ރަނިންގމޭޓްކަމަށް ޝައުގުވެރިކަމެއް ނެތް: ސިޔާމް
22 ޖުލައި 2023 | ހޮނިހިރު 02:24ސިޔާމް ވިދާޅުވީ އޭނާގެ ވާދަވެރިއަކު ނެތްކަމަށް
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހާއި އެމްޑީއޭގެ ލީޑަރު އަހުމަދު ސިޔާމް މުހައްމަދު
އެމްޑީޕީ ކޯލިޝަނުގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ރަނިންގމޭޓަކަށް ވުމުގެ ޝައުގުވެރިކަމެއް ނެތްކަމަށް، އެކޯލިޝަނުގައި ހިމެނޭ މޯލްޑިވިއަން ޑިވެލޮޕްމަންޓް އެލިއަންސް (އެމްޑީއޭ)ގެ ލީޑަރ އަދި މީދޫ ދާއިރާގެ މެމްބަރު އަހުމަދު ސިޔާމް މުހައްމަދު ވިދާޅުވެއްޖެއެވެ.
ސިންގަޕޫރުން ރާއްޖެވަޑައިގެން، ވެލާނާ އިންޓަރނޭޝަނަލް އެއަރޕޯޓުގައި ނޫސްވެރިންނާ ބައްދަލުކުރައްވައި، ނޫސްވެރިއަކު އެކަމާ ގުޅޭގޮތުން ދެންނެވި ސުވާލަކަށް ޖަވާބު ދެއްވަމުން ސިޔާމު ވިދާޅުވީ، ރަނިންގމޭޓަކަށް ވުމަކީ އެއްގޮތަކަށްވެސް ޝައުގުވެރިކަމެއް ހުރި ކަމެއް ނޫންކަމަށެވެ. ނަމަވެސް އެކަމަށް މަޖުބޫރުވެއްޖެ ހާލަތެއްގައި އެކަން ކުރައްވާނެކަމަށް ސިޔާމު ވިދާޅުވިއެވެ.
ސެޕްޓެމްބަރ މަހު އޮންނަ ރިޔާސީ އިންތިޚާބުގައި ރައީސް ސާލިހާއެކު ކޯލިޝަން ހަދާފައިވަނީ ސިޔާމްގެ އެމްޑީއޭއާއި އަދާލަތު ޕާޓީންނެވެ. ސިޔާމް ވިދާޅުވީ އޭނާގެ ވާދަވެރިއަކު ނެތްކަމަށެވެ. އަދި އެމްޑީއޭއިން ބައިވެރިވެފައިވާ ކޯލިޝަން ރިޔާސީ އިންތިޚާބު އެއްބުރުން ކާމިޔާބުކުރާނެކަމަށެވެ.
ރައީސް ސާލިހު އަދި ރަނިންމޭޓެއް ކަނޑައަޅުއްވާފައި ނުވާއިރު، މ އަދި ވ އަތޮޅަށް ކުރެއްވި ކެމްޕެއިން ދަތުރުފުޅު ނިންމަވާލައްވަމުން ރައީސް ވިދާޅުވެފައިވަނީ އެއީ މިހާރު އެންމެ އުނދަގޫ ނިންމެވުމަށް ވެފައިވާކަމަށެވެ. ރައީސް ވިދާޅުވީ ރަނިންގމޭޓަކު ކޯލިޝަނުން އައުމަކީވެސް އެކަށީގެންވާ ކަމެއްކަމަށެވެ.
2018 ވަނަ އަހަރު އޮތް ރިޔާސީ އިންތިޚާބު އެމަނިކުފާނު ކާމިޔާބު ކުރެއްވީ ޖުމްހޫރީ ޕާޓީގެ ފައިސަލް ނަސީމާއެކު ނުކުންނަވައިގެންނެވެ. ރާއްޖެޓީވީގެ ފަށާއިރު ޕްރޮގްރާމްގައި ވާހަކަފުޅުދައްކަވަމުން ފައިސަލް ނަސީމް ވަނީ، ދެވަނަ ދައުރަކަށްވެސް ރައީސް ސާލިހުގެ ރަނިންގމޭޓަކަށް ވެވަޑައިގަތުމުގެ ޝައުގުވެރިކަން ހުރިކަމަށް ވިދާޅުވެފައެވެ.
