ސަރުކާރުގެ އަމާޒަކީ ރައްޔިތުންގެ ވަގުތު ބޭކާރު ނުވާނެ ގޮތްތަކަށް ޚިދުމަތްތައް ފަހިކޮށްދިނުން: ނާއިބްރައީސް
މުޅި ދުނިޔެއަށްވެސް ޓެކްނޮލޮޖީގެ ދާއިރާއިން ބޮޑެތި ބަދަލުތަކެއް ދަނީ އަންނަމުން
ނައިބްރައީސް ފައިސަލް ނަސީމް
ސަރުކާރުގެ އަމާޒަކީ ރައްޔިތުންގެ ވަގުތު ބޭކާރު ނުވާނެ ގޮތްތަކަށް ޚިދުމަތްތައް ފަހިކޮށްދިނުންކަމަށް ނައިބްރައީސް ފައިސަލް ނަސީމް ވިދާޅުވެއްޖެއެވެ.
އެސްޓީއޯ ސްމާޓްސްޓޯރ ހުޅުވުމަށް ބުރާސްފަތި ދުވަހު ބޭއްވި ރަސްމިއްޔާތުގައި ވާހަކަ ދައްކަވަމުން ނައިބްރައީސް ވިދާޅުވީ، މިއީ ރަނގަޅު ފެށުމެއް ކަމަށާއި، މުޅި ދުނިޔެއަށްވެސް ޓެކްނޮލޮޖީގެ ދާއިރާއިން ބޮޑެތި ބަދަލުތަކެއް އަންނަމުންދާ ކަމަށެވެ.
ރާއްޖެއަށްވެސް އެ ބަދަލުތައް އަންނަމުންދާކަން ފާހަގަ ކުރައްވައި ނައިބްރައީސް ވިދާޅުވީ، ކޮވިޑުގެ ދަތި އުނދަގޫތަކުގެ ތެރޭގައި ދިވެހިންނަށްވެސް އެކަން ތަޖުރިބާ ކުރެވިފައިވާ ކަމަށެވެ. އެގޮތުން ޓެކްނޮލޮޖީއާއެކު އެތައް ކަންތައްތަކެއް ފަސޭހަވެގެންދިޔަކަމަށްވެސް ނައިބްރައީސް ވިދާޅުވިއެވެ.
ނައިބްރައީސް ވިދާޅުވީ، އޭގެ ތެރެއިންވެސް ބާޒާރު ކުރުމުގެ ކަންކަމަށް އައި ބަދަލުތައް ފާހަގަ ކުރެވިގެންދާ ކަމަށެވެ. ރާއްޖޭގެ ޒުވާނުންނާއި ރައްޔިތުންނަކީވެސް މިކަހަލަ ކަންކަމަށް ނުހަނު ފަސޭހައިން އަހުލުވެރިވާ ބައެއްކަމަށް ނައިބްރައީސް ވިދާޅުވިއެވެ.
އޭގެ އިތުރުން، ޓެކްނޮލޮޖީގެ ދާއިރާއިން ޒުވާނުން ކުރި ހޯދަމުންދާ މިންވަރުގެ މައްޗަށްވެސް ނައިބްރައީސްގެ ވާހަކަފުޅުގައި އަލިއަޅުވާލައްވާފައިވެއެވެ. އެގޮތުން ރާއްޖެއާއި ދުނިޔޭގައިވެސް ދިވެހިން މި ދާއިރާތަކުގައި ފައިތިލަ ސާބިތު ކުރަމުންދާކަން ނައިބްރައީސް ފާހަގަ ކުރެއްވިއެވެ.
ނައިބްރައީސް ވިދާޅުވީ، ރައްޔިތުންނަށް ފަސޭހަ ޚިދުމަތްތަކެއް ހޯދައިދިނުމަށްޓަކައި މި ސަރުކާރުން އިސްވެ ގިނަ މަސައްކަތްތަކެއްވެސް ކުރަމުންދާ ކަމަށެވެ. އެގޮތުން ކުރަން ޖެހޭ ގިނަ ކަންތައްތައް ހުރިއިރު، އެކަމަށް ވަގުތު ނުހަނު މަދުކަމަށް ނައިބްރައީސް ވިދާޅުވިއެވެ.
ސަރުކާރުގެ އަމާޒަކީ ރައްޔިތުންގެ ވަގުތު ބޭކާރު ނުވާނެ ގޮތްތަކަށް ޚިދުމަތްތައް ފަހިކޮށްދިނުންކަމަށް ނައިބްރައީސް ވިދާޅުވިއެވެ.
އޭގެ އިތުރުން، ދުނިޔޭގެ ކުރިއަރާފައިވާ ޤައުމުތައްވެސް ކުރިއަރާފައި އޮތީ މަސައްކަތް ކޮށްގެންކަމަށް ނައިބްރައީސްގެ ވާހަކަފުޅުގައި ފާހަގަ ކުރެއްވިއެވެ. އެކަމުގައި ވަގުތު ބޭކާރު ކުރެވެން ނެތްކަމަށް ނައިބްރައީސް ވިދާޅުވިއެވެ.
