ކިމިކް ބުނަނީ އޭނާ ހުންނާނީ ބަޔާންގައި ކަމަށް!

އެހެން ކުލަބަކަށް ބަދަލުވުމުގެ އެއްވެސް ވިސްނުމެއް ނެތް ކަމަށާއި، ހުންނަން ބޭނުންވަނީ ބަޔާން މިއުނިކުގައި ކަމަށް އެ ޓީމަށް ކުޅެމުން އަންނަ ޖަރުމަނުގެ ޑިފެންސިވް މިޑްފީލްޑަރު ޔޯޝުއާ ކިމިކް ބުނެފި އެވެ.

ކިމިކް މިހެން ބުނީ އޭނާގެ މުސްތަޤުބަލާ ގުޅިވައިގެން ޖަރުމަނުގެ މީޑިއާތަކުގެ އިތުރުން އެހެނިހެން މީޑިއާތަކުގައި އެކި ގޮތްގޮތަށް ވާހަކަ ދެކެވެމުން އައި ވަގުތެއްގަ އެވެ. އެގޮތުން ސްޕެއިންގެ ބާސެލޯނާ އަށް ބަދަލުވުމަށް އޭނާ ވިސްނަމުން އައި ކަމަށް ވަނީ ބުނެފަ އެވެ. ނަމަވެސް ކިމިކް ބުނެފައި ވަނީ، ބަޔާންގައި އޭނާ ހުންނާނެ ކަމުގެ ޔަގީންކަން ދޭ ކަމަށެވެ. އޭނާއާ ގުޅުވައި މީޑިއާ ތަކުގައި ދެކެވެމުން ދަނީ ދޮގު ވާހަކަތަކެއް ކަމަށް ވެސް ކިމިކް ވަނީ ބުނެފަ އެވެ. އިތުރަށް އޭނާ ބުނީ، އަންނަ ސީޒަނުގައި ކުޅޭނީ ވެސް ބަޔާނަށް ކަމަށާއި، އޭނާގެ ވިސްނުމަކަށް އެއްވެސް ބަދަލެއް ނާންނަ ކަމަށެވެ.

ބަޔާންގައި ޖަރުމަނު ލީގު އަދި ޔޫރަޕުގައި ވެސް ފެންވަރު ރަނގަޅު މޮޅު ޓީމެއްކަން ފާހަގަކޮށް ކިމިކް ބުނީ، މިހާރު ބޭނުންވަނީ އަންނަ ސީޒަނުގައި ރަނގަޅު ކާމިޔާބީތަކެއް ހޯދުން ކަމަށެވެ. ނިމުނު ސީޒަނުގައި ބަޔާނަށް އެންމެ އެކަށީގެންވާ ފެންވަރުގެ ނަތީޖާއެއް ނުނެރެވުނު ނަމަވެސް، ކުރިއަށް އޮތް ސީޒަނުގައި އެކަން ބަދަލު ކުރެވޭނެ ކަމަށް އޭނާ ޤަބޫލު ކުރެ އެވެ. ކިމިކް ބުނީ ޓީމުގެ ކުޅުންތެރިންނާއި ކޯޗިން އޮފިޝަލުން ވެސް މަސައްކަތް ކުރަނީ ޓީމަށް ރަނގަޅު ނަތީޖާއެއް ހޯދައިދިނުމަށް ކަމަށާއި، އެހެންކަމުން އެ އުންމީދުތައް ހާސިލް ކުރަން ބޭނުންވާ ކަމަށެވެ.

އާރްބީ ލައިޕްޒިގް ދޫކޮށް ކިމިކް ބަޔާނަށް ބަދަލުވީ 2015 ވަނަ އަހަރު އެވެ. އޭގެ ފަހުން އޭނާ ވަނީ މިހާތަނަށް އެ ކުލަބުގައި ހޭދަ ކުރި އަށް އަހަރުގެ ތެރޭގައި 347 މެޗު ކުޅެދީ، 40 ލަނޑު ޖަހައިފަ އެވެ. ބަޔާނާއެކު އޭނާ ވަނީ 20 ތައްޓެއް ކާމިޔާބުކޮށްފަ އެވެ. ބަޔާނާއެކު ކިމިކް މިހާރު ހަދާފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ.