ގްރޫޕް އޭގެ އެއްވަނަ ޓީމްގެ ގޮތުގައި ސްޓެލްކޯ އަދި ދެވަނަ ޓީމްގެ ގޮތުގައި މޯލްޑިވިއަން, ކްލަބް މޯލްޑިވްސް ކަޕްގެ ގަދަ ސޯޅައިން ޖާގަ ހޯދައިފިއެވެ.

ސްޓެލްކޯ ގްރޫޕްގެ އެއްވަނަ ހޯދީ ފަހު މެޗުގައި 4-2 ން ބަރޮސް މޯލްޑިވްސް ބަލިކޮށް, ޖުމްލަ ހަތް ޕޮއިންޓާ އެކުއެވެ. ބަރޮސް ކޮޅަށް ސްޓެލްކޯގެ މުހައްމަދު ވިލްފް ދެ ލަނޑު ޖެހިއެވެ. މެޗުގެ މޮޅު ކުޅުންތެރިއަކީވެސް އޭނާއެވެ. ސްޓެލްކޯގެ ފުރަތަމަ ދެ ލަނޑު ޖެހީ ނާއިހު މުފީދުއާއި އިބްރާހީމް ރިމާހުއެވެ. ބަރޮސްގެ ދެ ލަނޑު ޖެހީ ވިޝާން ހަބީބުއެވެ. މިގްރޫޕުން ދެވަނަ މޯލްޑިވިއަން ހޯދީ ތިން މެޗުން ފަސް ޕޮއިންޓާއެކުއެވެ. ފަހު މެޗުގައި ޓީމް އެމްޓީސީސީ އަތުން ލިބުނީ ޕޮއިންޓެކެވެ. އެއީ 3-3 ން މެޗު އެއްވަރުވެގެންނެވެ. މޯލްޑިވިއަންގެ ތިން ލަނޑު ޖެހީ ހަފާގް ސިދުގީއާއި އާދަމް އަޒްމީނަައި މުހައްމަދު އަޖުފާންއެވެ. އެމްޓީސީސީގެ ތިން ލަނޑު ޖެހީ ނައުފް މުޙައްމަދު ޖަލީލް އާއި އައްޒާމް އަލިދީދީއާއި އާރިފް އަހުމަދެވެ.

ގްރޫޕް ބީގެ އެއްވަނަ ވެމްކޯ ހޯދީ ކުޅުނު ތިން މެޗުންވެސް މޮޅުވެ ނުވަ ޕޮއިންޓާއެކުއެވެ. ފަހު މެޗު އުރީދޫއާއި ވާދަކޮށް ކާމިޔާބުކުރީ 5-1 ނެވެ. މެޗުގެ މޮޅު ކުޅުންތެރިޔާ އިބްރާހީމް މަހުދީ ހުސެއިން ތިން ލަނޑު ޖެހިއެވެ. އަނެއް ދެ ލަނޑު ޖެހީ އިސްމާއީލް ވަޖީހުއާއި އަހުމަދު ވިޖުދާންއެވެ. އުރީދޫގެ ހަމައެކަނި ލަނޑު ޖެހީ ހުސެއިން ޝަރީފްއެވެ. މިގްރޫޕުން ދެވަނަ ޓީމްގެ ގޮތުގައި ގަދަ ސޯޅައަށް ދަތުރުކުރީ ފަހު މެޗުގައި 9-1 ން ކްލަބް އާރުއޯއެލް ބަލިކުރި ޓީމް އެފްއެސްއެމްއެވެ. މެޗުގެ މޮޅު ކުޅުންތެރިޔާ އަބުދުالله ޒިޔާން ތިން ލަނޑު ޖެހިއެވެ. އަދި އަހުމަދު އައިހަމްއާއި މުހައްމަދު މަޒީންކުރެ ކޮންމެ ކުޅުންތެރިއަކު ދެ ލަނޑު ޖެހިއެވެ. އަނެއް ދެ ލަނޑު ޖެހީ އަލީ އަލްސަންއާއި މުހައްމަދު ޝާންއެވެ. އެފްއެސްއެމް ގްރޫޕްގެ ދެވަނަ ހޯދީ ތިން މެޗުން ހަ ޕޮއިންޓާއެކުއެވެ.