ހެންޑަސަން ކުލަބުގައި ބަހައްޓަން ބޭނުންވި: ކްލޮޕް
ކްލޮޕް ބުނީ، ގޮތް ނިންމީ ކުޅުންތެރިޔާ ކަމަށާއި އެހެންކަމުން އެ ނިންމުމަށް އިހުތިރާމް ކުރާނެ ކަމަށް
ލިވަޕޫލްގެ ކުރީގެ ކެޕްޓަން ޖޯޑަން ހެންޑަސަން
ލިވަޕޫލް ދޫކޮށް ސައުދީ ޕްރޯ ލީގުގެ އަލް އިއްތިފާގަށް ބަދަލުވި ޖޯޑަން ހެންޑަސަން އެ ކުލަބުގައި ބަހައްޓަން ބޭނުންވި ކަމަށް ކޯޗު ޔާގަން ކްލޮޕް ބުނެފި އެވެ.
އައު ސީޒަނަށް ތައްޔާރުވުމުގެ ގޮތުން ސިންގަޕޫރުގައި ލިވަޕޫލުން ކުރިއަށް ގެންދާ ކޭމްޕުގައި ހުރެ މީޑިއާތަކާ ވާހަކަ ދައްކަމުން ކްލޮޕް ބުނީ، ހެންޑަސަން ލިވަޕޫލް ދޫކޮށްލަން އޭނާ އެއްވެސް ވަރަކަށް ބޭނުން ނުވާ ކަމަށެވެ. އަދި ހެންޑަސަން ކުލަބުގައި ހުންނަން ބޭނުންވި ކަމަށް ވެސް ކްލޮޕް ބުންޏެވެ. އެކަން ހެންޑަސަން އަށް ވެސް އިނގޭނެކަން ފާހަގަކޮށް ކްލޮޕް ބުނީ، ގޮތް ނިންމީ ކުޅުންތެރިޔާ ކަމަށާއި އެހެންކަމުން އެ ނިންމުމަށް އިހުތިރާމް ކުރާނެ ކަމަށެވެ. ހެންޑަސަން ލިވަޕޫލް ދޫކޮށްލަން ނިންމިއިރު، އެކަމާ ދެކޮޅަށް އޭނާ ބަހައްޓަން މަސައްކަތް ކުރި ނަމަ، ކަންތައް އިތުރަށް ގޯސްވުމުގެ ފުރުސަތު އޮތް ކަމަށް ކްލޮޕް ޤަބޫލު ކުރެ އެވެ. އެހެންކަމުން އެންމެ ރަނގަޅު ގޮތަކީ ހެންޑަސަންގެ ނިންމުމަށް ފުރިހަމަ އަށް އިހުތިރާމް ކުރުން ކަމަށް ވެސް ކްލޮޕް ވަނީ ބުނެފަ އެވެ.
ލިވަޕޫލް ދޫކޮށް ހެންޑަސަން އިއްތިފާގަށް ބަދަލުވީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. އެ ކުލަބަށް އޭނާ ސޮއި ކުރީ 12 މިލިއަން ޕައުންޑުގެ އަގަކަށް ކަމަށް މީީޑިއާތަކުން ބުނެ އެވެ. އަލް އިއްތިފާގުގެ ކޯޗަކީ ލިވަޕޫލްގެ ކުރީގެ ކެޕްޓަން ސްޓީވެން ޖެރާޑް އެވެ. 2015 ވަނަ އަހަރު ޖެރާޑް ލިވަޕޫލް ދޫކޮށްލުމުގެ ކުރިން މި ދެ ކުޅުންތެރިން ވަނީ އެކުގައި ކުޅެފަ އެވެ. ހެންޑަސަން އަށް ލިވަޕޫލްގެ ކެޕްޓަން ބޭންޑު ލިބުނީ ޖެރާޑް ކުލަބު ދޫކޮށްލުމުންނެވެ.
