މާލެ އަށް ބޯކޮށް ވާރޭވެހި ފެންބޮޑުވެއްޖެ
މާލެ އަށް މިއަދު ހެނދުނު 08:00 އާއި 09:00 އާ ދެމެދު ބޯކޮށް ވާރޭ ވެހުނު
މާލޭގައި ފެންބޮޑުވުން
ބޯކޮށް ވާރޭވެހުމުގެ ސަބަބުން މާލޭގެ އެކި ހިސާބުތަކުގައި ވަރަށް ބޮޑަށް ފެންބޮޑުވެއްޖެއެވެ.
މާލެ އަށް މިއަދު ހެނދުނު 08:00 އާއި 09:00 އާ ދެމެދު ބޯކޮށް ވާރޭ ވެހުނެވެ.
އޭގެ ސަބަބުން ބައެއް ސަރަހައްދުތަކުގައި ފޫޓަކާ ގާތްކުރާ ވަރަށްވަނީ ފެންބޮޑުވެފައެވެ.
ފެންބޮޑުވެފައިވާ މަގުތަކުގެ ތެރޭގައި މާލޭގެ އަމީނީ މަގާއި މަޖީދީ މަގު އަދި މާފަންނުގެ މަގުތައް ހިމެނެއެވެ.
އެމްއެންޑީއެފްގެ ފަޔަރ އެންޑް ރެސްކިޔު ސަރވިސްއިން ދަނީ ފެން ބޮޑުވެފައިވާ ސަރަހައްދުތަކުގައި ފެން ހިއްކުމުގެ މަސައްކަތް ކުރަމުންނެވެ.
އެގޮތުން އައިޖީއެމްއެޗް ސަރަހައްދުގައި ޕަންޕު ބޭނުންކޮށްގެން ފެން ހިއްކުމުގެ މަސައްކަތް ކޮށްފައިވެއެވެ.
ރާއްޖޭގެ އެކި ސަރަހައްދުތަކަށް މޫސުން ގޯސްވާނެ ކަމަށް މެޓް އޮފީހުން ވަނީ ބުނެފައެވެ.
އަދި ކ.އަތޮޅުން ފެށިގެން މ.އަތޮޅު ހިމެނޭ ސަރަހައްދަށްވަނީ ޔެލޯ އެލަރޓްވެސް ނެރެފައެވެ.
މީގެ އިތުރުން މިއަދު ދިޔަވަރު ބޮޑުވާ ވަގުތުގައި ބައެއް ރަށްރަކަށް އުދައިގެ އަސަރު ކުރުން އެކަށީގެންވާކަމަށް ވެސް މެޓް އޮފީހުން ވަނީ ބުނެފައެވެ.
