ކުރިއަށް އޮތް ރިޔާސީ އިންތިހާބުގައި ވޯޓު ފޮށި ބަހައްޓަން ނިންމި ގައުމުތަކުގެ ތެރެއިން، ވޯޓު ފޮށި ބެހެއްޓޭނެކަން ކަށަވަރުވީ 2 ގައުމެއްގައި ކަމަށް އިލެކްޝަންސް ކޮމިޝަނުން ބުނެފިއެވެ.

ކުރިއަށް އޮތް ރިޔާސީ އިންތިހާބުގައި 8 ގައުމެއްގައި ވޯޓު ފޮށި ބަހައްޓަން ވަނީ ނިންމާފައެވެ. ނަމަވެސް ވޯޓު ފޮށި ބަހައްޓާނީ އެގައުމެއްގައި މަދުވެގެން 150 މީހުން ވޯޓުލާން ރަޖިސްޓްރީވުމުންނެވެ. ނަމަވެސް ރާއްޖޭން ބޭރުގައި ވޯޓުފޮށި ބެހެއްޓޭކަން މިހާތަނަށް ކަށަވަރުވެފައިވަނީ، މެލޭޝިޔާ އާއި އިނގިރޭސި ވިލާތުގައި އެކަނިއެވެ. އެހެން ޤައުމުތަކުގައި އަދި ވޯޓުފޮށި ބެހެއްޓޭވަރަށް ވޯޓުލާ މީހުން ރަޖިސްޓަރީ ވެފައިނުވާ ކަމަށް އިލެކްޝަނުން ބުނެއެވެ.

ވޯޓޫ ފޮށި ބަހައްޓާނެ ގައުމުތައް މި ފަހަރު އެހެން ފަހަރުތަކާ އަޅާ ބަލާއިރު އިތުރެވެ. 8 ގައުމުގައި ބަހައްޓަން ނިންމާފައިވާ އިރު، 6 ގައުމެއްގައި ވޯޓު ފޮށި ބެހެއްޓޭނެ އަދަދަށް ރަޖިސްޓްރީވެފައި ނުވެއެވެ. އެ ގައުމުތަކަކީ ސްރީ ލަންކާ، އިންޑިއާ، ޖަޕާން، ތައިލެންޑް، ޔޫއޭއީ އަދި ސިންގަޕޫރުގައެވެ.

އޮންލައިންކޮށް ރީ-ރަޖިސްޓްރީކުރުމުގެ މުއްދަތު 31 ވަނަ ދުވަހުގެ މެންދަމު 12:00 އާއި ހަމައަށް ހުޅުވާލާފައިވާއިރު، އެ ފުރުސަތުގެ ބޭނުން ހިފައި އަވަހަށް ރީ-ރަޖިސްޓްރީވުމަށް އިލެކްޝަންސް ކޮމިޝަނުން ވަނީ އެދިފައެވެ. ހާޒިރުވެގެން ފޯމު ހުށަހެޅޭނީ 5 އޮގަސްޓުގެ ހަވީރު 4:00 އާއި ހަމައަށެވެ. މި މުއްދަތުގެ ތެރޭގައި ރަޖިސްޓަރީވުމަށް އެދި ހުށަހަޅާނީ ރަޖިސްޓްރީވެފައިވާ ރަށް ނޫން އެހެން ތަނަކަށް ނުވަތަ ރަށަކަށް ރަޖިސްޓްރީވާން އެދޭ ފަރާތްތައް އެކަނި ކަމަށް އީސީން ބުނެއެވެ.

ކުރިއަށް އޮތް ރިޔާސީ އިންތިޚާބަށް ތައްޔާރުވުމުގެ މަސައްކަތްތައް އީސީން ކުރަމުންދާއިރު، ވީހާވެސް ގިނަ ރައްޔިތުންނަށް ވޯޓު ލެވޭނެ އިންތިޒާމް ހަމަޖެއްސުމުގެ މަސައްކަތްތައް ކޮމިޝަނުން ދަނީ ކުރަމުންނެވެ. އަދި ރިޔާސީ އިންތިޚާބަކީ އިންސާފުވެރި، ދެފުށް ފެންނަ އިންތިޚާބަކަށް ވެގެންދާނެ ކަމުގެ ޔަގީންކަން ކޮމިޝަނުން ދެއެވެ.

މިއަހަރު ބާއްވާ ރިޔާސީ އިންތިޚާބުގައި 282،755 މީހުންނަށް ވޯޓުލުމުގެ ޙައްގު ލިބިފައިވާ ކަމަށް އީސީން ހާމަކޮށްފައިވާއިރު އެންމެފަހުން 2018 ވަނަ އަހަރު ބޭއްވި ރިޔާސީ އިންތިޚާބުގައި ވޯޓުލުމުގެ ހައްގު ލިބިފައިވަނީ 263،000 މީހުންނަށެވެ.

މިއަހަރުގެ ރިޔާސީ އިންތިޚާބު އޮންނާނީ 9 ސެޕްޓެމްބަރުގައެވެ. އަދި ދެވަނަ ބުރެއް ބާއްވަން ޖެހިއްޖެނަމަ ބާއްވާނީ 30 ސެޕްޓެމްބަރުގައެވެ.