ފައިސާ ދެެއްކުމަށް ސަރުކާރުގައި އެދިފައި ނުވާނެކަމަށް ސިޔާމް ވިދާޅުވި
އެމްޑީއޭގެ ލީޑަރު އަހުމަދު ސިޔާމް މުހައްމަދު، ވެލާނާ އިންޓަރނޭޝަނަލް އެއަރޕޯޓުގައި ނޫސްވެރިންނާ ބައްދަލުކުރައްވަނީ
ސަން ޓްރެވަލްސްއިން ހިލްޓަން ކުންފުންޏަށް ދައްކަންޖެހޭ ފައިސާ ދިވެހި ސަރުކާރުން ދައްކަން އުޅޭކަމަށް ބުނެ ދެކެވޭ ވާހަކަތައް، ސަން ކުންފުނީގެ ވެރިޔާ އަދި އެމްޑީއޭގެ ލީޑަރު އަހްމަދު ސިޔާމް މުހައްމަދު ދޮގުކުރައްވައިފިއެވެ.
ސިންގަޕޫރުގެ ހައިކޯޓުގައި ސަން ޓްރެވަލްސްއާ ދެކޮޅަށް ހިލްޓަން އިންޓަރނޭޝަނަލްއިން އުފުލާފައިވާ ދައުވާގެ އަޑުއެހުންތަކަށް ހާޒިރުވެވަޑައިގަތުމަށް ސިޔާމް ސިންގަޕޫރަށް ވަޑައިގަތުމުން ސިޔާމްގެ ޕާސްޕޯޓް ހިފެހެއްޓުމުން، ރާއްޖޭގެ ފޮރިން މިނިސްޓްރީން ސިޔާމްގެ ދިފާއުގައި ސިންގަޕޫރަށް ސިޓީއެއް ފޮނުވި ކަމަށާއި، އެހެންވެ އެ މައްސަލައިގެ ތެރެއަށް ސަރުކާރުން ވަދެ، ސިޔާމްގެ ދަރަނި ދައްކަން އުޅޭކަމަށް ބުނާ އަޑުތަކެއް ފެތުރުނެވެ.
ސިންގަޕޫރުން އެނބުރި ރާއްޖެވަޑައިގެން ވެލާނާ އިންޓަރނޭޝަނަލް އެއަރޕޯޓުގައި ނޫސްވެރިންނާ ބައްދަލުކުރައްވައި ސިޔާމް ވިދާޅުވީ، އެ ފައިސާ ސަރުކާރުން ދައްކާފައި ނުވާކަމަށާއި އެކަމަށް ސިޔާމް އެދިވަޑައިގެންފައިވެސް ނުވާނެކަމަށެވެ.
ރައީސް އިބްރާހީމް މުހައްމަދު ސާލިހާއެކު ކުރިޔަށް އޮތް ރިޔާސީ އިންތިޚާބުގައި ކޯލިޝަން ހަދާފައިވާ އެމްޑީއޭގެ ލީޑަރު ސިޔާމް ވިދާޅުވީ، އެމަނިކުފާނު ފައިސާ ހޯދަނީ ދުނިޔޭގެ އެކި ބޭންކުތަކުން ކަމަށެވެ. ދިވެހި ސަރުކާރަށްވެސް ފައިސާ ދޫނުކުރާ ބޭންކުތަކުން އެމަނިކުފާނަށް ފައިސާ ދޫކޮށްފައިވާކަމަށް ސިޔާމް ވިދާޅުވިއެވެ.
ނ. އިރުފުށި ރިސޯޓް ހިންގަން ސަން ޓްރެވަލްސްއާއި ހިލްޓަން އިންޓަރނޭޝަނަލްއާ ދެމެދު ހެދި އެއްބަސްވުން ސަން ޓްރެވަލްސްއިން އުވާލުމާ ގުޅިގެން، ސިންގަޕޫރުގެ އާބިޓްރޭޝަނަށް ހިލްޓަނުން އެމައްސަލަ ހުށަހެޅިއެވެ. އަދި މައްސަލާގައި ބަދަލުގެގޮތުގައި 24 މިލިއަން ޑޮލަރު ދެއްކުމަށް އޮތީ ސަން ޓްރެވަލްގެ މައްޗަށް ހުކުމްކޮށްފައެވެ. ސަން ޓްރެވަލްސްއިން ފައިސާ ދައްކާފައި ނުވާތީ އެ ނިންމުން ތަންފީޒުކޮށް ދިނުމަށް ހިލްޓަންއިން ސިންގަޕޫރުގެ ހައިކޯޓަށް ހުށަހަޅާފައިވާ މައްސަލައިގެ އަޑުއެހުންތައް ސިންގަޕޫރުގައި ކުރިޔަށްދާއިރު، އެ މައްސަލައިގެ އަޑުއެހުންތަކަށް ސިޔާމް ވަނީ ސިންގަޕޫރަށް ވަޑައިގެންފައެވެ.
