕޯޓަލް މެދުވެރިކޮށް ހުށަހެޅޭނެ ކަމަށް ވަނީ ބުނެފައެވެ. އަދި އެޕްލިކޭޝަންގެ ސްޓޭޓަސް ޕޯޓަލް އިން ބެލޭއިރު އެޕްލިކޭޝަން ކުރިއަށް ގެންދިއުމަށް އިތުރު ލިޔެކިޔުން ބޭނުންވާ ނަމަ، ޕޯޓަލްގެ ތެރެއިން ހުށަހެޅޭނެއެވެ. ޕޯޓަލް އަށް އީފާސް މެދުވެރިކޮށް ލޮގިން ވެވޭނެއެވެ.
އާސަންދައިގެ ކައުންޓަރަށް ނުވަތަ "ވީރާ" ކައުންޓަރަށް ދެން ކޮންމެހެން ދާން ނުޖެހޭނެ ކަމަށާއި އެހެންނަމަވެސް އެ ތަންތަން މެދުވެރިކޮށް ހިދުމަތް ހޯދުމަށް ބޭނުންވާނަމަ، އެ ފުރުސަތު ދޭނެ ކަމަށް އެކުންފުނިން ބުންޏެވެ.
އާސަންދައިގެ ތަފާސްހިސާބުތަކުން ދައްކާ ގޮތުގައި މި އަހަރުގެ މިހާތަނަށް ބޭސްފަރުވާއަށް ރާއްޖެއިން ބޭރަށް 532 ފޮނުވާފައިވެއެވެ. އާސަންދަ ސްކީމްގެ ދަށުން ރާއްޖެ އާއި ރާއްޖެއިން ބޭރުން ފަރުވާ ހޯދަން ކޮންމެ ދުވަހަކު ވެސް ގިނަ ބަޔަކު އެދެއެވެ.
