ރީ-ރަޖިސްޓްރީ ކުރަން މިހާތަނަށް ހުށަހެޅީ 11933 ފޯމު ކަމަށް އިލެކްޝަންސް ކޮމިޝަނުން ބުނެފިއެވެ.

އިލެކްޝަންސް ކޮމިޝަނުން ބުނީ ހޮނިހިރު ދުވަހުގެ ނިޔަލަށް ރީ- ރަޖިސްޓްރީ ކުރަން ހުށަހެޅީ 11933 ފޯމު ކަމަށާއި، މީގެ ތެރެއިން 8624 ފޯމު ލިބިފައިވަނީ އޮންލައިންކޮށް ކަމަށެވެ.

އިލެކްޝަންސް ކޮމިޝަނުން ވަނީ ވީހާ ވެސް އަވަހަކަށް ރީ-ރަޖިސްޓްރީ ކުރުމަށް އެދިފައެވެ. އިލެކްޝަންސް ކޮމިޝަނުން ބުނީ މިހާރު ރީ-ރަޖިސްޓަރީ ވެފައިވާ ފަރާތްތަކުގެ މަޢުލޫމާތު އީސީގެ ވެބްސައިޓުގައި ހާމަކުރުމުގެ އިތުރުން ސިޔާސީ ޕާޓީތަކާ ވެސް ޙިއްސާ ކުރެވެމުންދާ ކަމަށެވެ.

މިހާތަނަށް ލިބިފައިވާ 11933 ފޯމްގެ ތެރެއިން 9758 ފޯމް ވަނީ ބަލައިގަނެ ރީ-ރަޖިސްޓްރީކޮށްދީފައެވެ. 2138 ފޯމް ވަނީ ރިޖެކްޓް ކޮށްފައެވެ.

ސެޕްޓެމްބަރު 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި، ރަޖިސްޓްރީވެފައިވާ ތަން ނޫން އެެހެންތަނެއްގައި ވޯޓުލާނަމަ ރީ-ރަޖިސްޓްރީކުރަން ޖެހެއެވެ. އެ ފުރުސަތު ހުޅުވާލާފައިވަނީ 16 ޖުލައިގައެވެ. 21 ދުވަސް މިކަމަށް ކަނޑައަޅާފައިވާއިރު، މި މުއްދަތު ހަމަވާނީ އަންނަ މަހުގެ 5 ވަނަ ދުވަހަށެވެ. ނަމަވެސް އޮންލައިންކޮށް ރީރަޖިސްޓްރީކުރެވޭނީ މި މަހުގެ 31 ވަނަ ދުވަހުގެ ދަންވަރު 12:00 އަށެވެ.

އިލެކްޝަންސް ކޮމިޝަނުން ބުނީ މި ފަހަރުގެ އިންތިހާބުގައި ގާތްގަނޑަކަށް 30،000 އާއި 40،000 އާއި ދެމެދުގެ އަދަދަކަށް މީހުން ރީ-ރަޖިސްޓްރީކުރާނެކަމަށް ބެލެވޭ ކަމަށެވެ. ނަމަވެސް މިހާތަނަށް ރީ-ރަޖިސްޓްރީކޮށްފައިވަނީ 11933 މީހުން ކަމަށާއި، އެއީ ނިސްބަތުން މަދު އަދަދެއްކަމަށެވެ. މި މަހުގެ 31 ވަނަ ދުވަހުގެ ރޭގަނޑު 12:00 އާއި ހަމައަށް އޮންލައިންކޮށް ރީ-ރަޖިސްޓްރީވުމުގެ ފުރުސަތު ހުޅުވާލާފައިވާ އިރު، އެ ފުރުސަތުގެ ބޭނުން ހިފައިގެން ވީހާވެސް ގިނަ ބަޔަކު އޮންލައިންކޮށް ރީ-ރަޖިސްޓްރީވުމަށް އިލެކްޝަންސް ކޮމިޝަނުން އެދެއެވެ.

ހާޒިރުވެގެން ފޯމު ހުށަހެޅޭނީ 5 އޮގަސްޓުގެ ހަވީރު 4:00 އާއި ހަމައަށެވެ. މި މުއްދަތުގެ ތެރޭގައި ރަޖިސްޓަރީވުމަށް އެދި ހުށަހަޅާނީ ރަޖިސްޓްރީވެފައިވާ ރަށް ނޫން އެހެން ތަނަކަށް ނުވަތަ ރަށަކަށް ރަޖިސްޓްރީވާން އެދޭ ފަރާތްތައް އެކަނި ކަމަށް އީސީން ބުނެއެވެ. އީސީން ވަނީ ފަހު ވަގުތަށް މަޑުނުކޮށް ވީހާވެސް އަވަހަކަށް ރީ-ރަޖިސްޓްރޭޝަންގެ ކަންކަން ނިންމުމަށް އެދިފައެވެ.

ރީ ރަޖިސްޓްރޭޝަންގެ ފުރުސަތު މިހާރު ހުޅުވާލާފައިވާއިރު ލޯކަލް ކައުންސިލް އިންތިޚާބުގައި މާލޭގައި ވޯޓުލުމަށް ރަޖިސްޓްރީ ކުރި އެހެން ރަށްތަކުގެ މީހުން މިއަހަރުގެ ރިޔާސީ އިންތިޚާބުގައި ރަޖިސްޓްރީވެފައި އޮންނާނީ މާލޭގައެވެ. އެހެންކަމުން މި އިންތިޚާބުގައި ވެސް މާލެއަށް ވޯޓުލާ ފަރާތްތަކުން އަލުން ރަޖިސްޓްރީ ކުރަން ނުޖެހޭނެއެވެ. ނަމަވެސް މާލެ ނޫން އެހެން ރަށަކަށް މިފަހަރު ވޯޓުލާނަމަ އެ ފަރާތްތަކުން ވެސް އަލުން ރަޖިސްޓްރީވާން ޖެހޭނެއެވެ.

ލޯކަލް ކައުންސިލް އިންތިޚާބުގައި މާލެ ނޫން އެހެން ރަށްތަކުގައި ރަޖިސްޓްރީވެފައިވާ މީހުން މިއަހަރުގެ ރިޔާސީ އިންތިޚާބުގައި ރަޖިސްޓްރީވެފައި އޮންނާނީ އެ މީހެއްގެ ދާއިމީ އެޑްރެހުގައެވެ. މިއަހަރުގެ އިންތިޚާބުގައި ވޯޓުލުމަށް ރަޖިސްޓަރީވެފައިވާ ތަނުގެ މައުލޫމާތު ކޮމިޝަނުގެ ވެބްސައިޓް (www.elections.gov.mv) ގެ ޒަރިއްޔާއިން ޗެކްކުރެވޭނެއެވެ. މީގެއިތުރުން (VR space ID.No Send to 1414) އެސްއެމްއެސް ކޮށްގެން ވެސް ޗެކްކުރެވޭނެއެވެ.

ރީ ރަޖިސްޓަރީ ވުމަށް އެދި ފޯމު ހުށަހަޅާނީ އީސީގެ ރީ-ރަޖިސްޓްރޭޝަން ޕޯޓަލް މެދުވެރިކޮށް ނުވަތަ މާލޭ ފިޔަވައި މީހުން ދިރިއުޅޭ އެހެން ރަށްތަކުން އެރަށެއްގެ ކައުންސިލް އިދާރާއަށް އަދި އައްޑޫ ސިޓީ އާއި ފުވައްމުލަކު ސިޓީގެ އަވަށްތަކުގެ އޮފީސްތަކުންނާއި ކުޅުދުއްފުށި ސިޓީގެ ކައުންސިލް އިދާރާއަށެވެ. މާލޭގައިނަމަ، އިންތިޚާބާ ބެހޭ މަރުކަޒު ކަމަށްވާ ދަރުބާރުގެ އިން ފޯމުތައް ބަލައިގަންނާނެއެވެ. ރީ ރަޖިސްޓަރީވުމަށް އެދޭ ފޯމު އީސީގެ ވެބްސައިޓުންނާއި ކައުންސިލް އިދާރާތަކުން ލިބެން ހުންނާނެއެވެ.