މާނޭ އަލް ނަސްރަށް ސޮއިކޮށްފި

ބަޔާން މިއުނިކަށް ކުޅެމުން އައި ސެނެގާލްގެ ސަޑިއޯ މާނޭ އެ ކުލަބު ދޫކޮށް ސައުދީ ޕްރޯ ލީގުގެ އަލް ނަސްރަށް ސޮއިކޮށްފި އެވެ.

އަލް ނަސްރަށް ބަދަލުވުމުގެ ކުރިން ފުރިހަމަ ކުރަން ޖެހޭ މެޑިކަލްގެ ކަންކަން ފުރިހަމަ ކުރުމަށްފަހު، މާނޭ އެ ކުލަބަށް ސޮއިކޮށްފައި ވަނީ އަންގާރަ ދުވަހުގެ ވަގުތެއްގަ އެވެ. ލިވަޕޫލް ދޫކޮށް މާނޭ ބަޔާނަށް ބަދަލުވީ 2022 ވަނަ އަހަރު އެވެ. އެ ކުލަބާއެކު މާނޭ ސޮއިކުރި އެއްބަސްވުމުގެ މުއްދަތު ހަމަވާން އޮތީ 2025 ވަނަ އަހަރުގެ ޖޫން މަހުގެ ނިޔަލަށެވެ. އަލް ނަސްރާއެކު މާނޭ ސޮއިކޮށްފައި ވަނީ ހަތަރު އަހަރުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ. އަލް ނަސްރުގައި މާނޭ ބޭނުކުރާނީ 10 ނަންބަރު ޖާޒީ އެވެ.

އަލް ނަސްރުގެ މެޑިކަލް ކަންކަން ފުރިހަމަ ކުރުމަށްފަހު ވާހަކަ ދައްކަމުން މާނޭ ބުނީ، ބަޔާން ދޫކޮށްލުމަށް ނިންމި ނިންމުމަކީ އޭނާ އަށް ހިތްދަތި ނިންމުމެއް ކަމަށެވެ. މާނޭ ބުނި ގޮތުގައި ބަޔާންގެ ނިމުން އޭނާ އުންމީދު ކުރީ މިފަދަ ގޮތަކަށް ނޫނެވެ. އިތުރަށް ވާހަކަ ދައްކަމުން މާނޭ ބުނީ ކުރިއަށް އޮތް ސީޒަނުގައި އޭނާ އަށް ބަޔާނަށް އެހީތެރިވެދެވެނޭކަން ވެސް އެނގޭ ކަމަށާއި، ނަމަވެސް މިހާރު އެދެނީ ބަޔާން އާއި ބަޔާންގެ ސަޕޯޓަރުންނަށް އެންމެ ފުރިހަމަ ކާމިޔާބަށް ކަމަށެވެ. އެއަށްފަހު މިހާރު އޭނާ ފޯކަސް ކުރަނީ އަލް ނަސްރާއެކު ފަށަން އުޅޭ މަސައްކަތަށް ކަމަށް ވެސް މާނޭ ވަނީ ބުނެފަ އެވެ.

އަލް ނަސްރުގައި މާނޭ އާއެކު ކުޅޭނެ މަޝްހޫރު ކުޅުންތެރިންގެ ތެރޭގައި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ، ސެކޯ ފޮފާނާ، މާސެލޯ ބްރޮޒޮވިޗް އަދި އެލެކްސް ޓެލާސް ފަދަ ކުޅުންތެރިން ހިމެނެ އެވެ. އަލް ނަސްރުގެ އިތުރުން ސައުދީ ޕްރޯ ލީގުގެ އެހެން ކުލަބުތަކުން ވެސް އަންނަނީ ޔޫރަޕުގެ މަޝްހޫރު ކުޅުންތެރިން ހޯދަމުންނެވެ.