ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޓެކްނިކަލް ޑިރެކްޓަރުގެ މަގާމަށް އިންގްލެންޑުގެ ޕޯލް ތޯމަސް ސްމޯލީ ހަމަޖައްސައިފި އެވެ.
ޕޯލް އެންމެ ފަހުން މަސައްކަތް ކޮށްފައި ވަނީ ބަންގްލަދޭޝްގެ ޓެކްނިކަލް ޑިރެކްޓަރަކަށެވެ. އެފްއޭއެމްގެ ޓެކްނިކަލް ޑިރެކްޓަރުގެ މަގާމަށް ޕޯލް ހަމަޖެއްސިކަން އެފްއޭއެމް އިން ރަސްމީކޮށް އިއުލާން ކޮށްފައި ވަނީ އެކަމަށްޓަކައި ގަލޮޅު ރަސްމީ ދަނޑުގައި އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގަ އެވެ. އޭގެ ކުރިން ވެސް ޕޯލް އައީ ރާއްޖެ އައިސް އެފްއޭއެމްގައި މަސައްކަތް ކުރަމުންނެވެ. އެފްއޭއެމުން ޕޯލާއެކު ހަދާފައިވަނީ ފަސް އަހަރު ދުވަހުގެ އެއްބަސްވުމެކެވެ. ޕޯލްގެ މުސާރަ ހަމަޖެހިފައި ވަނީ ސްޕޮންސަރޝިޕެއްގެ ތެރެއިން ކަމަށް އެފްއޭއެމްގެ ރައީސް ބައްސާމް އަދީލް ޖަލީލް ވަނީ ވިދާޅުވެފަ އެވެ. ބައްސާމް ވިދާޅުވީ އެއީ ޤަތަރުގެ ފުޓުބޯޅަ އެސޯސިއޭޝަންގެ ފަރާތުން އެފްއޭއެމަށް ލިބުނު ސްޕޮންސަރޝިޕެއް ކަމަށެވެ. ޤަތަރުގެ އެފްއޭ އާއި އެފްއޭއެމާ ދެމެދު ވަކި ގޮތަކަށް އެއްބަސްވެފައިވާތީ ޕޯލްގެ މުސާރަ ހާމަކޮށްފައެއް ނުވެ އެވެ.
ބައްސާމް ވިދާޅުވީ މިއީ ޓެކްނިކަލީ ރާއްޖޭގެ ފުޓުބޯޅަ އަށް ގެންނަން ބޭނުންވާ ބަދަލުތަކުގެ ތެރެއިން ކުރެވުނު ކަމެއް ކަމަށެވެ. އަދި ބޭނުންވަނީ ކަމުގެ އެންމެ ތަޖުރިބާކާރުންގެ އެހީތެރިކަމާއެކު ކުރިއަށް ދާން ކަމަށް ވެސް ބައްސާމް ވިދާޅުވި އެވެ. އެފްއޭއެމްގެ ޓެކްނިކަލް ޑައިރެކްޓަރަކަށް ޕޯލް ހަމަޖެއްސީ އަހަރު ދުވަހުގެ މަޝްވަރާތަކަށްފަހުކަން ފާހަގަ ކުރައްވާ ބައްސާމް ވިދާޅުވީ، ޕޯލް ހަމަޖައްސަން ނިންމި މައިގަނޑު ސަބަބަކީ އޭނާ އަކީ މި ސަރަހައްދުގެ ފުޓުބޯޅަ ވަރަށް ރަނގަަޅަށް ދަންނަ މީހަކަށްވުން ކަމަށެވެ. ހަމައެއާއެކު ރާއްޖޭގެ ފުޓުބޯޅަ މިހާރު އޮތް ޙާލަތާއި، އެ ޙާލަތު ބަދަލު ކުރެވޭނެ ގޮތާއި، ޕޯލްގެ ފަރާތުން ރާއްޖެ އަށް ދިގު މުއްދަތުގެ ޕްލޭނެއް ހެދުމުގެ މަޝްވަރާތައް ކުރިއަށް ގެންދިޔަ ކަމަށް ބައްސާމް ވިދާޅުވި އެވެ.
ޕޯލް އަކީ މި ސަރަހައްދު ވަރަށް ބޮޑަށް ބަލާފަ އޮތީ. އެއީ ބަންގްލަދޭޝްގައި މަސައްކަތް ކޮށްފައި އޮތީމަޔާ އެކީގައި. އަދި ކޮންމެ ފަހަރު ސާފްގެ އޭޖް ގްރޫޕް ތަކާއި، އަންހެން މުބާރާތްތަކާއި، ސާޗް ޗެމްޕިއަންޝިޕް އަންނައިރު، ވަރަށް ބޮޑަށް ޓެކްނިކަލީ ރާއްޖޭގެ ކަންކަން ބެލިފައި އޮތީ.ބައްސާމް އަދީލް ޖަލީލް / އެފްއޭއެމްގެ ރައީސް
ޕޯލް އާއެކު ކުރިއަށްދާ މަޝްވަރާތަކަށްފަހު އެފްއޭއެމް އިން އެކުލަވާލާ ޕްލޭން ކުރިއަށް އޮތް ދުވަސްތަކުގެ ތެރޭގައި ފައިނަލް ކުރެވިގެން ދާނެ ކަމަށް ބައްސާމް ވިދާޅުވި އެވެ. މިހާރު ޑްރާފްޓް ކުރެވިފައިވާ ޕްލޭން އަށް އަލިއަޅުވާލާ ބައްސާމް ވިދާޅުވީ، ރާއްޖޭގެ އެކި ކަންކޮޅުތަކުގައި ސަރުކާރުން ޤާއިމު ކުރަމުންދާ ފުޓުބޯޅަ ދަނޑުތަކުގެ ބޭނުން ހިފުމަށް މަސައްކަތް ކުރާ ކަމަށެވެ. އެގޮތުންް އެކި ސަރަހައްދުތަކުގައި ޓެލެންޓް ސެންޓަރުތައް ޤާއިމުކުރުމަށްފަހު، ފުޓުބޯޅައިގެ ހުނަރު ދެނެގަނެގެން ކުރިއަށް ދިޔުމަށް ބޭނުންވާ ކަަމަށް ވަނީ ވިދާޅުވެފަ އެވެ.
މިއީ ޓެކްނިކަލީ ފުޓުބޯޅަ އަށް ގެންނަން ބޭނުންވާ ބަދަލުގެ ތެރެއިން ނިންމާފައިވާ ކަމެކެވެ. ކުރިއަށް އޮތް ދުވަސްތަކުގެ ތެރޭގައި ޕޯލް، ޤައުމީ ޓީމުތަކުގެ ޓެކްނިކަލް އޮފިޝަލުންނާއި ރާއްޖޭގެ ކުލަބުތަކުގެ ކޯޗުންނާ ވެސް ބައްދަލު ކުރާނެ އެވެ.
