ދެކުނު އޭޝިއާގެ އެންމެ ބާރުގަދަ ޕާސްޕޯޓަކަށް މިއަހަރުވެސް ދިވެހި ޕާސްޕޯޓް

ދެކުނު އޭޝިއާގެ އެންމެ ބާރުގަދަ ޕާސްޕޯޓަކަށް މިއަހަރު ވެސް ދިވެހި ޕާސްޕޯޓު ވެއްޖެއެވެ.

އިންޓަނޭޝަނަލް އެއަރ ޓްރާންސްޕޯޓް އެސޯސިއޭޝަނުން ހިއްސާ ކުރާ ޑޭޓާއަށް ހެންލީ އެންޑް ޕާޓްނަރސް އިން ވަނީ މިއަހަރުގެ ތިންވަނަ ކުއަރޓާގެ ޕާސްޕޯޓު އިންޑެކްސް އާއްމުކޮށްފައެވެ. މި އިންޑެކްސްގައި ދުނިޔޭގެ 199 ޤައުމެއްގެ ޕާސްޕޯޓުތައް ރޭންކު ކުރެއެވެ.

މި ރޭންކިންގައި ބަލަނީ ޕާސްޕޯޓު ބޭނުންކޮށްގެން ވިސާއާ ނުލައި ނުވަތަ އޮންއެރައިވަލް ވިސާއާއެކު ދަތުރު ކުރެވޭ ޤައުމުތަކުގެ އަދަދަށެވެ. ދިވެހި ޕާސްޕޯޓު ބޭނުންކޮށްގެން ވިސާއާއި ނުލައި އަދި އޮންއެރައިވަލް ވިސާ ލިބޭ ގޮތަށް މިހާރު 91 ޤައުމަކަށް ދަތުރުކުރެވޭއިރު މިއީ ދެކުނު އޭޝިއާގައި އެންމެ ގިނަ ޤައުމުތަކަށް މިގޮތަށް ދަތުރުކުރެވޭ ޕާސްޕޯޓެވެ. ދެވަނައިގައި އޮތް އިންޑިއާގެ ޕާސްޕޯޓާއެކު ވެސް ދަތުރުކުރެވެނީ އެންމެ 57 ޤައުމަށެވެ.

މީގެ އިތުރުން ދެކުނު އޭޝިއާގައި ހިމެނޭ އެހެން ޤައުމުތަކުގެ ތެރެއިން ބޫޓާން ޕާސްޕޯޓު ބޭނުންކޮށްގެން 53 ޤައުމަކަށް ވިސާއާ ނުލައި ދަތުރުކުރެވޭއިރު ސްރީލަންކާ ޕާސްޕޯޓު ބޭނުންކޮށްގެން 41 ޤައުމަށް، ބަންގްލަދޭޝްގެ ޕާސްޕޯޓު ބޭނުންކޮށްގެން 40 ޤައުމަށް، ނޭޕާލް ޕާސްޕޯޓު ބޭނުންކޮށްގެން 38 ޤައުމަށް، ޕާކިސްތާން ޕާސްޕޯޓު ބޭނުންކޮށްގެން 33 ޤައުމަށް އަދި އަފްޣާނިސްތާނު ޕާސްޕޯޓު ބޭނުންކޮށްގެން ދަތުރުކުރެވެނީ 27 ޤައުމަށެވެ.

ދެކުނު އޭޝިއާގެ އެންމެ ބާރުގަދަ ޕާސްޕޯޓުގެ ގޮތުގައި ދިވެހި ޕާސްޕޯޓު ހިމެނުނު ނަމަވެސް ދުނިޔޭގެ ރޭންކިންގައި ރާއްޖޭގެ ޕާސްޕޯޓު އޮތީ 57 ވަނައިގައެވެ. ދުނިޔޭގެ އެންމެ ބާރުގަދަ ޕާސްޕޯޓުގެ މަގާމު ޖާޕާނު ވައްޓާލުމަށްފަހު ހޯދާފައިވަނީ ސިންގަޕޫރުންނެވެ. ސިންގަޕޫރުގެ ޕާސްޕޯޓު ބޭނުންކޮށްގެން 192 ޤައުމަކަށް ވިސާއާ ނުލައި ދަތުރުކުރެވެއެވެ.

މި ރޭންކިންގައި އެންމެ ފަހަތުގައި އުޅެނީ އަފްޣާނިސްތާނާއި އިރާގާއި ސީރިއާ އަދި ޕާކިސްތާނުގެ ޕާސްޕޯޓެވެ.