ގދ. މަޑަވެއްޔާއި ހޯނޑެއްދޫ ގުޅާލުމަށް އަޅަމުން އަންނަ ބްރިޖުގެ މަސައްކަތް ނިމި، އަންނަ އަހަރުގެ މާޗު މަހު އެ ބްރިޖުން ދަތުުކުރަން ފެށޭނެ ކަމަށް، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.

ހުވަދު އަތޮޅުގައި އެމްޓީސީސީން ކުރިއަށްގެންދާ މަޝްރޫއުތައް ބައްލަވާލެއްވުމަށް ކުރެއްވި ދަތުރުފުޅުގައި ހޯނޑެއްދޫއަށް ވަޑައިގެން އާޒިމް ވިދާޅުވީ، މަޑަވެއްޔާއި ހޯނޑެއްދޫ ގުޅާލާ ބްރިޖުގެ މަސައްކަތަކީ ދެ ރަށުގެ ރައްޔިތުންނަށް ވެސް ވަރަށް މުހިންމު މަޝްރޫއެއް ކަމަށެވެ. މަޑަވެއްޔާއި ހޯނޑެއްދޫއަށް ދިމާވެފައިވާ ރަށްގިރުމުގެ މައްސަލައިގެ ސަބަބަކީ ކުރީ ސަރުކާރުން ދެ ރަށް ގުޅާލުމަށް އަޅާފައިވާ ވެލި ބެޑު ކަމަށާއި، އެ ވެލި ބެޑު ނެގުމުގެ މަސައްކަތް ކުރަމުން އަންނަ ކަމަށް އޭނާ ވިދާޅުވިއެވެ. މި މަސައްކަތް އަންނަ ޑިސެމްބަރު މަހަށް ނިންމާލެވޭނެ ކަމަށްވެސް އާޒިމް ވިދާޅުވިއެވެ.

އާޒިމް ވިދާޅުވީ ވެލިބެޑު ނެގުމަށްފަހު އެއް ރަށުން އަނެއް ރަށަށް ދަތުރު ނުކުރެވޭގޮތް ހަދަން މަސައްކަތް ކުރާކަމަށް ބުނެ ވާހަކަތައް ދެކެވޭ ކަމަށާއި ނަމަވެސް އެއީ ހަގީގަތާ ޚިލާފު ވާހަކަތަކެއް ކަމަށެވެ. ނަމަވެސް މުޅި މަޝްރޫއު ރާވާފައިވަނީ ދެ ރަށުގެ ރައްޔިތުންނަށް ފަސޭހަކަމާއެކު އެއް ރަށުން އަނެއް ރަށަށް ދަތުރު ކުރެވޭނެ ގޮތަށް ކަމަށް އޭނާ ވިދާޅުވިއެވެ.

މިއީ ގާތްގަނޑަކަށް 79 މިލިއަން ރުފިޔާގެ މަޝްރޫއެއްކަން ފާހަގަކުރައްވައި އާޒިމް ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ބޭނުންފުޅުވަނީ ދެ ރަށަށް ދިމާވެފައިވާ ރަށްގިރުމުގެ މައްސަލަ ހައްލުވެގެންދާގޮތަށް މަޝްރޫއު ކުރިއަށްގެންދިއުމަށް ކަމަށާއި، މަސައްކަތް އެއްކޮށް ނިމުމުން އެކަމަށް ހައްލެއް ލިބިގެންދާނެ ކަމަށެވެ. އެގޮތުން، އަންނަ އަހަރުގެ ފެބްރުއަރީ މަހުގެ ނިޔަލަށް، މަޑަވެއްޔާއި ހޯނޑެއްދޫ ގުޅާލާ ބްރިޖުގެ މަސައްކަތް އެއްކޮށް ނިމޭނެ ކަމަށް އޭނާ ވިދާޅުވިއެވެ.

މަޑަވެއްޔާއި ހޯނޑެއްދޫ ގުޅާލަނީ ދެ ރަށް ދޭތެރޭގައި އޮންނަ ފަޅުރަށާ އެކުގައެވެ. މިހާރު ކުރަމުން އަންނަނީ މަޑަވެއްޔާއި އެރަށް ގުޅާލުމުގެ މަސައްކަތެވެ. މި މަޝްރޫއުގެ މަސައްކަތް ނިމިގެންދާއިރު 1000 ފޫޓުގެ ބްރިޖަކުން ތިން ރަށް ގުޅާލާނެއެވެ.

މި ސަރުކާރުން ގަބޫލުކުރަނީ ކުރާ ކޮންމެ ކަމެއް ކުރަން ޖެހޭނީ ޒަމާނަށް ދެމިގެންދާގޮތަށް، ރައްޔިތުންނަށް ފައިދާވާގޮތަށްކަން ފާހަގަކުރައްވައި އާޒިމް ވަނީ ބްރިޖުގެ މަޝްރޫއު ވެސް ކުރިއަށްދަނީ އެގޮތަށް ކަމަށް ވިދާޅުވެފައެވެ.

މި މަޝްރޫއާ ގުޅޭގޮތުން ހޯނޑެއްދޫ ގުޅާލާ ކައުންސިލްގެ ރައީސް ހުސައިން ވާރިޝް ވިދާޅުވީ މި ބްރިޖުގެ ސަބަބުން ދެ ރަށުގެ މެދުގައި އިގްތިސާދީ ގުޅުން ގާއިމުވެގެންދާނެ ކަމަށެވެ. އަދި މިއީ ހޯނޑެއްދޫގައި މަސައްކަތްކުރާ މަޑަވެލީ ރައްޔިތުންނަށް ވެސް ލިބިގެންދާނެ ވަރަށް ބޮޑު ލުޔެއް ކަމަށް އޭނާ ވިދާޅުވިއެވެ.

އެމްޓީސީީސީން މަޑަވެއްޔާއި ހޯނޑެއްދޫ ގުޅާލާ ބްރިޖުގެ މަސައްކަތް މިހާރު ކުރަމުން އަންނައިރު، އެ ކުންފުނިން ދެ ރަށުގައި ހަރަކާތްތެރިވާއިރު، ކައުންސިލްތަކުން ބޭނުންވާ ކަންކަމުގެ ތެރެއިން ކުންފުނީގެ އިޖުތިމާއީ ޒިންމާގެ ދަށުން ކުރެވެން ހުންނަ ކަންކަން ކޮށްދެއްވާނެ ކަމުގެ ޔަގީންކަން ވެސް އާޒިމް ދެއްވިއެވެ.