މިނިވަންކަމުގެ މަދަނީ އައްޑަނައަކީ ރައްޔިތުންގެ ހިތްތަކުގައި އޮންނަ ގައުމީ ލޯބި ކަމަށާއި، އެ އައްޑަނައިން ރައްކާތެރިކޮށްދޭ މިނިވަންކަމުގެ ބިންގަލަކީ ދާޚިލީ ހަމަޖެހުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
މިނިވަން ދުވަހުގެ ގައުމީ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ، އެ ބިންގަލުގެ މަތީގައި ބިނާކުރާ ގައުމިއްޔަތުގެ ކުރިބޯއްޓަކީ، ރައްޔިތުންގެ މެދުގައި އޮންނަ ސުލްހަ މަސަލަސްކަމާއި އަމާންކަމާއި އެކުވެރިކަން ކަމަށެވެ. މީގެ އިތުރުން ހަމައެކަނި ބޮޑުތަކުރުފާނުގެ ސީރަތަށް އަޅުގަނޑުމެން ނަޒަރު ހިންގައިލިއަސް، އެ ރަދުންގެ މިނިވަން ޖިހާދުގެ އިހާއި ފަހުގެ ސަފުހާތަކުން ވެސް ފެންނަނީ، މިނިވަންކަމުގެ މި ދެންނެވި ބަހާތައް ކަމަށް އެމަނިކުފާނު ވިދާޅުވިއެވެ. ރައީސް ވިދާޅުވީ ދެ ހާޖީންނާއި ދަންޑެހެލު ގޮވައިގެން، އުތީމުގެ ޒުވާން ތިން ބަތަލުން މަލިކައްޑޫގައި ކުރެއްވި ގައުމީ ޖިހާދުގެ ކޮންމެ ދުވަހެއް އަދި ކޮންމެ ހިނދުކޮޅެއް، އެ ރަދުން ހޭދަކުރެއްވީ ދިވެހިން އެއްބައިވަންތަ ކުރައްވައި އެކުވެރި ކުރެއްވުމަށް ކަމަށެވެ.
އެހެންކަމުން ދޮންބަންޑާރައިންގެ ގައުމީ ޖިހާދުން ވެސް އަޅުގަނޑުމެންނަށް ފެންނަނީ، ސުލްހައާއި ހަމަޖެހުމާއި އަމާންކަން ދެމެހެއްޓެވުމަށް ކުރެއްވި މަސައްކަތްޕުޅު ކަމަށް އެމަނިކުފާނު ވިދާޅުވިއެވެ. އަދި އެ ރަދުންގެ ގައުމީ ޖިހާދުގެވެސް އާރާއި ފަންވަރަކީ، ރައްޔިތުންގެ މެދުގައި އޮތް އެކުވެރިކަން ކަމަށް ރައީސް ވަނީ ވިދާޅުވެފައެވެ. ރައީސް އިތުރަށް ވިދާޅުވީ އެ ރަދުންނަށް ލިބިވަޑައިގެންނެވި ހަކަތައަކީ، ހަމަޖެހުމާއި ސުލްހަވެރިކަމަށް ރައްޔިތުން ބޭނުންޖެހިފައި ތިބި މިންވަރު ކަމަށެވެ.
އެ ޖަލްސާގައި ރައީސް ވިދާޅުވީ ދިވެހިރާއްޖޭގެ ސިޔާސީ މިނިވަންކަމުގެ ތާރީޚަށް ބަލާއިރު، މިދިޔަ ފަސް އަހަރަކީ، ކޮންމެ ދިމާއަކަށް ނަޒަރު ހިންގިޔަސް، ފުރިހަމަ މާނައިގެ މިނިވަންކަން ގާއިމުވެފައި އޮތް ފަސް އަހަރު ކަމަށެވެ. އަދި މިދިޔަ ފަސް އަހަރު ރާއްޖޭގެ ސިޔާސީ މިނިވަންކަން ފުރިހަމަށް ރައްކާތެރިކުރެވިފައި ވާކަމަށާއި، މި ފަސް އަހަރަކީ ޚާރިޖީ މިނިވަންކަން އެންމެ ވަރުގަދަ ފަސް އަހަރު ކަމަށް ވިދާޅުވިއެވެ. ހަމައެހެންމެ މިދިޔަ ފަސް އަހަރަކީ ދާޚިލީ މިނިވަންކަން އެންމެ ފުޅާގޮތެއްގައި ލިބިދިނުމާއި ފަރުދުންގެ ޒާތީ މިނިވަންކަން އެއްވެސް ހިފެހެއްޓުމެއްނެތި ކަށަވަރު ކޮށްދެވުނު ފަސް އަހަރު ކަމަށް ވިދާޅުވިއެވެ.
މިނިވަންދުވަހަކީ ގައުމެއްގެ ނިސްބަތުން ފާހަގަކުރާނެ އެންމެ ފަޚުރުވެރި އަދި އެންމެ ހައިބަވަންތަ ދުވަސް ކަމަށް ރައީސް ވިދާޅުވިއެވެ. މިއީ ވަރަށް މަތިވެރި އަމާނާތެއްގެ ޒިކުރާ އަޅުގަނޑުމެންގެ ހިތްމައްޗަށް ގެނެސްދޭ މުނާސަބަތެއް ކަމަށްވެސް އެމަނިކުފާނު ވިދާޅުވިއެވެ. އެ ދުވަސް ފާހަގަކުރުމުގެ މާނަވީ ރަމްޒަކީ، ދިވެހިރާއްޖޭގެ މިނިވަންކަން ދިފާއުކުރުމުގެ އަހުދު ކަށަވަރު އައުކުރުން ކަމަށް ރައީސް ވަނީ ވިދާޅުވެފައެވެ. މިނިވަންކަމުގެ ބިންގާ ވަރުގަދަކުރުމާއި، އެ ބިންގަލުގެ މަތީގައި ކާބަފައިން ބިނާކުރި ދިވެހި ގައުމިއްޔަތު އާރާސްތުކުރުމުގެ އަހުދު ކަށަވަރު ހިފުން ކަމަށްވެސް ރައީސް ވިދާޅުވިއެވެ.
