މާޒިޔާ އަށް ސާބިއާގެ ފޯވާޑެއް
އުމުރުން 27 އަހަރުގެ ކުޅުންތެރިޔާ މާޒިޔާ އާއެކު ސޮއި ކޮށްފައި ވަނީ މިހާރު ކުރިއަށް ދާ ސީޒަންގެ ނިޔަލަށް
މާޒިޔާ އަށް ގެނައި ސާބިއާގެ ފޯވާޑް
މާޒިޔާ ސްޕޯޓްސް އެންޑް ރެކްރިއޭޝަނަށް ސާބިއާގެ ފޯވާޑެއް ގެނެސްފި އެވެ.
މާޒިޔާ އިން ހާމަކޮށްފައިވާ ގޮތުގައި އެ ކުލަބަށް ގެނެސްފައި ވަނީ ސާބިއާގެ ގިނަ ކުލަބުތަކަށް ކުޅެފައިވާ ވޮޖްސްލޭވް ބަލަބަނޮވިޗް އެވެ. އުމުރުން 27 އަހަރުގެ ކުޅުންތެރިޔާ މާޒިޔާ އާއެކު ސޮއި ކޮށްފައި ވަނީ މިހާރު ކުރިއަށް ދާ ސީޒަންގެ ނިޔަލަށެވެ. ސާބިއާ ގައި އޭނާ އެންމެ ފަހުން ކުޅެފައި ވަނީ އާރްއެފްކީ ނޯވީ ސޭޑް އަށެވެ. އެ ކުލަބުގައި އެންމެ ފަހުން ހޭދަ ކުރި ސީޒަނުގައި އޭނާ ވަނީ 27 މެޗު ކުޅެދީ ހަތް ލަނޑު ޖަހަައިފަ އެވެ. ބަލަބަނޮވިޗާ އެކު ކުރިއަށް އޮތް ތަނުގައި މާޒިޔާގެ ފޯވާޑް ލައިން އިތުރަށް ވަރުގަދަ ވެގެން ދާނެ އެވެ. މާޒިޔާގައި އޭނާ ބޭނުން ކުރާނީ 23 ނަންބަރު ޖާޒީ އެވެ.
އައު ސީޒަނަށް މާޒިޔާ އަށް ވަނީ މީގެ ކުރިން ވެސް ބިދޭސީ ކުޅުންތެރިން ގެނެސްފަ އެވެ. މި ސީޒަނުގެ މިހާތަނަށް މާޒިޔާ އިން ވަނީ އެފްއޭ ޗެރިޓީ ޝީލްޑް އަދި ޕްރެޒިޑެންޓްސް ކަޕް ކާމިޔާބުކޮށްފަ އެވެ. މިވަގުތު ދިވެހި ޕްރިމިއާ ލީގު ތާވަލްގެ އެއް ވަނައިގައި އޮތީ ވެސް މާޒިޔާ އެވެ.
