ތިން އަހަރު ދުވަހުގެ އެއްބަސްވުމެއްގެ ދަށުން ލީޑްސް ޔުނައިޓެޑުން ނިއުކާސަލް ޔުނައިޓެޑުގެ ކީޕަރު ކާލް ޑާލޯ ސޮއިކޮށްފިއެވެ.
ނިއުކާސަލްގައި ނުވަ އަހަރު ދުވަސް ހޭދަކުރުމަށްފަހު އުމުރުން 32 އަހަރުގެ ޑާލޯ ލީޑްސް ޔުނައިޓެޑާ ގުޅުމުގެ ފީ، ދެ ޓީމުން ކުރެ އެއްވެސް ޓީމަކުން ހާމަކޮށްފައެއް ނުވެއެވެ. 2014 ވަނަ އަހަރު ނޮޓިންހަމް ފޮރެސްޓުން ނިއުކާސަލްއަށް ބަދަލުވުމަށްފަހު ޑާލޯ ވަނީ އެ ޓީމަށް 100 އަށްވުރެ ގިނަ މެޗު ކުޅެދީފައެވެ.
ނިއުކާސަލްގައި ކުޅުމަށް ލިބޭ ފުރުސަތު މަދުވުމުން މިދިޔަ ސީޒަން ޑާލޯ ހޭދަކުރީ ލޯނު އެއްބަސްވުމެއްގެ ދަށުން ޗެމްޕިއަންޝިޕް ޓީމެއް ކަމަށްވާ ހަލް ސިޓީ އާއެކުއެވެ. އެ ޓީމަށް ކުޅެދިން 12 މެޗުގެތެރެއިން ފަސް މެޗުން އޭނާ ވަނީ ކްލީން ޝީޓް ހޯދާފައެވެ.
ވޭލްސްގެ ޑިފެންޑަރު އީތަން އަމްޕަޑޫ ސޮއިކުރުމަށްފަހު، ޑާލޯ ވެގެންދިޔައީ މި ހޫނުމޫސުމުގައި ލީޑްސް އިން ސޮއިކުރި ދެވަނަ ކުޅުންތެރިޔާއަށެވެ.
