ގދ. ތިނަދޫގައި އަލަށް ތަރައްޤީ ކުރަމުން އަންނަ 6.5 ކިލޯ މީޓަރުގެ މަގުގެ ތާރު އެޅުމުގެ މަސައްކަށް ނިމިފައިވާ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ން ބުނެފިއެވެ.

އާރުޑީސީން ބުނީ ތިނަދޫގައި އަލަށް ތަރައްޤީ ކުރަމުން އަންނަ 6.5 ކިލޯ މީޓަރުގެ މަގުގެ ތާރު އެޅުމުގެ މަސައްކަތް ނިމިފައިވާ ކަމަށާއި، މި ވަގުތު ކުރިއަށް ދަނީ އަލަށް އިތުރު ކުރެވުނު 500 މީޓަރުގައި ތާރު އެޅުމުގެ މަސައްކަތް ކަމަށެވެ.

ތިނަދޫ މަގު ހެދުމުގެ ފުރަތަމަ ފިޔަވަހީގެ މަސައްކަތް ނިންމުމަށްފަހު ދެވަނަ ފިޔަވަހީގެ މަސައްކަތް ކުރަމުންދާއިރު، ދެވަނަ ފިޔަވަހީގައި ބޮޑު 14 މަގެއް ޒަމާނީ ފެންވަރަށް ތަރައްޤީ ކުރުމަށް ހަމަޖެހިފައިވެއެވެ.

އެގޮތުން އެމަގުތަކުގައި ފެން ހިންދާ ނިޒާމު ޤާއިމުކޮށް، މަގު ބައްތި ޖެހުމާއި، ސްޕީޑް ބްރޭކަރު ހަރުކުރުމާއި، މަގުގައި ނިޝާން ހަރުކުރުން އަދި ޒިބްރާ ކްރޮސް އަޅާނެއެވެ.

ޒަމާނީ ފެންވަރަށް މަގުތައް ތަރައްޤީކުރާއިރު، މި މަޝްރޫއަށް 78 މިލިއަނަށްވުރެ ގިނަ ރުފިޔާ ހޭދަވާނެ ކަމަށް އާރްޑީސީން ބުނެއެވެ.

އާބާދީގައި 6000ށް ވުރެ ގިނަ މީހުން އުޅޭ ތިނަދޫއަށް ވާރޭ ވެހިއްޖެނަމަ ފެން ބޮޑުވާ މައްސަލަ ވަރަށް ބޮޑެވެ. ޒަމާނީ ފެންވަރަށް މަގުތައް ހެދިގެން ދިއުމާއެކު ފެން ބޮޑުވުމުގެ މައްސަލައަށް ހައްލު ލިބޭނެ ކަމަށް އާރްޑީސީން ބުނެފައިވެއެވެ.