ޑެނީލޯ ހޯދުމުގެ ރޭހުގައި ޗެލްސީ ވެސް ބައިވެރިވެއްޖެ

ރެއާލް މެޑްރިޑަށް ކުޅެމުން އަންނަ ބްރެޒިލްގެ ޑިފެންޑަރު ޑެނީލޯ ހޯދުމުގެ ރޭހުގައި ޗެލްސީ ވެސް ބައިވެރިވެއްޖެ ކަމަށް ރިޕޯޓްތައް ބުނެފި އެވެ.

މަޝްހޫރު ކުޅިވަރު ނޫހެއް ކަމަށްވާ މާސާ އިން ބުނީ ޑެނީލޯ ހޯދުމުގެ ރޭހުގައި ޔުވަންޓަސްގެ އިތުރުން ޗެލްސީ ވެސް ބައިވެރިވެފައިވާ ކަމަށާއި، 35 މިލިއަން ޔޫރޯއަށް އޭނާ ވިއްކާލަން ރެއާކް އިން ތައްޔާރަށް އޮތް ކަމަށެވެ.

ޔުވަންޓަސްގައި ޑެނީ އަލްވޭސް ރިޕްލޭސް ކުރުމަށް ޑެނީލޯ ގެންނަން މަސައްކަތްކުރާއިރު، އާސެނަލް އިން ވެސް އަންނަނީ އޭނާ ހޯދުމަށް މަސައްކަތްކުރަމުންނެވެ. އެހެން ނަމަވެސް މާސާ އިން ބުނީ ޑެނީލޯ ބޭނުން ވަނީ ރެއާލްއާ އެކު ކާމިޔާބީ ހޯދުމަށް އެޓީމުގައި މަޑުކުރަން ކަމަށެވެ.

މި ސީޒަނުގައި ރެއާލްގެ ފުރަތަމަ އެގާރައިން ޑެނީލޯއަށް ޖާގަ ލިބުން މަދުވިއިރު، އޭނާ ކުރިޔަށް އޮތް ސީޒަނަށް އެހެން ކްލަބަކަށް ބަދަލުވާނެ ކަމަށް ބެލެވުނެވެ. އެހެންނަމަވެސް ރިޕޯޓްތައް ބުނާ ގޮތުން ޑެނީލޯ ބޭނުން ވަނީ ރެއާލްގައި މަޑުކޮށް ފުރަތަމަ އެގާރައިން ޖާގަ ހޯދުމަށް މަސައްކަތްކުރަންށެވެ.

އާސެނަލް އިން އެޓީމުގެ މިޑްފިލްޑަރު ހެކްޓާ ބެލެރިން ބާސާއަށް ވިއްކާލުމަށް ފަހު ޑެނީލޯ ގެންނަން އުޅޭ ކަމަށް ރިޕޯޓްތައް ބުނަމުން އަންނައިރު، ބާސާއަށް ބެލެރިން ބަދަލުވުމާ ގާތަށް ވަނީ އައިސްފައެވެ. އެހެންނަމަވެސް އެ މަގާމަށް ޑެނީލޯ ނޫން އެހެން ކުޅުންތެރިޔަކު ގެންނާނެ ކަމަށް ބެލެވެއެވެ.

ޕޯޗުގަލްގެ އެފްސީ ޕޯޓޯ ދޫކޮށްލުމަށް ފަހު، 2015 ވަނަ އަހަރު ރެއާލްއާ ގުޅުނު ޑެނިލޯވަނީ ފާއިތުވެދިޔަ ދެ ސީޒަނުގައި އެޓީމަށް ކުޅުނު 54 މެޗުގައި ތިން ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ އެޓީމާއެކު ޔުއެފާ ޗެމްޕިއަންސް ލީގު، ޔުއެފާ ސުޕާކަޕް އަދި ފީފާ ކްލަބް ވޯލްޑްކަޕް ވެސް ކާމިޔާބުކޮށްފައެވެ.