އިންޖީނު ހުއްޓުނު ފެރީއެއްގައި ތިބި ބަޔަކަށް އެމްއެންޑީއެފް ނޮދަން އޭރިއާ ކޮމާންޑް ކޯސްޓްގާޑް ފަސްޓް ސްކޮޑްރަންއިން އެހީތެރިކަން ފޯރުކޮށްދީފިއެވެ.

ހއ އަތޮޅުގެ ރަށްތަކަށް ދަތުރުކުރާ ލިއޯ ޓްރޭޑިންގގެ މި ފެރީ، ހއ. ގައްލަންދޫގެ 3 ނޯޓިކަލް މޭލު ބޭރުން އިންޖީނު ހުއްޓިގެން އުޅޭކަމުގެ މައުލޫމާތު އެމްއެންޑީއެފް ނޮދަން އޭރިއާ ކޮމާންޑް ކޯސްޓްގާޑް ފަސްޓް ސްކޮޑްރަންއަށް ލިބިފައިވަނީ މިއަދު 15:14 ހާއިރެވެ. މިކަމުގެ މައުލޫމާތު ލިބުމާއެކު، އެމްއެންޑީއެފް ނޮދަން އޭރިއާ ކޮމާންޑް ކޯސްޓްގާޑް ފަސްޓް ސްކޮޑްރަންގެ ސީ އެމްބިއުލާންސް، އެހީތެރިކަން ފޯރުކޮށްދިނުމަށްޓަކައި ފެރީ އޮތް ސަރަހައްދަށް ދަތުރުކޮށްފައިވާ ކަމަށް އެމްއެންޑީއެފުން ބުންޏެވެ.

ފެރީގައި ޖުމްލަ 9 މީހުން ތިބި ކަމަށާއި، އޭގެތެރެއިން 6 މީހުންނާއި ކުޑަކުއްޖަކު ވަނީ ސީ އެމްބިއުލާންސަށް ނަގައި، އެ މީހުން ދަތުރުކުރަމުން ދިޔަ ރަށްތަކަށް ގެންގޮސްދީފައި ކަމަށް އެމްއެންޑީއެފުން ބުނެއެވެ. ހއ. އިހަވަންދޫއަށް ދަތުރުކުރަމުންދިޔަ މީހުން މިއަދު 16:32 ހާއިރު، އަދި ހއ. ހޯރަފުއްޓަށް ދަތުރުކުރަމުންދިޔަ މީހުން މިއަދު 16:40 ހާއިރު ވަނީ އެ ރަށްތަކަށް ގެންގޮސްދީފައެވެ. އެމްއެންޑީއެފް ނޮދަން އޭރިއާ ކޮމާންޑް ކޯސްޓްގާޑް ފަސްޓް ސްކޮޑްރަންއިން ވަނީ ދޯނި ސްޓާޓްކުރުމަށް ބޭނުންވާ ތެޔޮ އެ ދޯންޏަށް ފޯރުކޮށްދީފައެވެ.