ކެރަމް އެސޯސިއޭޝަނުން އިންތިޒާމުކޮށްގެން ބާއްވާ، ޤައުމީ ކެރަމް މުބާރާތް އަންނަ މަހު ފަށަން ނިންމައިފި އެވެ.

މިއަހަރު އޮންނަ މުބާރަތަކީ 32 ވަނަ ޤައުމީ ކެރަމް މުބާާރާތެވެ. މުބާރާތުގައި ބައިވެރިވުމުގެ ފުރުސަތު މިހާރު ވަނީ ހުޅުވާލައިފަ އެވެ. މުބާރާތުގައި ބައިވެރިވުމުގެ އެންމެ ފަހު ވަގުތަކީ އޯގަސްޓު މަހުގެ ތިން ވަނަ ދުވަހެވެ. ހުޅުމާލޭ ސްޕޯޓްސް ކޮމްޕްލެކްސްގައި މުބާރާތް ކުރިއަށް ދާނީ އޯގަސްޓު މަހުގެ އަށް ވަނަ ދުވަހުން ފެށިގެންނެވެ. ކުރީ އަހަރުތަކުގެ މުބާރާތާ ޚިލާފަށް މިއަހަރުގެ މުބާރާތުގެ އިނާމް ފައިސާ ވަނީ ބޮޑު ކޮށްފަ އެވެ. އެގޮތުން މިއަހަރުގެ މުބާރާތަށް ކަނޑައަޅާފައިވާ އިނާމް ފައިސާގެ އަދަދަކީ 140،000 (އެއް ލައްކަ ސާޅީސް ހާސް) ރުފިޔާ އެވެ.

މުބާރާތުގައި އެންމެ ފުރަތަމަ ކުޅޭނީ ދެ ވަނަ ޑިވިޝަންގެ ކުޅުމެވެ. އެއަށްފަހު ކުރިއަށް ދާނީ ސިންގަލްސް އިވެންޓުތަކުގެ ކުޅުމެވެ. ސިންގަލްސް އިވެންޓުތަކުގެ އިތުރުން ޑަބަލްސް އިވެންޓު، މިކްސް ޑަބަލްސް އިވެންޓު އަދި ޓީމު އިވެންޓު ވެސް ކުރިއަށް ދާނެ އެވެ. މިދިޔަ އަހަރު އޮތް ކެރަމް ޤައުމީ މުބާރާތުގެ ފިރިހެން ސިންގަލްސް ޗެމްޕިއަން އަކީ އިސްމާއީލް އަޒްމީން އެވެ. އަންހެން ސިންގަލްސް ޗެމްޕިއަން އަކީ އައިމިނަތު ވިދާދު އެވެ.