ތޯމަސް ޕާޓޭ އާސެނަލްގައި މަޑުކުރާނެ ކަމަށް އުންމީދުކުރަން: އާޓެޓާ

މިޑްފީލްޑަރު ތޯމަސް ޕާޓޭގެ މުސްތަގުބަލާ މެދު ސުވާލު އުފެދިފައިވީ ނަމަވެސް ޕްރިމިއާ ލީގުގެ ކްލަބުގައި މަޑުކުރާނެ ކަމަށް އުއްމީދުކުރާ ކަމަށް އާސެނަލްގެ ކޯޗު މިކޭލް އާޓެޓާ ބުނެފިއެވެ.

އާސެނަލްއިން އެމެރިކާއަށް ކުރި ދަތުރުގައި ޕާޓޭ ބައިވެރިވީ އެހެން ކުޅުންތެރިންނަށްވުރެ ފަހުންނެވެ. އެމެރިކާގައި އާސެނަލްއިން ވަނީ ޕްރީ ސީޒަން ތިން މެޗެއް ކުޅުމަށް ނިންމާފައެވެ. އުމުރުން 30 އަހަރުގެ ޕާޓޭ އަކީ ސައުދީ ޕްރޯ ލީގުގެ އަލް އަހްލީއިން ހޯދުމަށް މަސައްކަތް ކުރާ ގިނަ ކުޅުންތެރިންގެ ތެރޭގައި ހިމެނޭ ކުޅުންތެރިއެކެވެ.

މިދިޔަ ހަފުތާގައި ވެސްޓް ހޭމްގެ ޑެކްލަން ރައިސް 100 މިލިއަން ޕައުންޑަށް ސޮއިކުރުމާ އެކު، ޕާޓޭ ދޫކޮށްލާނެ ކަމުގެ އިޝާރާތެއް ލިބުނެވެ. ނަމަވެސް، އޭނާ މަޑުކުރާނެތޯ އާޓެޓާ ކައިރީގައި އެހުމުން އާޓެޓާ ބުނީ، ޕާޓޭ އަކީ ޓީމަށް ވަރަށް މުހިންމު ކުޅުންތެރިއެއް ކަމަށެވެ. އަދި ޕާޓޭ އާ ވާހަކަދެކެވޭ ކޮންމެ ފަހަރަކު އޭނާ މަޑުކުރަން ބޭނުންވާ ވާހަކަ ބުނާކަމަށް އާޓެޓާ ބުންޏެވެ.

އެތުލެޓިކޯ މެޑްރިޑުން ޕާޓޭ އާސެނަލްއާ ގުޅުނީ 2020 ވަނަ އަހަރުއެވެ. އާސެނަލް އިން ވަނީ އޭނާގެ 45.3 މިލިއަން ޕައުންޑްގެ ރިލީޒް ކްލޯޒް އެކްޓިވޭޓް ކޮށްފައެވެ.

ޕާޓޭ ވަނީ މިދިޔަ ސީޒަނުގައި ޕްރިމިއާ ލީގުގައި އާސެނަލްއަށް 33 މެޗު ކުޅެ، ތިން ލަނޑު ޖަހާފައެވެ.