ރާއްޖޭން ބޭރުގައި ދިރިއުޅޭ ދިވެހިން ރަޖިސްޓްރީ ކުރަން ޖެހޭނީ ފޯމު ހުށަހަޅައިގެން: އީސީ

މިއަހަރު ބާއްވާ ރިޔާސީ އިންތިޚާބުގައި ރީ ރަޖިސްޓްރީވުމުގެ ފުރުސަތު ހުޅުވާލާފައިވާއިރު ރާއްޖޭން ބޭރުގައި ދިރިއުޅޭ ދިވެހިން ރަޖިސްޓްރީ ކުރަން ޖެހޭނީ ފޯމު ހުށަހަޅައިގެން ކަމަށް އީސީން ބުނެފިއެވެ.

އީސީގެ ރައީސް ފުއާދު ތައުފީގު މިފަދައިން ވިދާޅުވީ އޮންލައިންކޮށް ރަޖިސްޓްރީ ނުކުރެވޭތޯ މީހަކު ސުވާލު ކުރުމުން ދެއްވި ޖަވާބުގައެވެ. އީސީން މި މަހުގެ 16 ވަނަ ދުވަހު ރީ ރަޖިސްޓްރޭޝަނަށް ހުޅުވާލިއިރު ވެސް ރާއްޖޭން ބޭރުގައި ދިރިއުޅޭ ދިވެހިންނަށް ރަޖިސްޓްރީ ކުރެވޭނީ އެ ޤައުމުތަކުގައި ހުންނަ ދިވެހި އެމްބަސީ އާއި ހައިކޮމިޝަން އަދި ކޮންސުލޭޓް މެދުވެރިކޮށް ފޯމު ހުށަހަޅައިގެން ކަމަށް ވަނީ ބުނެފައެެވެ.

Advertisement

މިއަހަރުގެ އިންތިޚާބުގައި ރާއްޖޭގައި ދިރިއުޅޭ ފަރާތްތަކަށް ދެ ގޮތަކަށް ރަޖިސްޓްރީވުމުގެ ފުރުސަތު އީސީން ވަނީ ހުޅުވާލާފައެވެ. އެއީ މި މަހުގެ ނިޔަލަށް އޮންލައިންކޮށް އަދި އަންނަ އޮގަސްޓް މަހުގެ 5އާ ހަމައަށް ފޯމު ހުށަހަޅައިގެންނެވެ. ނަމަވެސް އޮންލައިންކޮށް ރީ ރަޖިސްޓްރީވުމުގެ ފުރުސަތު ބޭރު ޤައުމުތަކުގައި ދިރިއުޅޭ ދިވެހިންނަށް ނެތުމުން އެކަމާ ދަނީ ސުވާލު އުފައްދަމުންނެވެ.

މިކަމާ ގުޅިގެން އީސީގެ ސެކެޓްރީ ޖެނެރަލް ހަސަން ޒަކަރިއްޔާ "ރާއްޖެއެމްވީ" އަށް ވިދާޅުވީ އޮންލައިންކޮށް ރީ ރަޖިސްޓްރީ ކުރެވޭނީ ރާއްޖޭގައި ރަޖިސްޓަރޑް ފޯނު ނަމްބަރެއް ބޭނުންކުރާ ފަރާތްތަކަށް ކަމަށެވެ. އެއީ ރަޖިސްޓްރީވުމަށް އޯޓީޕީ ދާނީ އެ ނަންބަރުތަކަށް ކަމަށްވާތީ އާއި އެހެން ޤައުމެއްގައި އުޅުނު ނަމަވެސް ރޯމިންގ ގެންގުޅޭ ފަރާތްތަކަށް އެ ޚިދުމަތް ލިބޭނެ ކަމަށް އޭނާ ވިދާޅުވިއެވެ.

އީމެއިލް މެދުވެރިކޮށް އޯޓީޕީ ފޮނުވުމުގައި މިހާރު ރިސްކުތަކެއް ހުރިކަން ފާހަގަކުރައްވައި ޒަކަރިއްޔާ ވިދާޅުވީ ކުރިއަށް އޮތްތަނުގައި އިންތިޚާބުތަކުގައި ސެކިއުރިޓީ ފީޗާތައް އިތުރަށް ވަރުގަދަކޮށް މެއިލްއަށް އޯޓީޕީ ދާގޮތް ހަދާނެ ކަމަށް އޭނާ ވިދާޅުވިއެވެ.

މީގެ ކުރިން ވެސް ރާއްޖޭން ބޭރުގައި ދިރިއުޅޭ ދިވެހިން ރަޖިސްޓްރީވަމުން އައީ ފޯމު ހުށަހަޅައިގެންކަން ވެސް ޒަކަރިއްޔާ ފާހަގަކުރެއްވިއެވެ.

އަހަރުގެ ރިޔާސީ އިންތިޚާބުގައި އީސީން ވަނީ ރާއްޖޭގެ އިތުރުން 8 ޤައުމެއްގައި ރީ ރަޖިސްޓްރީވުމަށް ހުޅުވާލާފައެވެ. އެއީ އިންޑިއާ، ސްރީލަންކާ، މެލޭޝިއާ، އިންގިރޭސިވިލާތް، ސިންގަޕޫރު، ތައިލެންޑް، ޖަޕާން، ޔޫއޭއީ އެވެ. މި ޤައުމުތަކުގައި ހުންނަ ދިވެހި އެމްބަސީ އާއި ހައިކޮމިޝަން އަދި ކޮންސުލޭޓް މެދުވެރިކޮށް އޮގަސްޓް 5އާ ހަމައަށް ފޯމު ހުށަހެޅޭނެއެވެ.

އީސީން ބުނެފައިވާ ގޮތުގައި މިއަހަރުގެ އިންތިޚާބުގައި ރާއްޖެއާއި ރާއްޖޭން ބޭރުގައި ޖުމްލަ 604 ވޯޓުފޮށި ބަހައްޓާނެއެވެ. ނަމަވެސް ރީ ރަޖިސްޓްރޭޝަނަށްފަހު މި އަދަދުތަކަށް ބަދަލު އައުން އެކަށީގެންވާ ކަމަށް އެ އިދާރާއިން ވަނީ ބުނެފައެވެ.

މިއަހަރުގެ ރިޔާސީ އިންތިޚާބު ސެޕްޓެމްބަރު 9 ގައި ބާއްވާއިރު މި އިންތިޚާބުގައި 282،755 މީހުންނަށް ވޯޓުލުމުގެ ޙައްގު ލިބިފައިވެއެވެ.