ލިވަޕޫލަށް ކުޅެމުން އައި ބްރެޒިލްގެ ޑިފެންސިވް މިޑްފީލްޑަރު ފަބީނިއޯ ސައުދީ ޕްރޯ ލީގުގެ އަލް އިއްތިހާދަށް ބަދަލުވެއްޖެ އެވެ.

ލިވަޕޫލާއެކު އޭނާ ސޮއިކޮށްފައިވާ އައު އެއްބަސްވުމުގެ މުއްދަތު ހަމަވާން ބާކީ ތިން އަހަރު އެބަ އޮތެވެ. މީގެ ކުރިން 2021 ވަނަ އަހަރު އޭނާ ވަނީ އިތުރު ފަސް އަހަރު އެ ކުލަބުގައި މަޑު ކުރުމަށް އެއްބަސްވުން އައު ކޮށްފަ އެވެ. ލިވަޕޫލް ދޫކޮށް އޭނާ އަލް އިއްތިހާދަށް ބަދަލުވީ ތިން އަހަރު ދުވަހުގެ އެއްބަަސްވުމެއްގެ ދަށުންނެވެ. އެ ކުލަބާއެކު އޭނާ ސޮއިކުރި އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. ފަބީނިއޯ ހޯދުމަށް އަލް އިއްތިހާދުން ވަނީ 40 މިލިއަން ޕައުންޑު ހޭދަކޮށްފަ އެވެ. މިއީ ލިވަޕޫލް ދޫކޮށް ސައުދީ ޕްރޯ ލީގަށް ބަދަލުވި ދެ ވަނަ ކުޅުންތެރިޔާ އެވެ. ފަބީނިއޯގެ ކުރިން އެ ޓީމުގެ ކެޕްޓަން ޖޯޑަން ހެންޑަސަން ވެސް ވަނީ ސައުދީ ލީގުގެ އަލް އިއްތިފާގަށް ސޮއިކޮށްފަ އެވެ.

މޮނާކޯ ދޫކޮށް ފަބީނިއޯ ލިވަޕޫލަށް ބަދަލުވީ 2018 ވަނަ އަހަރު އެވެ. އޭގެ ފަހުން އޭނާ ވަނީ އެ ކުލަބަށް ކުޅެދިން 219 މެޗުގައި 11 ލަނޑު ޖަހައިފަ އެވެ. ލިވަޕޫލާއެކު ފަބީނިއޯ ވަނީ ޖުމުލަ ހަތް ތައްޓެއް ކާމިޔާބުކޮށްފަ އެވެ. އޭގެ ތެރޭގައި އިނގިރޭސި ޕްރިމިއާ ލީގު، އެފްއޭ ކަޕް، ކަރަބޯ ކަޕް، އެފްއޭ ކޮމިއުނިޓީ ޝީލްޑް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ހިމެނެ އެވެ. އުމުރުން 29 އަހަރުގެ ކުޅުންތެރިޔާ އަށް ބްރެޒިލް ޤައުމީ ޓީމުން ޖާގަ ލިބުނީ 2015 ވަނަ އަހަރު އެވެ. ޤައުމީ ޓީމަށް އޭނާ ވަނީ 29 މެޗެއް ކުޅެދީފަ އެވެ. ބްރެޒިލާއެކު ފަބީނިއޯ އެންމެ ފަހުން ކުޅެފައި ވަނީ މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕްގަ އެވެ.