ޖިންސީ ގޯނާގެ މައްސަލައެއްގައި ޑެނީ އަލްވޭސްގެ މައްޗަށް ދައުވާކުރަން ނިންމައިފި

ބްރެޒިލްގެ ފުޓުބޯޅަ ކުޅުންތެރިޔާ ޑެނީ އަލްވޭސްގެ މައްޗަށް، ޖިންސީ ގޯނާކުރުމުގެ ތުހުމަތުގައި ދައުވާ ކުރަން ނިންމައިފިއެވެ.

މިދިޔަ ޑިސެމްބަރު މަހުގެ 30 ވަނަ ދުވަހު ބާސެލޯނާގެ ނައިޓް ކްލަބެއްގައި އަންހެނަކަށް ޖިންސީ ގޯނާ ކުރިކަމުގެ ތުހުމަތުގައި، ޖެނުއަރީ މަހުން ފެށިގެން ބަންދުގައި ހުރި އަލްވޭސްގެ މައްޗަށް، ކުށްކުރި ކަމުގެ ހެކި ހޯދައި، ތަހުގީގު ވަނީ ވަގުތީގޮތުން ނިންމާލާފައެވެ. ގާޒީގެ ނިންމުން ބުދަ ދުވަހު ކޯޓުގައި އެންގުމުން އަލްވޭސްގެ މައްޗަށް ރަސްމީކޮށް ދައުވާ އުފުލާނެއެވެ. އެއަށްފަހު ޕްރޮސެކިއުޓަރުން ދައުވާތައް ބަޔާންކޮށް، މިއަހަރުގެ ފަހުކޮޅު ނުވަތަ 2024 ވަނަ އަހަރުގެ ކުރީކޮޅު ޝަރީއަތުގެ ތާރީހެއް ކަނޑައަޅާނެއެވެ.

ބާސެލޯނާގެ ކުރީގެ ޑިފެންޑަރު ވަނީ ކުށަށް އިންކާރުކޮށް، ތުހުމަތުކުރާ ފަރާތާއެކު ޖިންސީ ގުޅުން ހިންގުމަކީ ރުހުމުގައި ކުރި ކަމެއް ކަމަށް ބުނެފައެވެ. ނަމަވެސް އޭނާގެ ވަކީލުންގެ ބަހެއް ހޯމަ ދުވަހު ލިބޭގޮތެއް ނުވެއެވެ. ޝަރީއަތުގެ އިންތިޒާރުގައި އަލްވޭސް ޖަލުގައި ހުންނާނެ ކަމަށް ބެލެވޭއިރު، އޭނާއަކީ ފްލައިޓް ރިސްކެއް ކަމަށް ބެލެވޭތީ އޭނާގެ ކަފާލާތުގެ އެދުމަށް ވަނީ އިންކާރުކޮށްފައެވެ. އަލްވޭސް ހުށަހެޅީ ޕާސްޕޯޓް އަނބުރައި ދިނުމަށާއި، ޓްރެކިންގ ޑިވައިސް އެޅުމަށެވެ.

އަލްވޭސް ޖަލަށް ލުމަށް ގާޒީ އަމުރުކުރެއްވީ ކަމާބެހޭ ފަރާތްތަކުން ކުރި އިބްތިދާއީ ތަހުގީގާއި، ތުހުމަތު ކުރެވޭ ވިކްޓިމްއާއި ހެކިންނާއި އަލްވޭސްގެ ހެކިބަސް އަޑުއެހުމަށްފަހުއެވެ. އަލްވޭސްއާއި ވިކްޓިމް ނައިޓްކްލަބްގައި އެކަކު އަނެކަކާ ފްލަރޓްކުރާ މަންޒަރު ފެންނަ ސެކިއުރިޓީ ކެމެރާ ފުޓޭޖް އަލްވޭސްގެ ވަކީލުން ހުށަހެޅިނަމަވެސް، ކާމިޔާބުވާގޮތެއް ނުވިއެވެ. ކޯޓުން ބުނެފައި ވަނީ ފްލަރޓް ކުރުމަކީ "އެއްވެސް ގޮތަކުން ޖިންސީ ގޯނާއެއް ޖަސްޓިފައިކޮށްގެން ނުވާނެ" ކަމެއް ކަމަށެވެ.

މިދިޔަ އަހަރު ފާސްކުރި ސްޕެއިންގެ "ސެކްޝުއަލް ކޮންސެންޓް ލޯ"ގެ ދަށުން، އޮންލައިންކޮށް ގޯނާކުރުމާއި ރޭޕްކުރުން ފަދަ ބޮޑެތި ކުށްތައް ޖިންސީ ގޯނާގެ ކުށްތަކުގެ ތެރޭގައި ހިމެނެއެވެ. ރޭޕްގެ މައްސަލައެއްގައި ގިނަވެގެން 15 އަހަރުގެ ޖަލު ހުކުމެއް އަންނާނެއެވެ.

އުމުރުން 40 އަހަރުގެ އަލްވޭސް ވަނީ ބާސެލޯނާއާއެކު ތިން ޗެމްޕިއަންސް ލީގު އަދި ބްރެޒިލާއެކު ދެ ކޮޕާ އެމެރިކާ ހިމެނޭހެން ޖުމްލަ 42 ތަށި ކާމިޔާބުކޮށްފައެވެ. އޭނާ ވަނީ މިދިޔަ އަހަރު ގަތަރުގައި ބޭއްވި ވޯލްޑް ކަޕްގައި ވެސް ކުޅެފައެވެ.