މިނިވަން ދުވަހުގެ ތައްޔާރީތަކަށް ޖުމްހޫރީ މައިދާން މިރޭ ބަންދުކުރަނީ
މިރޭ 8:00 ން 11:00 އަށް އާންމު ދަތުރުފަތުރަށް އެސަރަހައްދު ބަންދުވާނެ
ރާއްޖޭގެ 57 ވަނަ މިނިވަން ދުވަސް
މިނިވަން ދުވަހުގެ ތައްޔާރީތަކަށް މިރޭ ޖުމްހޫރީ މައިދާން ބަންދުކުރާނެކަމަށް ފުލުހުން ބުނެފިއެވެ.
ފުލުހުން ބުނީ މިނިވަން ދުވަހުގެ ހަރަކާތްތަކުގެ ރިހާސަލް އަށް މިރޭ 8:00 ން 11:00 އަށް އާންމު ދަތުރުފަތުރަށް އެސަރަހައްދު ބަންދުވާނެ ކަމަށެވެ.
މިނިވަން ދުވަހަށް މާލެއާއި ރަށްރަށުން ތައްޔާރީތައް ވަމުން އަންނައިރު އެ ދުވަސް ފާހަގަކުރުމުގެ ގޮތުން 26 ވަނަ ދުވަހު ހެނދުނު ދިދަނެގުން އޮންނާނެއެވެ.
މީގެ އިތުރުން ގައުމީ އިނާމު ދިނުމާއި ހެވިކަމުގެ ކުޅިވަރުތަކާއި ޕެރޭޑު ވެސް ބާއްވާނެއެވެ. މިނިވަން އުފާގެ ނަމުގައި ބާއްވާ ޝޯއެއް ހެނދުނު 6 ން ފެށިގެން ރޭގަނޑު 11 ޖެހުމާއި ހަމައަށް ކުރިއަށްދާނެއެވެ. މީގެއިތުރުން 27 ވަނަ ދުވަހުގެ ހަވީރު ޕެރޭޑް އަދި އެ ރޭ ފުޅަނދުބުރު އޮންނާނެއެވެ. މިނިވަންދުވަހާއި ގުޅިގެން މާލެސިޓީގެ އިތުރުން އައްޑޫ ސިޓީ އަދި ކުޅުދުއްފުށި ސިޓީގައި ހަވާއެރުވާނެއެވެ.
މިދިޔަ އަހަރު ވެސް މާލޭގައި ވަނީ މިނިވަން ދުވަސް ކުލަގަދަކޮށް ފާހަގަކޮށްފައެވެ. އެގޮތުން ދެ އަހަރުގެ މެދުކެނޑުމަކަށް ފަހު މާލޭގައި މިދިޔަ އަހަރު ވަނީ މިލިޓަރީ ޕެރޭޑު ބާއްވާފައެވެ.
