އެމްއާރްއެމުން ރިޔާސީ ޕްރައިމަރީއަށް ހުޅުވާލައިފި
ޖުލައި 27 ވަނަ ދުވަހުގެ ހަވީރު 16:00 އާ ހަމައަށް ފޯމްތައް ހުށަހެޅޭނެ
އެމްއެމްއާރްއެމް ބޭއްވި ނޫސްވެރިންގެ ބައްދަލުވުމެއްގެ ތެރެއިން
މޯލްޑިވްސް ރިފޯމް މޫވްމަންޓް (އެމްއާރްއެމް)ގެ ފަރާތުން ރިޔާސީ އިންތިޚާބުގައި ވާދަކުރާނެ ކެންޑިޑޭޓެއް ކަނޑައެޅުމަށް ޕްރައިމަރީއަށް ކުރިމަތިލުމުގެ ފުރުސަތު ހުޅުވާލައިފިއެވެ.
އެޕާޓީން ކުރި އިއުލާނެއްގައި ބުނީ އެމްއާރްއެމްގެ ޓިކެޓުގައި ވާދަކުރަން ބޭނުންވާ މެންބަރުން އެކަމަށް އެދި ހުށަހެޅުމުގެ ފުރުސަތު ޖުލައި 27 ވަނަ ދުވަހުގެ ހަވީރު 16:00 އާ ހަމައަށް ހުޅުވާލާފައިވާ ކަމަށެވެ. ސުންގަޑި ހަމަވުމަށް ފަހު ކުރިމަތިލާ ކެންޑިޑޭޓުންގެ ނަން އިއުލާންކޮށް، ވޯޓުލާން ހަމަޖެހިފައިވަނީ އަންނަ މަހުގެ އެކެއްގައެވެ. އެމްއާރްއެމުން ބުނީ، ޕްރައިމަރީގެ ވޯޓުލުން ކުރިއަށް ދާނީ އޮންލައިންކޮށް ކަމަށެވެ.
އެމްއާރްއެމުން ރިޔާސީ ޕްރައިމަރީއަށް ހުޅުވާލާފައިވާއިރު 2023ގެ ރިޔާސީ އިންތިހާބަށް ކުރިމަތިލައްވަން އެމްއާރުއެމްގެ ރައީސް އަޙްމަދު ފާރިސް މަޢުމޫން ނިންމަވާފައިވާ ކަމަށާއި އެކަމާމެދު ރަސްމީކޮށް ގޮތެއް ނިންމާނީ އެކްސްކޯ އިން ކަމަށް ވެސް އެޕާޓީން ވަނީ ބުނެފައެވެ.
އީސީން ވަނީ ޖޫން މަހުގެ ނިޔަލަށް ސިޔާސީ ޕާޓީތަކުގެ ދަފްތަރުގައި ތިބި މެންބަރުންގެ އަދަދު ހާމަކޮށްފައެވެ. މި ދަފްތަރުގައިވާގޮތުން ޖޫންމަހުގެ ނިޔަލަށް އެމްއާރްއެމްގައި ތިބީ 2،892 މެންބަރުންނެވެ. އެމްއާރްއެމްއަކީ މިވަގުތު އޮތް ސިޔާސީ ޕާޓީތަކުގެ ތެރެއިން 3،000 މެންބަރުން ހަމަނުވާ ހަމައެކަނި ޕާޓީއެވެ.
އެމްއާރުއެމަށް 3،000 މެންބަރުން ހަމަނުވުމުގެ މައްސަލައާ ކުރިމަތިވެފައިވާއިރު އެ އަދަދު ހަމަނުވާކަން ބަޔާންކޮށް އީސީ އިން ވަނީ އެމްއާރުއެމް އުވާލުމަށް ވެސް ނިންމާފައެވެ. ނަމަވެސް އެމްއާރްއެމުން އެ މައްސަލަ ސިވިލް ކޯޓަށް ހުށަހެޅުމުން އެ ޕާޓީ އުވާލުމުގެ އެއްވެސް ކަމެއް ނުކުރަން އީސީގެ މައްޗަށް އަމުރުކޮށްފައިވެއެވެ.
ނަމަވެސް އީސީން އާންމުކުރި މައުލޫމާތުގައި އެމްއާރްއެމްގެ ގިނަ މެންބަރުން އުނިކޮށްފައިވާކަމަށް ވެސް އެޕާޓީން ވަނީ ތުހުމަތުކޮށްފައެވެ.
އެމްއާރްއެމްއިން ނެރުނު ބަޔާނެއްގައި ބުނީ އެ ޕާޓީއާ ގުޅޭގޮތުން އީސީން އެކި ފަހަރުމަތިން ސައްހަ ނޫން މައުލޫމާތު އާންމުކުރަމުންދާތީ ކަންބޮޑުވާކަމަށެވެ. މިގޮތުން އީސީން އެންމެ ފަހުން އާންމުކުރި މައުލޫމާތުގައިވެސް އެ ޕާޓީގެ ގިނަ އަދަދެއްގެ މެންބަރުން އުނިކޮށްފައިވާކަމަށް އެމްއާރްއެމްއިން ބުނެފައިވެއެވެ.
އަދި ރިޔާސީ އިންތިހާބާ ގުޅޭ ގޮތުން ބާއްވާ އީސީގެ ބައްދަލުވުންތަކުގައި އެމްއާރުއެމްއަށް ފުރުސަތު ނުދޭތީ އެ ޕާޓީން ވަނީ ކަންބޮޑުވުން ފާޅުކޮށްފައެވެ.
