ރާއްޖެއިން ބޭރުން އައި ދިވެއްސަކު ހިމަބިއްސަށް ޕޮޒިޓިވްވެއްޖެ، ކޮންޓެކްޓުން ދެނެގަންނަނީ
ހިމަބިހީގެ މައިގަނޑު އަލާމަތްތަކަކީ ހުން އައުމާއެކު ރަތް ބިހިތަކެއް ނެގުން
ލިޔެކިޔުން ނެތް ބިދޭސީންނަށް ވެކްސިން ޖަހަން ފެށުން
ރާއްޖެއިން ބޭރުން އައި ދިވެއްސަކު ހިމަބިހި (މީސަލްސްއަށް) ޕޮޒިޓިވްވެއްޖެއެވެ.
އެކަމާ ގުޅޭގޮތުން ހެލްތު ޕްރޮޓެކްޝަން އޭޖެންސީ (އެޗްޕީއޭއިން) ނެރުނު ބަޔާނެއްގައި ބުނީ، 25 ޖުލައި 2023 ވަނަ ދުވަހު މާލެ ސަރަޙައްދުގައި ދިވެއްސަކު ހިމަބިއްސަށް ޕޮޒިޓިވްވެފައިވާ ކަމަށެވެ.
އެޗްޕީއޭއިން މައުލޫމާތު ދޭ ގޮތުގައި އެމީހާއަށް ބަލި ޖެހިފައިވަނީ ރާއްޖެއިން ބޭރުން (އިމްޕޯޓަޑް ކޭސް) ކަމަށް މިހާތަނަށް ބެލި ބެލުމުން ވަނީ އެނގިފައެވެ. އޭނާގެ ސިއްޙީ ޙާލު ހުރިގޮތުން ހޮސްޕިޓަލުގައި އެޑްމިޓު ކޮށްގެން ފަރުވާދެމުންދާއިރު، މިވަގުތު ޙާލު ރަނގަޅުވަމުން އަންނަކަމަށްވެސް އެޗްޕީއޭއިން މައުލޫމާތު ދެއެވެ.
އޭގެ އިތުރުން، އޭނާއަކީ ވެކްސިންގެ ދެ ޑޯޒް ފުރިހަމަކޮށްފައިވާ މީހެއް ކަމަށާއި، ހިމަބިއްސަކީ އެންމެ ފަސޭހައިން ފެތުރޭ ޒާތުގެ ބައްޔެއްކަމަށް ވުމާއެކު، ބައެއް ފަރާތްތަކުން ބައްޔަށް ހުށައެޅިއްޖެނަމަ ބަލި ޖެހުމުގެ ފުރުސަތު ބޮޑުވާކަމަށްވެސް އެޗްޕީއޭއިން ބުނެއެވެ.
ހިމަބިއްސަކީ ރާއްޖެއިން ނައްތާލެވިފައިވާ ބައްޔަކަށްވުމާއެކު، ކޭސްއެއް ފެނުމުން އަމަލު ކުރަން ކަނޑައެޅިފައިވާ އުސޫލުގެ ދަށުން ކޮންޓެކްޓުން ދެނެގަތުމުގެ މަސައްކަތް މިހާރު ވަނީ ފަށާފައެވެ. އަދި ބައެއް ކޮންޓެކްޓުންނަށް އެކަން އަންގައި، އޭގެ ތެރެއިން ވެކްސިން ފުރިހަމަ ނުވާ ފަރާތްތަކަށް ވެކްސިން ދިނުމުގެ މަސައްކަތް ކުރަމުންދާކަމަށްވެސް އެޗްޕީއޭއިން ބުނެއެވެ.
އެޗްޕީއޭއިން މައުލޫމާތު ދޭ ގޮތުގައި ވެކްސިންގެ ދެ ޑޯޒް ފުރިހަމަ ކުރުމުން ބަލި ޖެހުމުގެ ހިރާސް 97 އިންސައްތަ ކުޑަކޮށްދެއެވެ.
އޭގެ އިތުރުން، ބަލިޖެހިފައިވާ ފަރާތުން އެހެން މީހުންނަށް ބަލި ފެތުރުމުގެ ފުރުސަތު އޮންނަ މުއްދަތުގެ ތެރޭގައި އެ ފަރާތުން ދަތުރުކޮށްފައިވާކަން ފާހަގަކޮށް އެޗްޕީއޭއިން ބުނީ، ދަތުރުމަތީގައާއި، ގެއާއި، ހޮސްޕިޓަލުގައި އޭނާއާ ކޮންޓެކްޓުވި މީހުންގެ މައުލޫމާތު މިހާރު އެއްކުރަމުންދާކަމަށެވެ.
ހަމައެއާއެކު، ކަނޑައެޅިފައިވާ އުސޫލުގެ މަތިން ބަލި ޖެހުނު ފަރާތް ދިރިއުޅޭ ސަރަޙައްދުގައި "ރިންގް ވެކްސިނޭޝަން" ކުރިއަށް ދާނެކަމަށްވެސް އެޗްޕީއޭއިން ބުނެއެވެ.
ހިމަބިހީގެ މައިގަނޑު އަލާމަތްތަކަކީ ހުން އައުމާއެކު ރަތް ބިހިތަކެއް ނެގުމެވެ. އަދި ކެއްސުމާއި، ނޭފަތުން އަރިދަފުސް ފޭބުމާއި، ލޯ ރަތްވުން ފަދަ އަލާމަތްތައްވެސް ހުރެއެވެ.
