ރިޔާސީ އިންތިޚާބާގުޅޭ ޝަކުވާ ބަލައިގަތުމަށް، ކޮމްޕްލެއިންޓްސް ބިއުރޯ ގާއިމުކޮށްފި
22 ޖުލައި 2023 | ހޮނިހިރު 09:04ކޮމްޕްލެއިންޓްސް ބިއުރޯ ގާއިމުކޮށްފައިވަނީ އިންތިޚާބާބެހޭ މަރުކަޒު، ދަރުބާރުގޭގައި
މިނިވަން މުއައްސަސާތަކުގެ ކޮމިޓީގައި އިލެކްޝަންސް ކޮމިޝަނުގެ މެމްބަރުން
ރިޔާސީ އިންތިޚާބު 2023އާ ގުޅޭ ޝަކުވާތައް ބަލައިގަތުމަށްޓަކައި "ގައުމީ ކޮމްޕްލެއިންޓްސް ބިއުރޯ" ގާއިމުކޮށްފިއެވެ.
ގައުމީ ކޮމްޕްލެއިންޓްސް ބިއުރޯ ގާއިމުކޮށްފައިވަނީ އިންތިޚާބާބެހޭ މަރުކަޒު، ދަރުބާރުގޭގައެވެ.
އިލެކްޝަންސް ކޮމިޝަނުން މައުލޫމާތު ދޭގޮތުގައި، ޝަކުވާ ހުށަހަޅާ ފޯމު ލިބެން ހުންނާނީ އިލެކްޝަންސް ކޮމިޝަނުގެ ވެބްސައިޓުންނާއި، އިންތިޚާބާބެހޭ މަރުކަޒުންނާއި، އިލެކްޝަންސް ކޮމިޝަނުގެ އިދާރާގެ ކައުންޓަރުގެ އިތުރުން، ރަށްރަށުގެ ރަށު ކައުންސިލް އިދާރާ އަދި އަތޮޅު/ސިޓީ ތަކުގައި ގާއިމްކުރެވިފައިވާ އިލެކްޝަންސް ފޯކަލް ޕޮއިންޓުތަކުންނެވެ.
އަދި ރާއްޖެއިން ބޭރުގައި ގާއިމްކޮށްފައިވާ ފޯކަލް ޕޮއިންޓުތަކުންވެސް ޝަކުވާ ހުށަހަޅާ ފޯމު ލިބެން ހުންނާނެކަމަށް އީސީން މައުލޫމާތު ދެއެވެ.
ގައުމީ ކޮމްޕްލެއިންޓްސް ބިއުރޯއަށް ގުޅޭނެ ނަންބަރުތަކަކީ 3004498 އަދި 3004450 އެވެ. ކޮމްޕްލެއިންޓްސް ބިއުރޯގެ އީމެއިލް އެޑްރެހަކީ complaints@elections.gov.mv އެވެ.
އޭގެ އިތުރުން، އީމެއިލް މެދުވެރިކޮށް ފޮނުވާ ޝަކުވާތައްވެސް ބަލައިގަންނާނެކަމަށް އީސީން ބުނެއެވެ. ބިއުރޯ ހުޅުވާފައި ހުންނާނީ ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 8:00ން މެންދުރުފަހު 15:00ށެވެ. ހުކުރު ދުވަހު މެންދުރުފަހު 14:00ން ހަވީރު 17:00ށެވެ.
އިލެކްޝަންސް ކޮމިޝަނުން ބުނީ، ރިޔާސީ އިންތިޚާބު 2023ގެ ގައުމީ އިލެކްޝަން ކޮމްޕްލެއިންޓްސް ބިއުރޯ އުފައްދާފައި ވީނަމަވެސް، އިންތިޚާބާ ގުޅުންހުރި ކޮރަޕްޝަންގެ މައްސަލަތައް ހުށަހަޅަންޖެހޭނީ އެންޓި-ކޮރަޕްޝަން ކޮމިޝަނަށް ކަމަށެވެ. އަދި ބްރޯޑްކާސްޓް ކުރުމާބެހޭ މައްސަލަތައް ހުށަހަޅަންޖެހޭނީ، ބްރޯޑްކާސްޓިންގ ކޮމިޝަނަށެވެ.
