ރާއްޖެއަށް އިންސާނީ ހައްގުތަކާއި، ޑިމޮކްރަޓިކް ނިޒާމުތަކުގެ މަތީ ދަރަޖައެއްގެ ކުރިއެރުން ލިބިފައިވޭ: އައްބާސް ފާއިޒު
27 ޖުލައި 2023 | ބުރާސްފަތި 12:42ފާއިތުވި 20 އަހަރު ދުވަހުގެ ތެރޭގައި ރާއްޖެއިން އިންސާނީ ހައްގުތަކާއި ޑިމޮކްރަސީގައި ކުރިއެރުންތަކެއް ހޯދާފައިވޭ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު، އައްބާސް ފާއިޒާ ވާހަކަފުޅު ދައްކަވަނީ
ރާއްޖެއަށް، އިންސާނީ ހައްގުތަކާއި ޑިމޮކްރަޓިކް ނިޒާމުތަކުގެ މަތީ ދަރަޖައެއްގެ ކުރިއެރުމެއް ލިބިފައިވާކަމަށް، އެމްނެސްޓީ އިންޓަނޭޝަނަލްގައި 20 އަހަރަށްވުރެ ގިނަ ދުވަހު ޚިދުމަތް ކުރައްވާފައިވާ އައްބާސް ފާއިޒު ވިދާޅުވެއްޖެއެވެ.
އައްބާސް ވިދާޅުވީ، ފާއިތުވި 20 އަހަރު ދުވަހުގެ ތެރޭގައި ދިވެހިރާއްޖެއިން އިންސާނީ ހައްގުތަކާއި ޑިމޮކްރަސީގައި ކުރިއެރުންތަކެއް ހޯދާފައިވާކަމަށެވެ.
އައްބާސް ފާއިޒަކީ އެމްނެސްޓީ އިންޓަނޭޝަނަލްއިން އޭރު ރާއްޖޭގެ ކަންކަން ބެލުމުގެ ޒިންމާ ހަވާލުކުރައްވާފައި ހުންނެވި ބޭފުޅާއެވެ. އެމްނެސްޓީން އޭރު ބެލި ޚާއްސަ ކަންކަމުގެ ތެރޭގައި، ނުހައްގުން މީހުން ޖަލަށްލުމާއި އަދި ޚާއްސަކޮށް ބަންދުގައި ތިބި މީހުންނަށް ދެމުންދިޔަ އަނިޔާއާއި މަރުވެސް ހިމެނެއެވެ. އެގޮތުން ކުރީގެ ސަރުކާރުތަކުގައި، އިންސާނީ ހައްގުތަކާ ޚިލާފަށް ކުރި ކަންކަން އައްބާސް ދިޔައީ ރިޕޯޓު ކުރައްވަމުންނެވެ.
މީގެ ތެރޭގައި ކުރީގެ ރައީސް މުހައްމަދު ނަޝީދު ޖަލަށްލުމާއި، އަދި ރާއްޖޭގެ ސިޔާސީ މަސްރަހު ގުޑުވާލި މަޝްހޫރު ހުސައިން ސަލާހްގެ މަރުގެ ކަންތައްވެސް، އެ ސަރުކާރުން ހަގީގަތް ހާމަނުކުރަން އުޅުނު ނަމަވެސް އެމްނެސްޓީން ވަނީ އެ މައުލޫމާތުތައް ރިޕޯޓުކޮށްފައެވެ.
