ރާއްޖޭން ދެކުނު ކޮރެއާއަށް ކަނޑައެޅުއްވި ނޮން ރެސިޑެންޓް ސަފީރު، މަގާމުގެ ފަތްކޮޅު އަރުވައިފި
21 ޖުލައި 2023 | ހުކުރު 16:02ކޮރެއާ ސަރުކާރާއެކު އެކި ދާއިރާތަކުން މިހާރަށްވުރެ ބޮޑަށް ގުޅުންބަދަހިކޮށް، އެއްބާރުލުން އިތުރުކުރުމަށް މަސައްކަތް ކުރައްވާނެ ކަމަށް ވިދާޅުވި
ދިވެހިރާއްޖެއިން ކޮރެއާއަށް ކަނޑައެޅުއްވި އާ ނޮން-ރެޒިޑެންޓް ސަފީރު، އެމަނިކުފާނުގެ ސަފީރުކަމުގެ ފަތްކޮޅު، ކޮރެއާގެ ރައީސަށް އެރުވުން
ދިވެހިރާއްޖެއިން ދެކުނު ކޮރެއާއަށް ކަނޑައެޅުއްވި ނޮންރެސިޑެންޓް ސަފީރު ހަސަން ސާބިރު، ސަފީރުކަމުގެ ފަތްކޮޅު އެ ޤައުމުގެ ރައީސް ޔޫން ސުކް ޔޯލްއަށް އަރުވައިފިއެވެ.
ހަސަން ސާބިރު ސަފީރު ކަމުގެ ފަތްކޮޅު ދެކުނު ކޮރެއާގެ ރައީސަށް އެރުވީ އެ ޤައުމުގެ ވެރިރަށް ސޯލްގައި ހުންނަ ޔޮންގްސަން ރިޔާސީ އޮފީހުގައި ހުކުރު ދުވަހުއެވެ. ސަަފީރުކަމުގެ ފަތްކޮޅު އެރުވުމަށްފަހު ދެ ބޭފުޅުން ބޭއްވެވި ބައްދަލުކުރެއްވުމުގައި ހަސަން ސާބިރު ވަނީ ކޮރެއާގެ ރައީސަށާއި، އެ ޤައުމުގެ ރައްޔިތުންނަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ނަންފުޅުގައާއި ދިވެހިންގެ ނަމުގައި ހެޔޮ އެދުމާއި ތަހުނިޔާ ދަންނަވާފައެވެ.
މީގެ އިތުރުން ދެކުނު ކޮރެއާ ސަރުކާރާއެކު އެކި ދާއިރާތަކުން މިހާރަށްވުރެ ބޮޑަށް ގުޅުންބަދަހިކޮށް، އެއްބާރުލުން އިތުރުކުރުމަށް އެމަނިކުފާނުގެ ސަފީރުކަމުގެ ދައުރުގައި ހާއްސަ އަޙައްމިއްޔަތުކަމެއް ދެއްވާނެކަން ވެސް އެ ބައްދަލުކުރެއްވުމުގައި ހަސަން ސާބިރު ފާހަގަކުރެއްވިއެވެ.
ސަފީރު ހަސަން ސާބިރު ކޮރެއާއަށް ކުރައްވަމުން ގެންދަވާ ދަތުރުފުޅުގައި، އެ ޤައުމުގެ އިސްވެރިންނާ ބައްދަލުކުރައްވައި، އެކި ދާއިރާތަކުން ރާއްޖެއަށް ފުރުސަތު ހޯއްދެވުމަށާއި، ދެ ޤައުމުގެ ގުޅުން އިތުރަށް ބަދަހިކުރެއްވުމާ ގުޅޭގޮތުން ވަނީ މަޝްވަރާކުރައްވާފައެވެ.
ސާބިރުގެ މި ދަތުރުފުޅުގައި ޖަޕާނުގައި ހުންނަ ރާއްޖޭގެ އެމްބަސީގެ ފަސްޓް ސެކްރެޓަރީ ޝަފްރާޒް ރަޝީދު ވެސް ބައިވެރިވެވަޑައިގެންނެވިއެވެ.
