ހއ. ވަށަފަރަކީ ލޯކަލް ޓުއަރިޒަމަށް ފައްކާކުރަން އެންމެ ރަނގަޅު އެއް ރަށް - ރައީސް
ގިރާ ސަރަހައްދު ހިމާޔަތް ކުރުމާއި ސްކޫލުގެ މަލްޓި ޕަރޕަސް ހޯލްގެ މަސައްކަތްވެސް ކޮށްދެއްވާނެ ކަމަށް ވިދާޅުވި
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު
ހއ. ވަށަފަރަކީ ލޯކަލް ޓުއަރިޒަމަށް ފައްކާކުރަން އެންމެ ރަނގަޅު އެއް ރަށް ކަމަށް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ރައީސް އެފަދައިން ވިދާޅުވީ ހއ. ވަށަފަރުގައި ވާހަކަފުޅުދައްކަވަމުންނެވެ.
ރައީސް ވިދާޅުވީ އެ ރަށަކީ ލޯކަލް ޓުއަރިޒަމް ވަރަށް ރަނގަޅަށް ހިންގޭނެ ރަށެއް ކަމަށެވެ. އެކަން ކުރުމަށްޓަކައި އެ ރަށުގެ އަސާސީ ޚިދުމަތް ފުރިހަމައަށް ފޯރުކޮށްދިނުން މުހިންމު ކަމަށް ރައީސް ވިދާޅުވިއެވެ. ރައީސް އިތުރަށް ވިދާޅުވީ، ބޭނުންފުޅުވީ ތަފާތުކުރުމެއް ނެތި ޚިދުމަތް ދިނުން ކަމަށެވެ. އެގޮތުން އެމަނިކުފާނު ސިޔާސަތުތައް ކަނޑައެޅުއްވިއިރު އެއްވެސް ރަށަކާމެދު ތަފާތުކުރުމެއް ގެންގުޅުއްވާފައި ނުވާނެ ކަމަށް ވިދާޅުވިއެވެ.
ރައީސް ވަނީ އެ ރަށުގެ ޚިދުމަތްތަކާމެދު ވާހަކަފުޅުދައްކަވާފައެވެ. އެގޮތުން އެ ރަށުގެ ސިއްހީ މަރުކަޒުގެ އެކްސްޓެންޝަގެ މަސައްކަތް ނިމިފައިވާ ކަމަށް ވިދާޅުވިއެވެ. ސިއްހީ މަރުކަޒުގެ އެކްސްޓެންޝަން އިމާރާތް ބުރާސްފަތި ދުވަހު ރައީސް ވަނީ ހުޅުއްވައިދެއްވާފައެވެ. ކުރިއަށް ކުރަން ހުރި ކަންކަމުގެ ތެރޭގައި އެ ރަށަށް އޭޓީއެމް ޚިދުމަތް ފޯރުކޮށްދިނުން ހިމެނޭކަމަށް ވިދާޅުވިއެވެ. އަދި އަންނަ ހަފުތާގައި ފުޓްބޯޅަ ދަނޑުގެ މަސައްކަތް ފަށާނެ ކަމަށްވެސް ވިދާޅުވިއެވެ. އަދި ގިރާ ސަރަހައްދު ހިމާޔަތް ކުރުމާއި ސްކޫލުގެ މަލްޓި ޕަރޕަސް ހޯލްގެ މަސައްކަތްވެސް ކޮށްދެއްވާނެ ކަމަށް ވިދާޅުވިއެވެ.
