ބޯކޮށް ވާރޭ ވެހި މާލޭގައި ފެންބޮޑުވެއްޖެ އެވެ.
މަގުތަކުގައި ފެންބޮޑުވުމުގެ މައްސަލަ ހައްލުކުރުމަށް ހައުސިންގް މިނިސްޓްރީން މާލޭގެ ބައެއް މަގުތަށް ހަދާފައިވާއިރު، އެ މަގުތަކުގައި ވެސް މިއަދު ވަނީ ފެންބޮޑުވެފަ އެވެ.
މާލޭ ސިޓީ ކައުންސިލްގެ މެމްބަރު ޝަމާއު ޝަރީފް ވިދާޅުވީ މާލޭގެ މަގުތަކުގައި ފެންބޮޑުވުމުގެ މައްސަލަ ހައްލުކުރެވޭނީ އެކަށީގެންވާ ދިރާސާއެއް ކުރުމަށް ފަހު މަގުތައް މަރާމާތުކުރުމުން ކަމަށެވެ. މަގުތަކުގެ މައްސަލަ ހައްލުކުރުމަށް ހައުސިން މިނިސްޓްރީން މަސައްކަތް ކޮށްފައި ވަނީ މާބޮޑު ދިރާސާއެއް ނުކޮށް ކަމަށް އޭނާ ވިދާޅުވި އެވެ.
" ލެވަލިންގެ މައްސަލަ ހައްލު ނުކުރުމުން މަގުތަކުގައި ފެންބޮޑުވަނީ، ވާރޭ ވެހުމާއި އެކު ފެންބޮޑުވަނީ، މިސާލަކަށް މަޖީދީ މަގުގެ ވެސް ބައެއް ހިސާބުތަކުގައި، އެއީ އަސްލު މަގު ހެދި އިރު ލެވެލް ނުކުރުމުން އެ ފެންބޮޑުވަނީ" ޝަމާއު ވިދާޅުވި އެވެ.
ހުކުރު ދުވަހު މެންދުރު ވެހުނު ވާރާއާއެކު ގަޑިއެއްހާއިރު ތެރޭގައި މަޖީދީމަގު ނަލަހިޔާ ކަންމައްޗާއި، މަޖީދީ މަގާއި މާވެޔޮމަގު ގުޅުނު ކަންމަތީގައި ފެންބޮޑުވި އެވެ. މީގެ އިތުރުން އައިޖީއެމްއެޗް ސަރަހައްދާއި މާފަންނުގެ ބައެއް އެހެން ސަރަހައްދުތަކުގައި ވެސް ފެންބޮޑުވި އެވެ.
ބައެއް މަގުތަކުގައި ފެންބޮޑުވުމާ ގުޅިގެން އާންމުނަން ދަނީ ދަތިތަކާއި ކުރިމަތިވަނުނެވެ. މާދަމާއަކީ ރަމަޟާން މަހުގެ ފުރަތަމަ ދުވަހަށް ވުމުން ގިނަ ބަޔަކު ދަނީ ރަމަޟާން މަހަށް ތައްޔާރުވުމުގެ ގޮތުން ބާޒާރުކުރަމުނެވެ. ފެން ބޮޑުވުމުގެ ސަބަބުން، ހިނގާ މީހުންނާއި ދުއްވާއެއްޗިހި ދުއްވަން ދަތިތަކާ ވަނީ ދިމާވެފަ އެވެ.
ހައުސިން މިނިސްޓަރ މުއިއްޒު މީގެ ކުރިން ވިދާޅުވެފައި ވަނީ މާލޭގެ މަގުތަކުގެ މައްސަލަ މިހާރު ހައްލުކުރެވިފައިވާ ކަމަށެވެ. އެހެންވެ، މަގުތަކުގައި ފެންބޮޑުވާ ހަދާން ވެސް ރައްޔިތުން ނުވާކަމަށް މިނިސްޓަރ މުއިއްޒް މީގެ ކުރިން ވެސް ވިދާޅުފައެވެ.
