ޑައިމޯފިން ޓްރެފިކް ކުރި މީހަކު އުމުރަށް ޖަލަށްލާން ހުކުމްކޮށްފި
21 ޖުލައި 2023 | ހުކުރު 10:48ޖޫސްޕެޓީ ކޮތަޅުގައި 58.58 ގްރާމް ޑައިމޯފިން ހުރި އިރު އިތުރުކޮތަޅެއްގައި 4.9 ގްރާމް ހުރި
ކްރިމިނަލް ކޯޓް
ޑައިމޯފިން ޓްރެފިކް ކުރި މީހަކު, ކުށް ސާބިތުވެ 24 އަހަރާއި، 10 މަހާއި 18 ދުވަހަށް ޖަލަށްލާން ހުކުމްކޮށްފިއެވެ.
މި މައްސަލައަކީ ދައުލަތުގެ ފަރާތުން، ކ. މާލެ، މއ. ކަނޑޫގެ އަހުމަދު ރަޝީދުގެ މައްޗަށް ހުށަހަޅާފައިވާ ޑައިމޯފިން ޓްރެފިކްކުރުމުގެ ކުށުގެ ދައުވާއެކެވެ. ދައުވާގެ ހުލާސާގައި ބުނެފައިވަނީ 13 ސެޕްޓެމްބަރު 2018 ގައި މަސްތުވާތަކެތި ހިފައިގެން ފެމިލީ ކޯޓް ކައިރިއަށްދާ ކަމުގެ މައުލޫމާތު ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެން ފުލުހުންގެ ބެލުމުގެ ދަށަށް ގެންގޮސް، އޭނާގެ ހަށިގަނޑު ބަލާ ފާސްކުރިއިރު، އޭނާ ލައިގެން ހުރި ބޮކްސާއާއި ހަށިގަނޑާއި ދޭތެރެއިން ކުރިމަތިން ނެގި ބޭރުން ކޮންޑަމް ލައްވާފައިވާ އިންސިއުލޭޝަން ޓޭޕްތަކުގެ ތެރެއިން ފެނުނު ޖޫސްޕެޓީ ކޮތަޅުގައި 58.58 ގްރާމް ޑައިމޯފިން ހުރިކަމަށާއި، އެ އިންސިއުލޭޝަން ޓޭޕްތަކުގެ ތެރެއިން ފެނުނު އިތުރު ޖޫސްޕެޓީ ކޮތަޅެއްގައި 4.9 ގްރާމް ޑައިމޯފިން ހުރިކަމަށް އެތަކެތީގެ ތަހުލީލު ރިޕޯޓްތަކުން ދައްކާ ކަމަށެވެ.
އޭނާގެ މައްޗަށް ދައުވާ އުފުލާފައިވަނީ މަސްތުވާތަކެއްޗާ ބެހޭ ގާނޫނުގެ 136 ވަނަ މާއްދާގެ (ބ) އާއި 105 ވަނަ މާއްދާގެ (ހ) އާއި ހަވާލާދީ އެ މާއްދާގެ (ނ) ގެ ދަށުން ޑައިމޯފިން ޓްރެފިކް ކުރުމުގެ ކުށުގެ ދައުވާއެވެ.
މި މައްސަލައިގައި ޝަރީއަތުގެ މަރުހަލާގައި ދިފާއީ ހެކި ހުށަހެޅުމަށް ދެވުނު ފުރުސަތުގައި ދައުވާ ލިބޭ އަހުމަދު ރަޝީދުގެ ފަރާތުން އެއްވެސް ހެއްކެއް ހުށަހަޅާފައި ނުވެއެވެ. އަދި އޭނާގެ މައްޗަށް އުފުލާފައިވާ ދައުވާއަށް އިންކާރުކޮށްފައިވެއެވެ.
މި މައްސަލައިގެ ހުކުމުގައި ބުނެފައިވަނީ އަހުމަދު ރަޝީދުގެ މައްޗަށް ހުށަހަޅާފައިވާ ޑައިމޯފިކް ޓްރެފިކް ކުރުމުގެ ކުށުގެ ދައުވާ، ޝަރީއަތުން ބެލި ބެލުމުން، މި މައްސަލައަކީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 51 ވަނަ މާއްދާގެ (އ) ގައި ބަޔާންކުރާ އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތުވާ މައްސަލަައެއްކަމުގައި ކަނޑައަޅާ ކަމަށެވެ.
އެހެންކަމުން ކުށުގެ އުގޫބާތެއްގެ ގޮތުން، މަސްތުވާތަކެއްޗާ ބެހޭ ގާނޫނުގެ 105 ވަނަ މާއްދާގެ (ނ) ގެ ދަށުން އަހުމަދު ރަޝީދު އުމުރަށް ޖަލަށްލުމާއެކު އެއްލައްކަ ރުފިޔާއިން ވަނީ ޖޫރިމަނާކޮށްފައެވެ. ނަމަވެސް ތަހުގީގު މަރުހަލާގައި 42 ދުވަސް ބަންދުގައި ހޭދަކޮށްފައިވާތީ އެ ދުވަސްތައް ވަނީ ޖަލުހުކުމުން އުނިކޮށްފައެވެ. އޭނާ ތަންޒީރުކުރަން ޖެހޭނީ 24 އަހަރާއި 10 މަހާއި 18 ދުވަސް ކަމަށް ހުކުމުގައި ބުނެފައިވެއެވެ.
