ދައުލަތަށް ދިގު މުއްދަތަކަށް ޚިދުމަތްކުރެއްވި ބޭފުޅުންނަށް އިނާމު ދެއްވުމަށް ބާއްވަވާ ރަސްމީ ޖަލްސާ އަންނަ ހޮނިހިރު ދުވަހު
27 ޖުލައި 2023 | ބުރާސްފަތި 10:52މި ޖަލްސާގައި 148 ބޭފުޅަކަށް އިނާމު ދެއްވާނެ
ދައުލަތުން ދެއްވާ އިނާމު ދިނުމުގެ ޖަލްސާއެއްގެ ތެރެއިން
ދައުލަތަށް ދިގު މުއްދަތަކަށް ޚިދުމަތް ކުރެއްވި ބޭފުޅުންނަށް އިނާމު ދެއްވުމަށް ބާއްވަވާ ރަސްމީ ޖަލްސާ އަންނަ ހޮނިހިރު ދުވަހު ބާއްވަވާ ގޮތަށް ހަމަޖައްސަވައިފިއެވެ.
ރައީސް އޮފީހުން މައުލޫމާތު ދޭ ގޮތުގައި، ދިވެހި ދައުލަތަށް ދިގު މުއްދަތަކަށް ޚިދުމަތް ކުރެއްވި ބޭފުޅުންނަށް އިނާމު ދެއްވުމަށް ބާއްވަވާ ރަސްމީ ޖަލްސާ، މި މަހުގެ 29ވާ ހޮނިހިރު ދުވަހު ހެނދުނު 9 ޖަހާއިރު ސޯޝަލް ސެންޓަރުގައި ބާއްވަވާގޮތަށް ވަނީ ހަމަޖައްސަވާފައެވެ.
މި ޖަލްސާގައި، 148 ބޭފުޅަކަށް އިނާމު ދެއްވާނެއެވެ. އެ ބޭފުޅުންނަށް ދެއްވާ ޝަރަފުގެ ބެޖާއި ޝަރަފުގެ އައްޑަނަ ދެއްވާނީ، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހެވެ.
ޝަރަފުގެ ބެޖާއި ޝަރަފުގެ އައްޑަނަ ލިބިވަޑައިގަންނަވާ ބޭފުޅުންގެ ތެރޭގައި، ދައުލަތުގެ އެކި މުއައްސަސާތަކުގައި އެކި ފެންވަރުގެ މަގާމުތައް ފުރުއްވާފައިވާ ބޭފުޅުން ހިމެނިވަޑައިގަންނަވައެވެ.
ދިވެހި ދައުލަތަށް ޚިދުމަތް ކުރުމުގެ އިނާމަކީ، ދިވެހި ދައުލަތަށް 35 އަހަރަށްވުރެ ދިގު މުއްދަތަކަށް ޚިދުމަތްކުރައްވާފައިވާ މުވައްޒަފުންގެ ތެރެއިން މަގާމުގެ މަސްއޫލިއްޔަތު އަދާކުރެއްވުމުގައި، ގާބިލްކަމާއި އިޚްލާސްތެރިކަމާއެކު ކުރައްވާފައިވާ ޚިދުމަތްތަކާއި، އެ މުއައްސަސާއެއްގެ ކުރިއެރުމަށް ކޮށްދެއްވާފައިވާ ޚިދުމަތްތަކުގެ އަގު ވަޒަންކުރެއްވުމުގެ ގޮތުން، 2021 ވަނަ އަހަރު ދެއްވަން ފެއްޓެވި ޝަރަފުވެރި އިނާމެކެވެ.
