ކުޅުދުއްފުށި ސިޓީ އެއަރޕޯޓްގައި ޖެހި ރިވެޓްމަންޓުގެ ސަބަބުން ވަރަށް ބޮޑަށް އުދައިން އެއާޕޯޓު ރައްކާތެރި ކުރެވިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.

އެމްޓީސީސީން ވަނީ އެ މަޝްރޫއުގެ މަސައްކަތްކޮށް ނިންމާފައެވެ. އެމަސައްކަތްތައް ކުރިއަށް ގެންގޮސްފައިވާ ގޮތްތައް ބައްލަވާލެއްވުމަށްފަހު މީޑިއާތަކަށް މައުލޫމާތު ދެއްވަމުން އާޒިމް ވިދާޅުވީ، ކުޅުދުއްފުށި އެއާޕޯޓު ރިވެޓްމަންޓު ކުރިން ޖަހާފައިވަނީ އެހާ ރަނގަޅަށް ނޫން ކަމަށާއި، އެ ރިވެންމަންޓު އެއްކޮށް ނަގާފައިވާ ކަމަށެވެ. ފުރަތަމަ ޖެހި ރިވެންޓްމަންޓުން ވަރަށް ބޮޑަށް އެއާޕޯޓަށް އުދައާރާ ގެއްލުންވިކަން އާޒިމް ފާހަގަކުރެއްވިއެވެ. އަދި ވިދާޅުވީ ރޭގަނޑު ފްލައިޓް ޖެއްސުމަށް ރަންވޭ ދިއްލުމުގެ މަސައްކަތް ވެސް ނުކުރެވުނު ކަމަށެވެ.

ނަމަވެސް ފަހުން ޖެހިގެން ދިޔަ ރިވެޓްމަންޓާއެކު މިފަދަ މައްސަލަތައް ކުރިމަތިނުވާ ކަމަށާއި، މިފަހަރު އެރި އުދައިގައި ވެސް ރިވަޓްމަންޓަށް ވެސް ގެއްލުމެއް ލިބިފައިނުވާ ކަމަށެވެ. އަދި މިހާރު ރޭގަނޑު ފްލައިޓް ޖެއްސޭ ގޮތަށް ލައިޓް ސިސްޓަމް ހަރުކުރެވިފައިވާ ކަމަށް އާޒިމް ވިދާޅުވިއެވެ.

މީގެ އިތުރުން އާޒިމް ވިދާޅުވީ އެމްޓީސީސީން ޑިޒައިންކޮށް ޖެހި މި ރިވެޓްމަންޓަކީ މިފަހުން ޖެހުނު އެންމެ ބޮޑު ރިވެޓްމަންޓް ކަމަށެވެ.

ކުޅުދުއްފުށީގެ އެއަރޕޯޓް ތަރައްގީ ކުރުމަށް އެރަށުގެ ކުޅި ހިމެނޭހެން 15 ހެކްޓަރުގެ ބިންވަނީ ހިއްކާފައެވެ. މީގެތެރެއިން 6 ހެކްޓަރު ހިއްކާފައިވަނީ ރަށުގެ ފަޅުތެރެއިންނެވެ. އެ ސަރަހައްދު ޙިމާޔަތްކުރުމަށް ފުރަތަމަ ޖަހާފައިވަނީ 590 މީޓަރުގެ ދިގު، 1.6 މީޓަރުގެ އުސް ބޮޑުހިލައިގެ ތޮއްޓެކެވެ. ނަމަވެސް ވިއްސާރަވެ މޫސުންގޯސްވުމުގެ ސަބަބުން، މި ތޮއްޓަށްވެސް ވަނީ ބޮޑެތި ގެއްލުންތަކެއް ލިބިފައެވެ. އެގޮތުން 300 މީޓަރުގެ ބޮޑު ސަރަހައްދަކަށް މީގެކުރިން ގެއްލުން ވެފައިވެއެވެ. އެއަށްފަހު މި މައްސަލަ ހައްލުކުރުމަށް އެމްޓީސީސީއާ މި މަސައްކަތް ހަވާލުކުރެވުނެވެ.