މިހާރު ވެސް އިޖްތިމާއީ ގިނަ މަސައްކަތްތައް ކުރައްވަމުން ގެންދަވާކަމުގައި ވިދާޅުވި
ރާއްޖެޓީވީގެ ފަށާއިރު ޕްރޮގްރާމްގައި ނާއިބުރައީސް ފައިސަލް ނަސީމް ވާހަކަފުޅު ދައްކަވަނީ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ރަނިންމޭޓަކަށްވުމުގެ ޝައުގުވެރިކަން އެބަހުންނެވި ކަމަށް މިހާރުގެ ނާއިބުރައީސް ފައިސަލް ނަސީމް ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމްގައި ދެންނެވި ސުވާލަށް ޖަވާބު ދެއްވަމުން ނާއިބުރައީސް ފައިސަލް ވިދާޅުވީ ކުރިއަށް އޮތް ރިޔާސީ އިންތިޚާބުގައި ވާދާކުރައްވަން ނިންމަވާ ރައީސް ސާލިހު ކެމްޕޭން ކުރައްވަމުން ގެންދަވާއިރު، ކުރިއަށް އޮތް ދައުރުގެ ރަނިންމޭޓަކަށްވުމުގެ ޝައުގުވެރިކަން އެބަހުންނެވި ކަމަށެވެ.
ކުރައްވަމުން ގެންދަވާ މަސައްކަތްތަކަށް އިޝާރާތް ކުރައްވައި ނައިބުރައީސް ފައިސަލް ވިދާޅުވީ މިހާރު ވެސް ގިނަ އިޖްތިމާއީ މަސައްކަތްތައް ކުރައްވަމުން ގެންދަވާ ކަމަށާއި، އެމަސައްކަތްތަކުގެ ތެރޭގައި ހިމެނޭ ގިނަ މަސައްކަތަކީ ކުރިއަށް ގެންދަންޖެހޭ މަސައްކަތްތައް ކަމަށެވެ.
ނާއިބުރައީސް ފައިސަލް ވިދާޅުވީ ދިވެހި ގައުމާއި، ރައްޔިތުންގެ ހައްގުގައި މަސައްކަތް ކުރައްވާނެ ކަމަށެވެ. އަދި ހަވާލުވެވަޑައިގަންނަވާ ކޮންމެ މަސައްކަތެއް ވެސް އެންމެފުރިހަމަ ގޮތުގައި ކުރާއްވާނެ ކަމުގެ ޔަގީންކަން ނާއިބުރައީސް ފައިސަލް ދެއްވިއެވެ.
ކުރިއަށް އޮތް ދައުރުގެ ނާއިބުރައީސް ކަމަށް ޝައުގުވެރިކަން ފާޅުކުރައްވާފައިވާއިރު، ނާއިބުރައީސް ފައިސަލްއާ ގުޅޭގޮތުން ރައީސް ސާލިހު ވިދާޅުވެފައިވަނީ ފައިސަލް ނަސީމަކީ އެކުގައި މަސައްކަތް ކުރުމަށް ވަރަށް ފަސޭހަ އަދި އެހާމެ އިތުބާރު ކުރެއްވޭ ބޭފުޅެއް ކަމަށެވެ.
ނާއިބްރައީސް ފައިސަލްގެ 50 ވަނަ އުފަން ދުވަހާ ގުޅިގެން ބުރާސްފަތިދުވަހުގެ ރޭ ނެރުނު އެ މަނިކުފާނުގެ ބަޔޯގްރަފީއަށް ރައީސް ސާލިހު ދެއްވި ބަޔާނުގައި ވިދާޅުވީ ފައިސަލްއަކީ ވަފާތެރި، ދެތުވެރި ބޭފުޅެއް ކަމަށާއި ރަނގަޅު އެކުވެރިއެއް ކަމަށެވެ.
