މުސްތަގުބަލަށް ވިސްނާއިރު، ކުޅި ހިމާޔަތްކުރުމަކީ ވަރަށް މުހިންމު ކަމެއް
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީގެ ސީއީއޯ، އާދަމް އާޒިމް
ހއ. ތަކަންދޫ ކުޅި ހިމާޔަތްކުރުމުގެ އަމަލީ މަސައްކަތް، އޯގަސްޓު މަހުގެ ތެރޭގައި ފެށޭނެކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.
އެރަށުގައި މަސައްކަތްތައް ކުރިއަށްދާ ގޮތް ބައްލަވާލެއްވުމަށްފަހު މީޑިއާތަކަށް މައުލޫމާތު ދެއްވަމުން އާޒިމް ވިދާޅުވީ، ތަކަންދޫގައި ދެ މަޝްރޫއުގެ މަސައްކަތްތައް ކުރިއަށްދާ ކަމަށެވެ. އެއީ ބަނދަރު ތަރައްގީކުރުމުގެ މަސައްކަތާއި، ކުޅި ހިމާޔަތްކުރުމުގެ މަސައްކަތް ކަމަށެވެ.
ތަކަންދޫގެ ކުޅިއަށް އިޝާރާތްކުރައްވައި އާޒިމް ވިދާޅުވީ، އެސަރަހައްދު ވަރަށް ބޮޑަށް ގިރާކަމަށާއި، ވެލި ވަރަށް ބޮޑަށް އަރަމުންދާކަމަށެވެ. އާޒިމް ވިދާޅުވީ މުސްތަގުބަލަށް ވިސްނާއިރު، ކުޅި ހިމާޔަތްކުރުމަކީ ވަރަށް މުހިންމު ކަމެއް ކަމަށާއި، ފަތުރުވެރިކަން ކުރިއެރުވުމަށް ވެސް ކުޅި ވަރަށް މުހިންމު ދައުރެއް އަދާކުރާ ކަމަށެވެ. ގުދުރަތީ އެތައް ރީތިކަމެއް ލިބިފައިވާ ކުޅީގައި ތަފާތު އެކިއެކި ދިރުންތައް އުޅޭކަން އާޒިމް ފާހަގަކުރެއްވިއެވެ. އަދި ވިދާޅުވީ މިހާރު ވެސް އެރަށަށް އަރާ މީހުން ކުޅީގެ ރީތިކަން ބަލަން އެސަރަހައްދަށް ދާކަމަށެވެ.
އާޒިމް ވިދާޅުވީ ކުޅި ހިމާޔަތްކުރުމުގެ އަމަލީ މަސައްކަތް އޯގަސްޓް މަހުގެ ތެރޭގައި ފަށައި، މިއަހަރުގެ ތެރޭގައި މަސައްކަތް ނިންމާލާނެ ކަމަށެވެ.
މީގެ އިތުރުން ތަކަންދޫގައި ތަރައްގީ ކުރެވޭ ބަނދަރުން 4،455 އަކަމީޓަރުގެ ސަރަހައްދެއް ފުންކުރުމާއި، 2،230 އަކަމީޓަރުގެ ނެރެއް ފުންކުރުމާއި، 252 މީޓަރުގެ ބޭރުތޮށި ލުމާއި، 160 މީޓަރުގެ ރިވެޓްމަންޓް ޖެހުން ހިމެނެއެވެ. އަދި 126 މީޓަރުގެ ގްރޮއިންސް ޖެހުމާއި، 883 އަކަމީޓަރުގެ ސަރަހައްދެއްގައި ޕޭވްމަންޓް ހެދުމާއި، ނެރުބައްތިއާއި މަގުބައްތި ހަރުކުރުމުގެ އިތުރުން މޫރިންގ ބޮލާޑް ހަރުކުރުމުގެ މަސައްކަތްވެސް ހިމެނެއެވެ.
މި ދެ މަޝްރޫއަށް 22.3 މިލިއަނަށްވުރެ ގިނަ ރުފިޔާ ޚަރަދުވާނެ ކަމަށް ޕްލޭނިންގ މިނިސްޓްރީން ބުނެއެވެ.
