ރާއްޖެ ޓީވީގެ ނޫސްވެރިންނަށް މިނިވަންކަމުގެ ނޭވާ ލެވުނީ އިބޫ ހޮވުނުކަން އެނގުނު ހިސާބުން: އެމްޑީ ސައްލެ
ސޯލިހުގެ ވެރިކަމެއްގައި ރާއްޖޭގައި މިނިވަން ނޫސްވެރިކަމަކަށް ފުރުސަތު ލިބިގެންދާނެކަމަށް އުއްމީދު ކުރައްވާކަމަށް ވިދާޅުވި
ސައްލެ ވާހަކަ ދައްކަވަނީ
ރާއްޖެޓީވީގެ ނޫސްވެރިނަށް މިނިވަންކަމުގެ ނޭވާ ލެވުނީ އިންތިޚާބީ ރައީސް އިބްރާހިމް މުހައްމަދު ސޯލިހު ރިޔާސީ އިންތިޚާބު ކާމިޔާބު ކުރެއްވިކަން އެނގުނު ހިސާބުން ކަމަށް ރާއްޖެޓީވީގެ މެނޭޖިން ޑިރެކްޓަރ އަހުމަދު ސަލީމް(ސައްލެ) ވިދާޅުވެއްޖެއެވެ.
އިންތިޚާބީ ރައީސް ސޯލިހު ރާއްޖެޓީވީ އަށް ވަޑައިގެން އެ ސްޓޭޝަންގެ މުވައްޒަފުންނާ ބައްދަލު ކުރެއްވުމަށް ބޭއްވި ރަސްމިއްޔާތުގައި ސައްލެ ވިދާޅުވީ ރާއްޖެޓީވީއަށް މީގެ ކުރިން ވެސް އެކި ދަތިތަކާއި ކުރިމަތިވި ކަމަށާއި ސޯލިހުގެ ވެރިކަމެއްގައި ރާއްޖޭގައި މިނިވަން ނޫސްވެރިކަމަކަށް ފުރުސަތު ލިބިގެންދާނެކަމަށް އުއްމީދު ކުރައްވާކަމަށެވެ.
"އަޅުގަނޑު ފާހަގަ ކޮށްލަން ބޭނުން ވަރަށް އުފަލާއި އެކުގައި މީގެ ކުރިންވެސް ވަރަށްގިނަ ތަފާތު އުނދަގޫތަކާއި ދަތިތައް އަޅުގަނޑުމެންނަށް ކުރިމަތިވެގެން ދިޔަ ކިތަންމެ ހާލަތެއްގައި ވަރަށް ގާތުން އަޅުގަނޑުމެންގެ ހާލު ބައްލަވާ އަޅުގަނޑުމެންނަށް ހިތްވަރު ދެއްވި ބޭފުޅެއްގެ ގޮތުގައި އިބޫ އަޅުގަނޑުމެންނަށް ފާހަގަ ކުރެވިގެން ދިޔައީ. އަޅުގަނޑުމެން ގެ ހުރިހާ މުއައްޒަފުން ހިތުގެ އަޑިން ބަލައިގަންނަން،" ސައްލެ ވިދާޅުވިއެވެ.
ސައްލެ ވިދާޅުވީ ރާއްޖެޓީވީ އެންމެ ފަހުން ޖޫރިމަނާ ކުރި އިރުވެސް އިންތިޚާބީ ރައީސް ސޯލިހުގެ ފަރާތުން ރާއްޖެޓީވީއަށް އެހީތެރިކަން ލިބިވަޑައިގެންނެވި ކަމަށެވެ. އަދި އެކަމުގައި ރާއްޖެޓީވީގެ މުއައްޒަފުންނަށް ހިތްވަރު ދެއްވާ އެކަމުން އަރައިގަންނަން އެމަނިކުފާނުގެ ފަރާތްޕުޅުން މަސައްކަތް ކޮށްދެއްވި ކަމަށެވެ. އަދި އެކަމަށް ޝުކުރު އަދާކުރައްވާކަމަށް ސައްލެ ވިދާޅުވިއެވެ.
"އިބޫ އަޅުގަނޑުމެންނާއި ބައްދަލުވީ ވެސް ބޮޑު ސިންގާ ޖޫރިމަނާއެއް ބޯމަތިވެގެން އެކަމުގެ ނުރައްކަލުގައި އަޅުގަނޑުމެން އުޅެމުން ދަނިކޮށް އެދުވަހު ވެސް އަޅުގަނޑުމެންނަށް ހިތްވަރުދެއްވާ އެދުވަހު ވެސް އެކަމުން އަރައިގަންނަން އަޅުގަނޑުމެންނަށް މަސައްކަތް ކޮށްދެއްވި ." ސައްލެ ވިދާޅުވިއެވެ.
ގައުމީ ސަލާމަތަށް ނުރައްކާވުމާއި ނިމިދިޔަ އިންތިޚާބުން ބަލިވެވަޑައިގެންނެވި ރައީސް އަބްދުﷲ ޔާމީންގެ އަބުރުފުޅު ގެއްލޭފަދަ ކޮންޓެންޓެއް ގެނެސްދިން ކަމަށް ބުނެ،ރާއްޖެޓީވީ ޖޫރިމަނާ ކޮށްފައިވަނީ ދެ މިލިއަން ރުފިޔާއަށެވެ. އެކި ފަހަރުމަތިން ތަކުރާރުކޮށް، ރާއްޖެޓީވީ ވަނީ 3.7 މިލިއަން ރުފިޔާއަށް ޖޫރިމަނާ ކޮށްފައެވެ.
