ބާސެލޯނާގެ ގިނަ ކުޅުންތެރިންތަކެއް ބަލިވެ، ޔުވެންޓަސްއާ ކުޅޭ މެޗު ފަސްކޮށްފި
23 ޖުލައި 2023 | އާދީއްތަ 14:00ބުދަ ދުވަހު ބާސެލޯނާ ނިކުންނާނީ އާސެނަލްއާ ދެކޮޅަށް
ބާސެލޯނާގެ ފަރިތަކުރުންތަކުގެ ތެރެއިން
ބާސެލޯނާގެ ގިނަ ކުޅުންތެރިންތަކަކަށް ހޮޑުލެވި، ބޭރަށް ހިނގުން ޖެހުމުން ޕްރީ ސީޒަންގައި ޔުވެންޓަސްއާ ދެކޮޅަށް ކުޅޭ މެޗު ފަސްކޮށްފިއެވެ.
މިހާރު އެމެރިކާގައި ކުރިޔަށްދާ ސޮކާ ޗެމްޕިއަންސް ޓުއާގައި ހޮނިހިރު ދުވަހު ބާސެލޯނާއާއި ޔުވެންޓަސް ބައްދަލުކުރުމަށް ވަނީ ހަމަޖެހިފައެވެ. ނަމަވެސް، ބާސެލޯނާ ޓީމުގެ ތެރޭގައި ބަލި ފެތުރިފައިވުމުން, ކެލިފޯނިއާގެ ސެންޓަ ކްލާރާ ސްޓޭޑިއަމްގައި ކުޅުމަށް ހަމަޖެހިފައިވާ މެޗު ފަސްކުރިއެވެ.
ބާސާއިން ނެރުނު ބަޔާނެއްގައި ބުނެފައިވަނީ ސްކޮޑުގެ ބޮޑު ބަޔަކަށް ވައިރަލް ގެސްޓްރޯއެންޓެރައިޓިސް ޖެހިފައިވާކަމަށެވެ. ރިޕޯޓުތައް ބުނާގޮތުން މިހާތަނަށް ޓީމުގެ 14 ކުޅުންތެރިންނަށް ވަނީ މި ބަލި ޖެހިފައެވެ. މިއާއެކު ޔުވެންޓަސްއިން ވަނީ ލެވިސް ސްޓޭޑިއަމްގައި ޓްރެއިނިން ސެޝަނެއް ބާއްވަން ނިންމާފައެވެ.
ސޮކާ ޗެމްޕިއަންސް ޓުއާގައި ބާސެލޯނާ ދެން ކުޅޭ މެޗުގައި އަންނަ ބުދަ ދުވަހުގެ ރޭ ނިކުންނާނީ އާސެނަލްއާ ދެކޮޅަށެވެ. އެއަށްފަހު ހޮނިހިރު ދުވަހު ކުޅޭނީ ރެއާލް މެޑްރިޑާއެވެ.
ބާސެލޯނާގެ ރައީސް ހުއާން ލަޕޯޓާ ވިދާޅުވީ އުއްމީދަކީ ވީހާވެސް އަވަހަށް ކުޅުންތެރިން ރަނގަޅުވުން ކަމަށެވެ. އަދި މިއީ ކުޅުންތެރިންނާއި ސަޕޯޓަރުންނަށް ދަތި ދަނޑިވަޅެއް ކަމަށެވެ.
މި ވައިރަހުގެ އަސަރު ސްކޮޑަށް ކުރިނަމަވެސް، ބާސެލޯނާއިން ބުނީ އަންނަ ބުދަ ދުވަހު އާސެނަލްއާ ދެކޮޅަށް ބާސެލޯނާ ކުޅޭ މެޗު ކުރިއަށްދާނެ ކަމުގެ ޔަގީންކަން އެބައޮތް ކަމަށެވެ.
