ފޫޓްބޯލް އެސޯސިއޭޝަން އޮފް މޯލްޑިވްސް އެފްއޭއެމް އިން އިންތިޒާމުކޮށްގެން ކުރިއަށްގެންދާ މައިލޯ ވިމެންސް ފުޓްސަލް މުބާރާޓުގެ ސެމީފައިނަލަށް އަވ އެފްޓީ އާއި ޓީރެކްސް ދަތުރުކޮށްފިއެވެ.

ދެ ގުރޫޕަކަށް ބަހާލައިގެން ކުރިއަށްގެންދާ މި މުބާރާތުގެ ގުރޫޕް 2 ގެ ފަހު މެޗުތަށް ކުޅެ ނިމިފައި ވާއިރު، އަވަ އެފްޓީއިން ސެމީގެ ޖާގައެއް ހޯދީ ޖުމްލަ 9 ޕޮއިންޓާއިއެކު ގުރޫޕް 2 ގެ އެއްވަނަ ޓީމުގެ ގޮތުގައެވެ. ޓީރެކްސް އިން ސެމީގެ ޖާގައެއް ހޯދީ 6 ޕޮއިންޓާއިއެކު ގުރޫޕުގެ ދެވަނަ ޓީމުގެ ގޮތުގައެވެ.

ހުކުރު ދުވަހުގެރޭ މި ގުރޫޕުގެ ފަހު މެޗުތަށް ކުޅެ ނިމިފައި ވާއިރު، އަވަ އެފްޓީއިން ގުރޫޕުގެ އެއްވަނަ ހޯދީ ހުކުރު ދުވަހުގެ ރޭ ކުޅުނު މެޗުން ޓީރެކްސް ބަލިކޮށްގެންނެވެ. މި މެޗް އަވަ އެފްޓީއިން ކާމިޔާބުކުރީ 4-1 ގެ ނަތީޖާއަކުންނެވެ. އަވަ އެފްޓީގެ ފާތިމަތު އަލްމާ އާއި ފަދުވާ ޒާހިރު ވަނީ ކޮންމެ ކުޅުންތެރިއަކު ދެލަނޑު ކާމިޔާބުކޮށްދީފައެވެ. ޓީރެކްސް ގެ ހަމައެކަނި ލަނޑު ކާމިޔާބުކޮށްދިނީ އަރޫޝާ އަހުމަދެވެ. މެޗުގެ މޮޅު ކުޅުންތެރިއަކަށް ހޮވުނީ އަވަ އެފްޓީގެ ފަދުވާ ޒާހިރެވެ.

ހުކުރު ދުވަހުގެރޭ ކުޅުނު އަނެއް މެޗުގައި އިކުއެޓޯރިއަލްގެ މައްޗަށް ޒެނިތް ސްޕޯޓްސް އިންވަނީ 3-1 ގެ ނަތީޖާއަކުން ކުރިހޯދާފައެވެ. ޒެނިތުގެ ލަނޑުތަށް އައިޝަތް ސަމާ އާއި އައިޝަތް އަބްދުލް ރައްޒާގް ކާމިޔާބުކޮށްދިންއިރު، ސަމާ ވަނީ ދެ ލަނޑު ކާމިޔާބުކޮށްދީފައެވެ. އިކުއެޓޯރިއަލްއަށް ސުން ކަނޑުވާލަދިނީ މަރިޔަމް އަހުމަދެވެ. މެޗުގެ މޮޅު ކުޅުންތެރިއަކަށް ހޮވުނީ ޒެނިތަށް ދެ ލަނޑު ކާމިޔާބުކޮށްދިން ސަމާ އެވެ.

އަވަ އެފްޓީ އާއި ޓީރެކްސް އާއި ދެކޮޅަށް ސެމީގައި ވާދަކުރާނެ ދެޓީމެއް ޔަގީން ވެގެންދާނީ ގުރޫޕް 1 ގެ ފަހު ދެމެޗަށް ފަހުގައެވެ.

މިއީ އެފްއޭއެމްއިން ރާވާ ހިންގާ ފުރަތަމަ އަންހެން ފުޓްސަލް މުބާރާތަށް ވާއިރު މި މުބާރާތުގައި ކޮންމެ ޓީމަކަށްވެސް ގައުމީ އަންހެން ފުޓުބޯޅަ ޓީމަށް ނިސްބަތްވާ 2 ކުޅުންތެރިއަކަށް ކުޅެވެއެވެ. ނަމަވެސް އެއްވެސް ބިދޭސީ ކުޅުންތެރިއަކަށް ނުކުޅެވެއެވެ.