މިދިޔަ އަހަރު ދުނިޔޭގެ ޖޫނިއާ ޗެމްޕިއަންކަން ހޯދާފައިވާ ދެ އެތުލީޓުން ކަމަށްވާ ސްޕެއިންގެ ޖޯޖް ހެނާންޑޭޒްއާއި ބްރެޒިލްގެ ލޫނާ ހާޑްމަން މިއަހަރުގެ ވިޒިޓް މޯލްޑިވްސް ޕްރޯގައި ވާދަކުރަން ނިންމައިފިއެވެ.

އުމުރުން 16 އަހަރުގެ ޖޯޖްއަކީ ވިޒިޓް މޯލްޑިވްސް ޕްރޯގައި މުޅިން އަލަށް ވާދަކުރާ ބޮޑީބޯޑަރެކެވެ. މިއަހަރުގެ މުބާރާތުގައި އޭނާ ވާދަކުރުމަށް ހަމަޖެހިފައިވަނީ ފިރިހެން އޯޕަން ބަޔާއި ފިރިހެން ޖޫނިއާ ބައިގައެވެ.

މިދިޔަ އަހަރު ދުނިޔޭގެ ޖޫނިއާ ޗެމްޕިއަންކަމުގެ އިތުރުން އޭނާ ވަނީ ޖޫނިއާ ބައިން ގިނަ މުބާރާތްތަކެއް ކާމިޔާބުކޮށްފައެވެ. އޭގެތެރޭގައި 2022 ވަނަ އަހަރު ޔޫރަޕުގެ ޗެމްޕިއަންކަމާއި، 2021 އަދި 2022 ވަނަ އަހަރު ސްޕެއިންގެ ޗެމްޕިއަންކަމާއި، 2022 ވަނަ އަހަރު ކެނެރީ އައިލެންޑްސް ޗެމްޕިއަންކަމުގެ އިތުރުން އެ އަހަރުގެ ގްރޮމް ކިންގް ޓުއާގެ ޗެމްޕިއަންކަން ފާހަގަކޮށްލެވެއެވެ. ދުނިޔޭގެ ރޭންކިންއަށް ބަލާއިރު، އޭނާ މިވަގުތު ހިމެނިފައިވަނީ ޖޫނިއާ ބައިގެ ތިންވަނައިގައެވެ.

ލޫނާ ހާޑްމަންއަކީ މިދިޔަ އަހަރުގެ މުބާރާތުގައިވެސް ވާދަކޮށްފައިވާ ބޮޑީބޯޑަރެކެވެ. މިއަހަރު އޭނާ ވާދަކުރާނީ އަންހެން އޯޕަން ބައިގައެވެ. މިދިޔަ އަހަރު ދުނިޔޭގެ ޖޫނިއާ އަންހެން ޗެމްޕިއަންކަމުގެ އިތުރުން އޭނާ ވަނީ މި ބައިން ބްރެޒިލްގެ ޗެމްޕިއަންކަން ދެފަހަރު ހޯދާފައެވެ. އެއީ 2018 އަދި 2019 ވަނަ އަހަރުއެވެ. ލޫނާ ވަނީ އުމުރުން 10 އަހަރުގައި ބޮޑީބޯޑިން ކެރިއަރު ފަށާފައެވެ. ދުނިޔޭގެ ރޭންކިންގައި އޭނާއަކީ ޖޫނިއާ އަންހެން ބައިން އެއްވަނަ އެވެ. އަދި ސީނިއާ ބަޔަށް ބަލާއިރުވެސް ދުނިޔޭގެ އަށްވަނާގައި ލޫނާ ހިމެނެއެވެ.

މިއަހަރުގެ މުބާރާތުގައި ޖޫނިއާ ބައިވެސް އިތުރަށް ފޯރިގަދަވެ، ވާދަވެރިވާނެއެވެ. މިދިޔަ އަހަރުގެ ޖޫނިއާ ފިރިހެން ރަނަރަޕްކަން ހޯދާފައިވަނީ ރާއްޖޭގެ އާމިން އުމަރު މޫސާއެވެ. އެއްވަނަ ހޯދީ ކެނެރީ އައިލެންޑްސްގެ ގެބްރިއެލް މޮލީނާއެވެ.